လါမးရှး ၁၄သီ, ၂၀၂၆နံၣ်, ခ့ၣ်အဲးစံၣ်,
ကီၢ်ကၠီၣ်တဲၣ်ကီၢ်ပယီၤကီၢ်ဆၢကညီဘၣ်ကီဘၣ်ခဲမဲၢ်လးဒဲကဝီၤအပူၤတနံၤအံၤလါမးရှး(၁၄)သီအနံၤအပူၤ Shalom Arts and Leadership College (SALC) ကၠိမၤဝဲ(၁၃)ဝီတဝီတၢ်ဟ့ၣ်လီၤကၠိဖိဖျိကၠိလံၥ်အုၣ်သးဝံၤဝဲဂ့ၤဂ့ၤအဂ့ၢ်,သ့ၣ်ညါဘၣ်န့ၣ်လီၤ.
(၂၀၂၅)(၂၀၂၆)ကၠိတၢ်မၤလိနံၣ်(၁၃)ဝီတဝီတၢ်ဟ့ၣ်လီၤဖျိကၠိလံၥ်အုၣ်သးအပူၤ(SALC)ကၠိဖိမုၣ်ခွါဖိထီၣ်ဝဲ(Bachelor Of Arts BA)(၃၁)ဂၤ,Computer institute(၉)ဂၤဒီး, Higher secondary(၂၁)ဂၤခဲလၢၥ်ပၥ်ဖှိၣ်အိၣ်ဝဲ(၆၅)ဂၤန့ၣ်လီၤ.
တနံၣ်အံၤကၠိဖိတဖၣ်ဖျိထီၣ်ဝဲအါအါဂီၢ်ဂီၢ်ဒီးအမျးကယၤဂ့ၤဝဲအဖီခိၣ်မ့ၢ်တၢ်သူၣ်မုၥ်သးမုၥ်အဂ့ၢ်,ကၠိခိၣ်သရၣ်စီၤဝ့လယၢၣ်စံးဝဲဒၣ်ဒ်အံၤန့ၣ်လီၤ.
အဝဲစံးဝဲလၢ“ကၠိအံၤတၢ်ကီတၢ်ခဲအိၣ်အကလုၥ်ကလုၥ်ဘၣ်ဆၣ်ပသးခုလၢပဖိပလံၤသ့ၣ်တဖၣ်ဖျိထီၣ်ဝဲအမျးကယၤဂ့ၤဒိၣ်မးန့ၣ်လီၤ.တနံၣ်အံၤပပှၤကၠိဖိဖျိထီၣ်အါန့ၢ်နံၣ်အပူၤကွံၥ်အဃိတနံၣ်အံၤပှၤဖျိထီၣ်ဖးဒိၣ်တဖုပတဲသ့န့ၣ်လီၤ.ပသးခုပပလၢၢ်ဘၣ်လၢသူၣ်စၢ်သးဘီၣ်တဖၣ်အိၣ်ဒီးတၢ်ဂုၥ်ကျဲးစၢးန့ၣ်လီၤ.” အဂ့ၢ်စံးဝဲန့ၣ်လီၤ.
လၢန့ၣ်အမဲၥ်ညါ,ဟ့ၣ်ဂံၢ်ဟ့ၣ်ဘါဝဲကၠိဖိဖျိထီၣ်တဖၣ်လၢကဃုကျဲဆဲးမၤလိအါထီၣ်တၢ်ဒီးမုၢ်လၢ်ဝဲလၢကဟ့ၣ်လီၤသးလၢပှၤကလုၥ်ပှၤတဝၢအတၢ်ဖံးတၢ်မၤပူၤအဂ့ၢ်စံးအါထီၣ်ဝဲဒၣ်န့ၣ်လီၤ.
ဒိးန့ၢ်ဘၣ်ဝဲဖျိကၠိလံၥ်အုၣ်သးအဖီခိၣ်,သးခုဝဲအဂ့ၢ်(SALC)တီၤထီကၠိဖျိထီၣ်နါအံၣ်သၤဒၤအူစံးဝဲဒၣ်န့ၣ်လီၤ.
ဖျိထီၣ်ကၠိဖဲအံၤဝံၤအလီၢ်ခံအိၣ်ဒီးတၢ်တိၥ်ပၥ်လၢကမၤက့ၤဝဲတၢ်လၢဒူသဝီပှၤတဝၢတၢ်ဖံးတၢ်မၤပူၤအဂ့ၢ်အဝဲစံးဝဲဒ်အံၤန့ၣ်လီၤ.
“ဖျိထီၣ်ကၠိတနံၤအံၤထံၣ်ဘၣ်မိၢ်ပၢ်သရၣ်သမါ,ဒီပုၢ်ဝဲၢ်တံၤသကိးအါမးအဖီခိၣ်သးခုဒိၣ်မးလီၤ.ဖျိကၠိဖဲအံၤဝံၤအလီၢ်ခံ,ယတိၥ်ပၥ်လီၤလၢကဃုဆဲးမၤလိတၢ်မ့ဝံၤယကမၤက့ၤတၢ်လၢဒူသဝီကၠိတၢ်ဖံးတၢ်မၤအပူၤန့ၣ်လီၤ.”အဂ့ၢ်စံးဝဲဒၣ်န့ၣ်လီၤ.
တနံၤအံၤ(SALC)ကၠိတၢ်ဟ့ၣ်လီၤဖျိကၠိလံၥ်အုၣ်သးတၢ်ရဲၣ်တၢ်ကျဲၤအပူၤဒဲကဝီၤကမံးတံၥ်ခိၣ်နၢ်,ကၠိဖိမုၣ်ကၠိဖိခွါ,မိၢ်ပၢ်,သရၣ်,သမါဒီးကူၣ်သ့တမှံၤတပျီၤခိၣ်နၢ်တဖၣ်ဟဲပၥ်ဖှိၣ်သးခဲလၢၥ်ကအိၣ်(၇၀၀)ဂၤဃၣ်ဃၣ်အဂ့ၢ်သ့ၣ်ညါဘၣ်န့ၣ်လီၤ.
ဒ်န့ၣ်အသိး,တၢ်ဟ့ၣ်လီၤဖျိကၠိလံၥ်အုၣ်သးဒီး(၂၀၂၅)(၂၀၂၆)ကၠိတၢ်မၤလိနံၣ်တၢ်ပျၢ်ကၠိမူးအတၢ်ရဲၣ်တၢ်ကျဲၤအံၤတၢ်စးထီၣ်ဝဲဖဲဖဲဂီၤခီ(၁၀)အဆၢကတီၢ်ဒီးဝံၤက့ၤဝဲဖဲမုၢ်ဃ့ၢ်လီၤ(၁၂)နၣ်ရံၣ်တခီဘျဲၣ်အဆၢကတီၢ်အဂ့ၢ်,သ့ၣ်ညါဘၣ်လီၤ.
