လါအ့ဖြ့ၣ် ၁၃ သီ, ၂၀၂၆ နံၣ်, ခ့ၣ်အဲးစံၣ်
ခ့ၣ်အဲၣ်ယူၣ် ချၢၣ်လွံၢ်ထူၣ်ကီၢ်ရ့ၣ်(သုးက့ ၃)ဟီၣ်ကဝီၤပူၤလၢသုးမီၤစိရိၤမၤကမၣ်ဝဲပှၤဂ့ၢ်ဝီခွဲးယၥ်တဘိယူၢ်ဃီအံၤ လါမးရှးတလါ အတီၢ်ပူၤ လီၢ်ကဝီၤကမျၢၢ်သံကဒီးဝဲ(၄၀)ဘျဲၣ်ဒီး ဘၣ်ဒိဘၣ်ထံးဝဲ(၃၀ ) ဘျဲၣ် အဂ့ၢ်န့ၣ် သ့ၣ်ညါဘၣ်လၢကီၢ်ရ့ၣ် တၢ်မၤနီၣ်စရီ အပူၤန့ၣ်လီၤ.
လၢၢ်ဒိၣ်,ဆီထံးဒီးမူကီၢ်ဆၣ်အပူၤ လါမးရှး ၁ သီတုၤ ၃၁ သီ သုးမီၤစိရိၤဖီၣ်ဝဲကမျၢၢ်ဒီးသူဝဲကဘီယူၤ,ဒြိ, ခးလီၤကျိဖးဒိၣ် ဆူ ကၠိကၠံ, မအူၤပ့ၤ,နးလီ,အ့ဖယဲး,ကၠီကိ,ထံပူၤလူၢ်,အ့ၣ်ကိ,လ့ၣ်ပၠ့ၣ်လ့တိ, ဃဲဒၢ,ကီၤမဲၤသူၣ်, လ့ၣ်ပ့ၣ်ဝဲ ,ယွၤသၤယၤ,ကည့ၣ်ကၠိၢ်, သဲဖၠူၤသဝီသီ,စယၣ်ခ့ၤ,ဒဲၣ်အူ,ဖးဒိၣ်,ပၠ့ၣ်ယ့ၣ်,စွ့ၤခဲစူၣ်,ဖိးတး, စွ့ၤခမီၣ်, လ့ၣ်ပ့ၣ်ဝဲဒီး ဒလၣ်စ့ၣ်သဝီသ့ၣ်တဖၣ် အံၤအပူၤန့ၣ်လီၤ.
ခီဖျိလၢအတၢ်ဟူးတၢ်ဂဲၤသ့ၣ်တဖၣ်အံၤအဃိ လီၢ်ကမျၢၢ်သံပၥ်ဖှိၣ်အိၣ်ဝဲ(၄၃)ဂၤဒီးဘၣ်ဒိဘၣ်ထံးဝဲ(၃၇)ဂၤ တကးဒံးဘၣ်အမဲၥ်ညါ ဟံၣ်(၃၇)ဖျၢၣ်, တီၤဖုၣ်ကၠိ(၁)ဖျၢၣ်,သီခါဖၠၣ်(၁)ဖျၢၣ်ဟးဂူၥ်ဟးဂီၤဝဲဒၣ်အဂ့ၢ်န့ၣ် ကီၢ်ရ့ၣ်တၢ်မၤနီၣ်အပူၤပၥ်ဖျါဝဲန့ၣ်လီၤ.
ဒ်န့ၣ်အသိးလၢတလါအတီၢ်ပူၤအံၤစ့ၢ်ကီးပယီၤသုးဖီၣ်ဝဲလီၢ်ကဝီၤကမျၢၢ်(၃၂၉)ဂၤဒီးဖဲနန့ၣ်အကျါပၣ်ဃုၥ်ဝဲပိၥ်မုၣ်ပိၥ်မၢၤ, ဖိဒံဖိသၣ် (၁၄၈)ဂၤန့ၣ်လီၤ. ဘၣ်ဆၣ်ကမျၢၢ်လၢတၢ်ဖီၣ်ဝဲတဖၣ်အံၤလၢကထူၣ်ဖျဲးထီၣ်အဂီၢ် ပယီၤသုးဃ့အီၣ်ဝဲစ့(၅)ကလီၢ် တုၤလၢ အကလီၢ်(၂၀၀)ဘျဲၣ်ဝံၤပျၢ်လီၤက့ၤဝဲ အဂ့ၢ်န့ၣ် သ့ၣ်ညါဘၣ်န့ၣ်လီၤ.
လၢန့ၣ်အမဲၥ်ညါလၢတလါအတီၢ်ပူၤအံၤ ပယီၤသုးဒီးဟီၣ်ကဝီၤကညီဒီကလုၥ်တၢ်ထူၣ်ဖျဲးသုးမုၢ်ဒိၣ်(KNLA)သုးပၥ်ဖှိၣ်အဘၢၣ်စၢၤ တၢ်ဒုးတၢ်ယၤအံၤအဃိ ပယီၤသုးတကပၤသံဝဲ(၁၇)ဂၤဘၣ်ဒိ(၂)ဂၤဒီး မ့မ့ၢ်လၢတၢ်ပၢၢ်ဆၢသုးပၥ်ဖှိၣ်ကရူၢ်တကပၤ ဘၣ်ဟ့ၣ်လီၤ ကွံၥ် အသးသမူလၢထံကီၢ်ဒီးပှၤကလုၥ်အဂီၢ်(၆)ဂၤ,ဘၣ်ဒိဘၣ်ထံး(၂၉)ဂၤအဂ့ၢ်န့ၣ် သ့ၣ်ညါဘၣ်လၢကီၢ်ရ့ၣ်တၢ်မၤနီၣ် စရီပူၤ န့ၣ်လီၤ.
ချၢၣ်လွံၢ်ထူၣ်ကီၢ်ရ့ၣ်ပူၤဖဲအပူၤကွံၥ်လါဖ့ၤဘြူၤအါရံၤတလါအတီၢ်ပူၤစ့ၢ်ကီး ခီဖျိလၢသုးမီၤစိရိၤအတၢ်ဟူးတၢ်ဂဲၤအံၤအဃိ ကမျၢၢ်သံဘၣ်ဒိဘၣ်ထံးအိၣ်ဝဲ(၁၅)ဂၤဒီးကမျၢၢ်ဟံၣ်,တၢ်ဘါယွၤသရိၥ်,ကၠိတၢ်သူၣ်ထီၣ်ဟးဂီၤပၥ်ဖှိၣ်အိၣ်ဝဲ(၅၄)ဖျၢၣ်န့ၣ်လီၤ.
သုးဟံန့ၢ်တၢ်စိတၢ်ကမီၤဝံၤလီၢ်ခံ ခ့ၣ်အဲၣ်ယူၣ်ကီၢ်ရ့ၣ်/သုးက့တဖၣ်အကျါလီၤဆီဒၣ်တၢ်ချၢၣ်လွံၢ်ထူၣ်ကီၢ်ရ့ၣ်(သုးက့ ၃)အံၤ မ့ၢ်ကီၢ်ရ့ၣ်တဘ့ၣ်လၢ သုးမီၤစိရိၤလုၢ်သ့ၣ်ခါပတၥ်မၤကမၣ်ဝဲပှၤဟီၣ်ခိၣ်ဖိခွဲးယၥ်ကဲထီၣ်အါန့ၢ်ဒံးကီၢ်ရ့ၣ်(သုးက့)လၢအဂၤအဂ့ၢ်န့ၣ် သ့ၣ်ညါဘၣ်န့ၣ်လီၤ.
