လါအ့ဖြ့ၣ် ၂၂ သီ, ၂၀၂၆ နံၣ်, ခ့ၣ်အဲးစံၣ်
ခ့ၣ်အဲၣ်ယူၣ် ဘျံးဒဝဲၢ်ကီၢ်ရ့ၣ်(သုးက့ ၄)ကစၢၢ်ဒိၣ်ကီၢ်ဆၣ်ဟီၣ်ကဝီၤပူၤ ကီၢ်သူလ့ၤသုးမုၢ်ဒိၣ်-KTLA သုးခိၣ်အဲၣ်ခွံအပှၤခိးခးဝဲ အဃိ ဟီၣ်ကဝီၤကညီဒီကလုၥ်တၢ်ထူၣ်ဖျဲးသုးမုၢ်ဒိၣ်-KNLA သုးရ့ၣ်-၁၂ အပှၤသံ ၄ ဂၤဒီး ကမျၢၢ်ဖိသၣ်သံဃုၥ်စ့ၢ်ကီးဝဲတဂၤ အဂ့ၢ်န့ၣ် သ့ၣ်ညါဘၣ်န့ၣ်လီၤ.
ဖဲတနံၤအံၤလါအ့ဖြ့ၣ် ၂၂ သီ ဂီၤခီ ၅း၀၀ နၣ်ရံၣ်အဆၢကတီၢ်န့ၣ် လၢပီချိဟီၣ်ကဝီၤ (KNLA)သုးရ့ၣ်-၁၂ ဟီၣ်ကဝီၤအပူၤန့ၣ် (KTLA)အပှၤခးဝဲအဃိ တၢ်သံတၢ်ပှၢ်ဘၣ်ဟဲအိၣ်ထီၣ်ဝဲဒ်အံၤန့ၣ်လီၤ.
ပှၤလၢဘူးဒီးတၢ်ပၢၢ်ဆၢကရူၢ်တဂၤစံးဝဲလၢ “တၢ်ကဲထီၣ်သးန့ၣ်ကဘၣ်ဖဲတဂီၤအံၤ ၅ နၣ်ရံၣ်ခိၣ်ဃၢၤန့ၣ်လီၤ.သုးခိၣ်အဲၣ်ခွံ (ကီၤလၤဖိ)အပှၤခးဝဲလီၤ.ပသ့ၣ်ညါဘၣ်လၢပပှၤတကပၤသံ(၄)ဂၤဒီးပှၤကမျၢၢ်ဖိသၣ်နါက့သံတဂၤန့ၣ်လီၤ.ဖိသၣ်အံၤကအိၣ်ဖဲ(၁၁)နံၣ်ခိၣ်ဃၢၤဒီးမ့ၢ်ဝဲပိၥ်ခွါဖိန့ၣ်လီၤ”အဂ့ၢ်န့ၣ် စံးဝဲန့ၣ်လီၤ.
ဟီၣ်ကဝီၤတၢ်လီၢ်လၢအကဲထီၣ်သးခဲအံၤန့ၣ် မ့ၢ်ဝဲဒၣ်ကညီဒီကလုၥ်တၢ်ထူၣ်ဖျဲးသုးမုၢ်ဒိၣ်(KNLA) သုးရ့ၣ်-၁၂ ဟီၣ်ကဝီၤတၢ်လီၢ် အသိး တၢ်လီၢ်အံၤ(KTLA)သုးခိၣ်အဲၣ်ခွံကရူၢ်အိၣ်ဆီလီၤသးဟူးဂဲၤဝဲတၢ်လီၢ်သ့ၣ်တဖၣ်အဂ့ၢ်န့ၣ် လီၢ်ကဝီၤကမျၢၢ်ဒီးပှၤဘၣ်မူ ဘၣ်ဒါ တဖၣ်စံးဝဲ အသိး သ့ၣ်ညါဘၣ်န့ၣ်လီၤ.
တချုးတၢ်ကဲထီၣ်သးအံၤဒံးဘၣ်အဘူးကတၢၢ် ဖဲအပူၤကွံၥ်လါမးရှး ၁၄ သီအနံၤစ့ၢ်ကီး လၢကစၢၢ်ဒိၣ်ကီၢ်ဆၣ်အပူၤ ဟီၣ်ကဝီၤတၢ်ပၢၢ်ဆၢကရူၢ် (ဗထူး)အပှၤတဖၣ်ဖဲအဝဲသ့ၣ်အိၣ်ဟဲက့ၤလီၤလၢမိၣ်ဒီၣ်သုးကလၢၤဒုးယၤရဲၣ်ကျဲၤအခါ ခီဖျိ(KTLA) အပှၤခိးခးဝဲဖဲသမံပိၥ်သီသဝီဒီး ကနဲဃီသဝီဘၢၣ်စၢၤအဃိ သံဝဲ(၆)ဂၤဒီးဘၣ်ဒိဘၣ်ထံးကဲထီၣ်အိၣ်ဝဲန့ၣ်လီၤ.
တကးဒံးဘၣ်တလါဃီဖဲလါမးရှး ၄ သီ ဒီး ၇ သီအနံၤစ့ၢ်ကီး ဟီၣ်ကဝီၤဖဲန့ၣ်အပူၤခီဖျိ(KTLA)သုးခိၣ်အဲၣ်ခွံအပှၤခိးခးဝဲအဃိ (KNLA) သုးရ့ၣ် -၁၂ အပှၤသံ (၂)ဂၤ ဒီးဘၣ်ဒိဘၣ်ထံး(၅)ဂၤကဲထီၣ်ဒံးဝဲန့ၣ်လီၤ.
ဘျံးဒဝဲၢ်ကီၢ်ရ့ၣ် ကစၢၢ်ဒိၣ်ကီၢ်ဆၣ်ဒီးတနီသရံၣ်ကီၢ်ဆၣ်လၢကီၢ်သူလ့ၤသုးမုၢ်ဒိၣ်(KTLA)ကရူၢ်လၢအဘၣ်တၢ်တီ ခိၣ်ရိၣ်မဲ အီၤလၢသုးခိၣ်အဲၣ်ခွံ(ကိး)ကီၤလၤဖိအပှၤဟူးဂဲၤဝဲအလီၢ်အံၤ တၢ်ခးလိၥ်သးကဲထီၣ်ဝဲဒီးဟီၣ်ကဝီၤ(KNLA) အဘၢၣ်စၢၤအိၣ်ဝဲတလီၢ်လီၢ်န့ၣ်လီၤ.
