လါမ့ၤ ၅ သီ, ၂၀၂၆ နံၣ်, ခ့ၣ်အဲးစံၣ်
ဖဲမဟါအနံၤလၢတးပီသုးကလၢၤပယီၤသုးအိၣ်အလီၢ်တဖၣ်န့ၣ် သုးမီၤစရိၤအံၤပၥ်ဂံၢ်ပၥ်ဘါဝဲကဘီယူၤ ဟဲတ့ၢ်လီၤဝဲတၢ်ဘိၣ် တဖၣ်ဒီး သုးကလၢၤအံၤသုတလီၤတဂ့ၤအဂီၢ်ကဘီယူၤကိးမုၢ်နံၤဒဲးအဆၢတတဲၥ်ဝဲဘၣ် အဂ့ၢ်န့ၣ် ပှၤလၢဘူးဒီး (KNLA)တဖၣ် စံးဝဲန့ၣ်လီၤ.
ဖဲမဟါလါမ့ၤ ၄ သီ မုၢ်ထူၣ် ၁၁း၄၅ မံးနံးအဆၢကတီၢ် လၢတးပီသုးကလၢၤအပူၤသုးမီၤစိရိၤ(Y-8)ကဘီယူၤ ဟဲတ့ၢ်လီၤဝဲ တၢ်ဘိၣ် တဖၣ်ဒီး မၤကဒီးဖဲ ၃း၂၀ တုၤ ၄း၄၀ မံးနံးတစု ဟဲတ့ၢ်လီၤကဒီးန့ၢ်ဝဲတၢ်ဘိၣ်သ့ၣ်တဖၣ်အဂ့ၢ်န့ၣ် သ့ၣ်ညါဘၣ် န့ၣ်လီၤ.
တချုးကဘီယူၤဟဲတ့ၢ်လီၤတၢ်ဘိၣ်ဒံးဘၣ်တနံၤဃီဖဲဂီၤခီ ၇း၃၀ ဃၣ်ဃၣ်အဆၢကတီၢ်န့ၣ် (ပၤရၤမီၤတၤ)လ့ၤထံကဘီယူၤခံဘ့ၣ် ဟဲတ့ၢ်လီၤဝဲ(၁၂၀ မမ) အသၣ်(၄)ဖျၢၣ်, ဖဲ ၄း၂၀ မံးနံးအခါစ့ၢ်ကီး ဟဲတ့ၢ်လီၤကဒီးဝဲ(၁၂၀ မမ) အသၣ်(၄)ဖျၢၣ် လီၤတဲၥ်ပိၢ်ဖး ထီၣ်ဝဲတးပီသဝီဃၢၤန့ၣ်လီၤ.
ဘၣ်ဃးကဘီယူၤဟဲခးလီၤတၢ်ဒီးဟဲတ့ၢ်လီၤတၢ်ဘိၣ်ဘျီဝဲအံၤန့ၣ် လီၢ်ကဝီၤပှၤဘၣ်မူဘၣ်ဒါတဂၤစံးဝဲလၢ“ ဖဲ(ပၤရၤမီၤတၤ) ကဘီယူၤ ဟဲတ့ၢ်လီၤတၢ်ဘိၣ်အခါန့ၣ်ပယီၤသုး(စစ်ကူ)သုးကျိၤလၢအဟဲထီၣ်ဖဲန့ၣ်တဖၣ် ခးတပျုၥ်တပျီၥ်ကျိလၢသဝီပူၤ. ပထံၣ်စိဃီၤလၢမ့ၣ်အူအီၣ်ပှၤဟံၣ်ခုၣ်ထီၣ်လၢသဝီပူၤ,မ့ၢ်ကဘီယူၤဟဲခးလီၤဝဲအဃိမ့ၣ်အူအီၣ်ထီၣ်ဧါ.မ့တမ့ၢ်ဘၣ်ခီမ့ၢ်ပယီၤသုးဒွဲၣ်အူအီၣ်ထီၣ်ဝဲဧါတသ့ၣ်ညါလီၤတံၢ်ဒံးဘၣ်”အဂ့ၢ်န့ၣ် စံးဘၣ်ခ့ၣ်အဲးစံၣ်-ကညီတၢ်ကစီၣ် န့ၣ်လီၤ.
ဒ်လီၢ်ကဝီၤ KNLA ပှၤဘၣ်မူဘၣ်ဒါလၢအိၣ်ဘူးဖဲန့ၣ်တဂၤစံးဝဲအသိးန့ၣ် စးထီၣ်လၢတၢ်ထီၣ်သုးကလၢၤအံၤ ကဘီယူၤဟဲတ့ၢ် လီၤဝဲ တၢ်ဘိၣ်အိၣ်တစှၤန့ၢ်ဝဲ(၅)ဘျီလံဒီး တၢ်ဘိၣ်တဖၣ်အကျါတၢ်အီၣ်တၢ်အီအမဲၥ်ညါကျိချံပှၥ်သၣ်ဘိၣ်ပၣ်ဃုၥ်ဝဲအဂ့ၢ်န့ၣ် ပဲၥ်ထံနီၤဖး စံးဝဲ န့ၣ်လီၤ.
“ယဆိမိၣ်တၢ်အီၣ်တၢ်အီ,ကျိချံပှၥ်သၣ်ကပၣ်ဃုၥ်ခဲလၢၥ်လီၤ.တၢ်လၢသုးကလၢၤပူၤနါက့ခးလိၥ်သးမၢ်မၢ်ဘျီအဝဲသ့ၣ်တၢ်ချံတၢ်သၣ်လၢၥ်,ဘူးကလၢၥ်ဘျီဟဲတ့ၢ်လီၤဝဲမၢ်မၢ်လီၤ.အဟဲတ့ၢ်လီၤတၢ်ဘိၣ်န့ၣ်ကအိၣ်လၢ(၅)ဘျီလံ.”အဂ့ၢ်န့ၣ် စံးဘၣ်ခ့ၣ်အဲးစံၣ်-ကညီ တၢ်ကစီၣ်န့ၣ်လီၤ.
ဒ်န့ၣ်အသိးသုးကလၢၤအံၤသုတလီၤတဂ့ၤအဂီၢ်လၢကျဲအဘိဘိတကီၢ်ခါခဲအံၤပယီၤသုးကျိၤ(၃)ဘိဟဲထီၣ်တုၤဝဲဒီး ဆီလီၤသး ဟူးဂဲၤဝဲဖဲသုးကလၢၤဃၢၤ,သဝီပူၤ,ကစၢၢ်ခီၣ်ထံးအခိၣ်အဃၢၤတၢ်လီၢ်တဖၣ်ဒီး တၢ်တယးကွၢ်ဝဲလၢအသုးဂံၢ်ဘါကအိၣ်ဝဲ အဂၤ(၃၀၀) ခိၣ်ဃၢၤ အဂ့ၢ်န့ၣ် (KNLA)ပှၤဘၣ်မူဘၣ်ဒါတဂၤဃီဝဲန့ၣ် စံးအါထီၣ်ဝဲန့ၣ်လီၤ.
လၢတၢ်န့ၣ်အဃိလၢသုးကလၢၤအခိၣ်အဃၢၤန့ၣ်တုၤလၢခဲအံၤဒုးယၤတၢ်ဖ့ၣ်ဆၢဆဲးကဲထီၣ်ဒံးဝဲလၢခံခီခံကပၤအဘၢၣ်စၢၤ ဒီး ဒ်န့ၣ်အသိးလၢသုးကလၢၤတၢ်ဒုးဘျီဝဲအံၤအပူၤကျိဖးဒိၣ်အမဲၥ်ညါကဘီယူၤ,(ပၤရၤမီၤတၤ)ဟဲခးလီၤတၢ်ကိးမုၢ်နံၤဒဲးအဖီခိၣ် လီၤဆီဒၣ်တၢ်တးပီသဝီပူၤဟံၣ်ဃီတၢ်သူၣ်ထီၣ်တဖၣ်ဟးဂူၥ်ဟးဂီၤဝဲအါမးအမဲၥ်ညါကမျၢၢ်အဂၤ(၂၀၀၀၀)ဃၣ်ဃၣ်လၢဃ့ၢ်ထီၣ်တဖၣ်တုၤလၢခဲအံၤဘၣ်ဟးအိၣ်ကဒုဒံးသးအဖၢမုၢ်န့ၣ်လီၤ.
တကးဒံးဘၣ်တၢ်ဒုးဘျီဝဲအံၤအပူၤစ့ၢ်ကီးပယီၤသုးတကပၤသံဘၣ်ဒိဘၣ်ထံးအိၣ်ဝဲအါမးအသိး ဟီၣ်ကဝီၤ(KNLA),(KNDO) ဃုၥ်ဒီး သိၣ်မှံၤသုးပၥ်ဖှိၣ်လၢအဂၤတဖၣ်စ့ၢ်ကီးသံဘၣ်ဒိဘၣ်ဒိၣ်ဘၣ်ထံးအိၣ်ဝဲအဂ့ၢ်န့ၣ် သ့ၣ်ညါဘၣ်န့ၣ်လီၤ.
