လါမးရှး ၂၅ သီ, ၂၀၂၆ နံၣ်, ခ့ၣ်အဲးစံၣ်
ချၢၣ်လွံၢ်ထူၣ်ကီၢ်ရ့ၣ်(သုးက့ ၃)လၢၢ်ဒိၣ်ကီၢ်ဆၣ်အပူၤ ပယီၤသုးလၢနုၥ်လီၤဟူးဂဲၤဖဲယ့ၤတွ့ကိကရူၢ်ပူၤအံၤတဖၣ် နုၥ်လီၤဟံဝဲ ဒူသဝီကမျၢၢ်အသိလ့ၣ်စဲးဖီကဟၣ်တၢ်ဖိတၢ်လံၤဃုၥ်ဒီးတၢ်ဖိတၢ်လံၤလုၢ်ဒိၣ်ပှ့ၤဒိၣ်လၢအဂၤတဖၣ်ခဲလၢၥ်အဂ့ၢ်န့ၣ် ကီၢ်ဆၣ်ပှၤဘၣ် မူဘၣ်ဒါ စံးဘၣ်ခ့ၣ်အဲးစံၣ်-ကညီ တၢ်ကစီၣ်န့ၣ်လီၤ.
အပူၤကွံၥ်လါမးရှး ၅ သီအခါ ပယီၤသုးခီၣ်ချ့သုးရ့ၣ်ဒီးခီၣ်သုးရ့ၣ်(၃)ရ့ၣ်ပၥ်ဖှိၣ်ထီၣ်သးနုၥ်လီၤဝဲလၢ (ရေတွင်းကုန်း)ကရူၢ်ဒူသဝီပူၤ ဝံၤခီဖျိတၢ်ဒုးကဲထီၣ်ဒီးပယီၤသုးတကပၤခးလီၤကျိဖးဒိၣ်,ကဘီယူၤ,ဒြိလဲၤတ့ၢ်လီၤမ့ၣ်ပိၢ်တကးဒံးဘၣ်ခးသံဃုၥ်ဝဲအဃိ ကမျၢၢ်တစှၤန့ၢ်(၃၀)ဂၤသံဝဲအမဲၥ်ညါ ဘၣ်တၢ်ဖီၣ်ဃၥ်ဝဲ(၂၀၀)ဃၣ်ဃၣ်ဒီးပှၤနီၣ်ဂံၢ်(၄၀၀၀)ဘျဲၣ်ဘၣ်ဃ့ၢ်ထီၣ်ဝဲန့ၣ်လီၤ.
တကီၢ်ခါခဲအံၤတၢ်ဆၢကတီၢ်အိၣ်(၃)နွံလံဘၣ်ဆၣ်တုၤလၢခဲအံၤပယီၤသုးလၢအိၣ်(ရေတွင်းကုန်း)ပူၤတဖၣ်တဟးထီၣ်ဒံးဘၣ်အမဲၥ်ညါနုၥ်လီၤ ဖဲကမျၢၢ်ဃ့ၢ်ထီၣ်အကတီၢ်အဝဲသ့ၣ်နုၥ်လီၤဟံကွံၥ် သဝီ(၅)ဖျၢၣ်ပူၤပှၤကမျၢၢ်အသိလ့ၣ်,ဆဲးကၢးဃုၥ်ဒီး တၢ်အီၣ်တၢ်အီ တၢ်ဖိ တၢ်လံၤလုၢ်ဒိၣ်ပှ့ၤဒိၣ်တဖၣ်ခဲလၢၥ်ဝံၤက့ၤစိၥ်ဝဲဆူအသုးတၢ်လီၢ်အဂ့ၢ်န့ၣ် လၢၢ်ဒိၣ်ကီၢ်ဆၣ် ပှၤကတိၤတၢ်ပၢ ပဒိၣ်စီၤဝါမုၢ် စံးဘၣ် ခ့ၣ်အဲးစံၣ်-ကညီတၢ်ကစီၣ် န့ၣ်လီၤ.
“ခဲအံၤပယီၤသုးလၢနုၥ်လီၤအိၣ်ဖဲယ့ၤတွ့ကိသဝီပူၤတဖၣ်န့ၣ်အိၣ်ဒံးဒၣ်ဖဲသဝီပူၤန့ၣ်လီၤ.ဝံၤဒီးကမျၢၢ်အတၢ်ဖိတၢ်လံၤဒုစိၥ်ဝဲလၢၤလံ.မ့မ့ၢ်လၢယ့ၤတွ့ကိကရူၢ်ပူၤ သဝီ(၅)ဖျၢၣ်အတၢ်ပီးတၢ်လီ လီၤဆီဒၣ်တၢ်ဘု,ပဲ,ဟံၣ်ဃီတၢ်ပီးတၢ်လီမ့ဝံၤဆဲးကၢး,ဒီးသိလ့ၣ်လၢ အတီတၢ် အါဒၣ်တက့ၢ်စဲးဖီကဟၣ်တၢ်ဖိတၢ်လံၤန့ၣ်စိၥ်ဝဲခဲလၢၥ်လီၤ.ဘၣ်မနုၤအဃိလဲၣ်န့ၣ်ဖဲဒုၣ်ဒါနုလီၤအခါန့ၣ်ပှၤကမျၢၢ်န့ၣ်စိၥ် တၢ်ဖိတၢ်လံၤ,တၢ်အီၣ်တၢ်အီတချုးနီမံၤဘၣ်,ဃ့ၢ်ထီၣ်ဝဲကူတဘ့ၣ်ကၤတဘ့ၣ်လၢလိၤလီၤ.တချုးလၢအဃ့ၢ်ဒံးဘၣ်အခါန့ၣ်ဒုၣ်ဒါဖီၣ်တ့ၢ်အဝဲသ့ၣ်ဖဲန့ၣ်ခံသီသၢသီဒံးမီၤ”အဂ့ၢ်န့ၣ် စံးဝဲန့ၣ်လီၤ.
ယ့ၤတွ့ကိသဝီပူၤဃုၥ်ဒီးဒူသဝီလၢအိၣ်ဘူးဖဲန့ၣ်(၄)ဖျၢၣ်စးထီၣ်ဖဲပယီၤသုးနုၥ်လီၤဟူးဂဲၤအခါန့ၣ်ခီဖျိဟီၣ်ကဝီၤ (KNLA)သုးပၥ် ဖှိၣ်နုၥ်လီၤခးဝဲအဃိ သဝီလၢတပၣ်ဃုၥ်ယ့ၤတွ့ကိအံၤပယီၤသုးမ့ဟးထီၣ်ဝဲလံဒီးတချုးလၢအဟးထီၣ်ဒံးဘၣ်အခါဒိးလီၤတ့ၢ်ဃၥ်ဝဲ ဟီၣ်လၥ်မ့ၣ်ပိၢ်အဃိ ဆၣ်ဖိကီၢ်ဖိသံဘၣ်ဒိဘၣ်ထံးအိၣ်ဝဲ လီၢ်ကဝီၤပှၤဘၣ်မူဘၣ်ဒါစံးဝဲအသိးသ့ၣ်ညါဘၣ်န့ၣ်လီၤ.
ဒ်န့ၣ်အသိးတၢ်ဂ့ၢ်စးထီၣ်ကဲထီၣ်အခါကမျၢၢ်အဂၤ(၁၀၀)ဘျဲၣ်လၢပယီၤသုးဖီၣ်တ့ၢ်ဃၥ်ဝဲအံၤဟီၣ်ကဝီၤ(KNLA)လဲၤမၤထူၣ်ဖျဲးထီၣ်ဝဲအိၣ်ဘၣ်ဆၣ် ခဲအံၤကမျၢၢ်အဂၤ(၄၀)ဘျဲၣ်န့ၣ်ပယီၤသုးဖီၣ်တ့ၢ်ဃၥ်ဝဲအဖၢမုၢ်အဂ့ၢ်န့ၣ် ပဒိၣ်စီၤဝါမုၢ် စံးအါထီၣ်ဝဲန့ၣ် လီၤ.
“ကမျၢၢ်လၢဒုၣ်ဒါဖီၣ်ဃၥ်ဝဲတဖၣ်န့ၣ်အတဟးထီၣ်ခဲလၢၥ်ဒံးဘၣ်ကအိၣ်တ့ၢ်ဒံးအဂၤ(၄၀)ဘျဲၣ်ဒံး.ဒီးပှၤကမျၢၢ်သ့ၣ်တဖၣ်အံၤဒုၣ်ဒါ သူဝဲဒၣ်လၢပှၤကမျၢၢ်တၢ်ဖိတၢ်လံၤလၢအိၣ်သဝီပူၤတဖၣ်န့ၣ်မၢအစိၥ်လီၤစၢၤပၥ်ထီၣ်လၢသိလ့ၣ်ပူၤဒ်န့ၣ်မီၤမၢအီၣ်ဝဲ.အဂၤတခါန့ၣ် ပယီၤသုးလၢနုၥ်လီၤဖဲ(နၤစၣ်လ့)တကပၤန့ၣ်ခဲအံၤတအိၣ်လၢၤဘၣ်ခီဖျိပသုးမုၢ်ဒိၣ်လဲၤမၤဆှဲဝဲအဃိဟးထီၣ်က့ၤလံ.ဘၣ်ဆၣ်ပှၤသ့ၣ်တဖၣ်အံၤတချုးအဟးထီၣ်ဒံးဘၣ်န့ၣ်ဒိးလီၤတ့ၢ်ဃၥ်ဝဲမ့ၣ်ပိၢ်အဃိဘၣ်ဝဲဆၣ်ဖိကီၢ်ဖိအိၣ်မီၤ”အဂ့ၢ်န့ၣ် စံးအါထီၣ်ဝဲန့ၣ်လီၤ.
ပယီၤသုးအံၤလၢကထီၣ်ဒိၣ်စိက့ၤ (ရေးတွင်းကုန်း)ဟီၣ်ကဝီၤလၢအိၣ်ဆီလီၤသးဖဲလၢၢ်ဒိၣ်-နၣ်သၤကွ့အဘၢၣ်စၢၤ ကျဲမုၢ်ဖးဒိၣ် အဃၢၤ အံၤအဂီၢ် စးထီၣ်ဖဲတလါအံၤထီၣ်န့ၣ်ပယီၤသုးနုၥ်လီၤဟူးဂဲၤဝဲအါအါဂီၢ်ဂီၢ်ဒီး တုၤလၢခဲအံၤဟီၣ်ကဝီၤပူၤဖဲန့ၣ် တၢ်ဖ့ၣ်စၢ ဆဲးကဲထီၣ်ဒံးဝဲလၢခံခီခံကပၤအဘၢၣ်စၢၤန့ၣ်လီၤ.
လၢန့ၣ်အမဲၥ်ညါတၢ်ဒုးကဲထီၣ်အိၣ်ဂ့ၤတအိၣ်ဂ့ၤ ပယီၤသုးအံၤသူဝဲကျိဖးဒိၣ်,ဒြိ,ကဘီယူၤလဲၤခးလီၤတၢ်လၢလၢၢ်ဒိၣ်ကီၢ်ဆၣ်ဒူ သဝီပူၤကိးမုၢ်နံၤဒဲး ဃၣ်ဃၣ်အဃိ ကမျၢၢ်တၢ်သံတၢ်ဘၣ်ဒိဘၣ်ထံး,တၢ်ဟးဂူၥ်ဟးဂီၤဆဲးကဲထီၣ်ဒံးဝဲဒီး ဒ်န့ၣ်အသိးကမျၢၢ် သ့ၣ်တဖၣ်တုၤလၢခဲအံၤက့ၤဟံၣ်တဘူၣ်ဒံးဘၣ်န့ၣ်လီၤ.
