လါမ့ၤ ၃ သီ, ၂၀၂၆ နံၣ်, ခ့ၣ်အဲးစံၣ်
ခ့ၣ်အဲၣ်ယူၣ် ဒူသထူၣ်ကီၢ်ရ့ၣ်(သုးက့ ၁)ဘံလ့ကီၢ်ဆၣ် တးပီပယီၤသုးလၢၤသုတလီၤတဂ့ၤအဂီၢ် ပယီၤသုးလၢၤဟဲထီၣ်(စစ်ကူ) တဖၣ်အံၤနုၥ်လီၤဒွဲၣ်အအီၣ်ဝဲသဝီပူၤကမျၢၢ်ဟံၣ်ဒီး ကျိဖးဒိၣ်အဃိကမျၢၢ်သံကဒီးဝဲ(၁)ဂၤအဂ့ၢ်န့ၣ် သ့ၣ်ညါဘၣ်လၢကီၢ်ရ့ၣ်ပှၤ ဘၣ်မူဘၣ်ဒါအအိၣ်န့ၣ်လီၤ.
ဖဲအပူၤကွံၥ်လါအ့ဖြ့ၣ် ၂၇ သီ အနံၤန့ၣ် ပယီၤသုးလၢအဟဲထီၣ်(စစ်ကူ)တဖၣ်နုၥ်လီၤဝဲလၢတးပီသဝီပူၤဝံၤ ဒွဲၣ်အူအီၣ်ကွံၥ်ဝဲ ကမျၢၢ်အဟံၣ်အဃီတဖၣ်အမဲၥ်ညါကဘီယူၤစ့ၢ်ကီးဟဲခးလီၤတၢ်လၢသဝီပူၤအိၣ်ဝဲကိးမုၢ်နံၤဒဲးအဂ့ၢ်န့ၣ် ကီၢ်ရ့ၣ်နဲၣ်ရွဲၣ်ပဒိၣ်စီၤအ့နဲၤ စံးဘၣ်ခ့ၣ်အဲးစံၣ်-ကညီတၢ်ကစီၣ်န့ၣ်လီၤ.
“ကဘီယူၤန့ၣ်ဟဲဆှၣ်တၢ်ဟဲခးလီၤတၢ်လၢတးပီသဝီန့ၣ်ကိးမုၢ်နံၤဒဲးလီၤ.ခဲအံၤဟဲအါထီၣ်ကဒီးလၢ(ပၤရၤမီၤတၤ)သ့ၣ်တဖၣ်န့ၣ်ဟဲကွံၥ်ကိးမုၢ်နံၤဒဲးလီၤ.ဘၣ်ဟးဂီၤပှၤဟံၣ်ပှၤဃီဖးရးလံ.ဟံန့ၢ်စရီလီၤတံၢ်လီၤဆဲးတန့ၢ်ဒံးဘၣ်.မ့ဝံၤပယီၤသုးန့ၣ်ဖဲဟဲတုၤတးပီန့ၣ် ဒွဲအူအီၣ်ပှၤဟံၣ်.”အဂ့ၢ်န့ၣ် စံးဝဲန့ၣ်လီၤ.
ဒ်န့ၣ်အသိးတနံၤဃီ ၂၇ သီဝဲန့ၣ် ကဘၣ်ဖဲဟါခီ ၃း၄၀ မံးနံးအဆၢကတီၢ် ပယီၤသုးခီၣ်ချ့သုးရ့ၣ်(ခမရ-၄၀၈)လၢအိၣ်ဆီလီၤ သးဖဲကမၤမိၢ်အံၤ ပညိၣ်ခးစိဃီၤဝဲ(၁၂၀ မမ)တဖျၢၣ်လီၤတဲၥ်ပိၢ်ဖးထီၣ်ဝဲလၢဟးတရဲးကရူၢ် ထံကၠီၤခံသဝီဃၢၤအဃိ ဖံသ့မ့ၤ (၈၈)နံၣ်အံၤ ကျိဖးဒိၣ်ဘၣ်ဝဲအယီၢ်ဒ့လီၤပှီၤဖးလဲၢ်သံဝဲအဂ့ၢ်န့ၣ် သ့ၣ်ညါဘၣ်န့ၣ်လီၤ.
လ့က့ၣ်သုးကလၢၤလီၤဝံၤစးထီၣ်လၢတၢ်ဆဲးထီၣ်ဝဲတးပီသုးကလၢၤအံၤန့ၣ် သုးကလၢၤသုတလီၤတဂ့ၤအဂီၢ်လၢပျီပူၤအံၤ တဆီ ပယီၤသုး ဆှၢထီၣ်ဝဲ(စစ်ကူ)တကးဒံးဘၣ်အမဲၥ်ညါလၢကဘီယူၤအံၤတဆီကဘီယူၤဟဲတ့ၢ်လီၤဝဲမ့ၣ်ပိၢ်အိၣ်ဝဲကိးမုၢ်နံၤ ဒဲးအဃိ တးပီသဝီဃုၥ်ဒီးဒူသဝီကမျၢၢ်လၢအိၣ်ဘူးဖဲန့ၣ်တဖၣ်သံဘၣ်ဒိဘၣ်ထံး,ဟံၣ်ဃီဟးဂူၥ်ဟးဂီၤဘၣ်ဟဲအိၣ်ထီၣ်ဝဲ ဒ်အံၤန့ၣ်လီၤ.
ဒ်ကီၢ်ရ့ၣ်တၢ်မၤနီၣ်မၤဃါပူၤအိၣ်ဝဲအသိးန့ၣ် အဘူးကတၢၢ်ထဲဒၣ်လါအ့ဖြ့ၣ် ၂၅ သီ, ၂၇ သီ, ၂၈ သီ, ၂၉ သီ ဒီး ၃၀ သီ လၢ(၅)သီ အတီၢ်ပူၤအံၤ ပယီၤသုးသူဝဲဒၣ်ကျိဖးဒိၣ်,(jet fighter),(Y-12)ကဘီယူၤ,(ပၤရၤမီၤတၤ) ဟဲတ့ၢ်လီၤဝဲကျိဖးဒိၣ်,မ့ၣ်ပိၣ်အဖျၢၣ် (၂၀) ဃၣ်ဃၣ်ဆူ တးပီသဝီပူၤန့ၣ်လီၤ.
ခီဖျိလၢပယီၤသုးအတၢ်ဟူးတၢ်ဂဲၤသ့ၣ်တဖၣ်အံၤအဃိ တးပီသဝီပူၤကမျၢၢ်ဟံၣ်ဃီအူအီၣ်ဟးဂူၥ်ဟးဂီၤဘၣ်ဒိဘၣ်ထံးဝဲအါမး အသိး ကျီးပူၤတၢ်ထူၣ်တၢ်ဘိဟးဂီၤဝဲဘၣ်ဆၣ် တၢ်လီၢ်ဖဲန့ၣ်ခီဖျိဒုးယၤတၢ်သဘံၣ်သဘုၣ်ဆဲးကဲထီၣ်အဃိ တၢ်မၤလီၤတံၢ် အနီၣ်ဂံၢ်နီၣ်ဒွးတန့ၢ်ဒံးဘၣ်အဂ့ၢ်န့ၣ် ကီၢ်ရ့ၣ်ပှၤဘၣ်မူဘၣ်ဒါစံးဝဲန့ၣ်လီၤ.
ဒ်န့ၣ်အသိးဖဲမဟါလါမ့ၤ ၂ သီ မုၢ်နၤခီ ၁၁း၀၀ နၣ်ရံၣ်ခိၣ်ဃၢၤအဆၢကတီၢ်န့ၣ်စ့ၢ်ကီးလၢကဟဲထီၣ်(စစ်ကူ)အဂီၢ် ပယီၤသုး ပၥ်ဖှိၣ်နီၣ်ဂံၢ်ကအိၣ် အဂၤ (၅၀)ခိၣ်ဃၢၤအံၤ ဖဲဟဲထီၣ်လၢကျဲအခါခီဖျိဟီၣ်ကဝီၤ(KNLA)ဒီး(KNDO)သုးပၥ်ဖှိၣ်ခိးခးဝဲအဃိ ပယီၤသုးတကပၤသံဘၣ်ဒိဘၣ်ထံးအါမးအဂ့ၢ်န့ၣ် သုးက့ပှၤဘၣ်မူဘၣ်ဒါစံးဝဲအသိးသ့ၣ်ညါဘၣ်န့ၣ်လီၤ.
တးပီသုးကလၢၤလၢဟီၣ်ကဝီၤတၢ်ပၢၢ်ဆၢသုးပၥ်ဖှိၣ်ကရူၢ်ထီၣ်ခးဝဲန့ၢ်အသီ (၂၀)ဃၣ်ဃၣ်အံၤန့ၣ် တုၤလၢခဲအံၤတၢ်ဒုးဆဲးကဲထီၣ် ဒံးဝဲလၢခံခီခံကပၤအဘၢၣ်စၢၤကိးမုၢ်နံၤဒဲးဒီး လၢတၢ်ထီၣ်သုးကလၢၤအံၤဒီတကတီၢ်အပူၤန့ၣ် တးပီ,လ့က့ၣ်,လၢၢ်ချီၣ်သဝီဃုၥ်ဒီး ဒူသဝီလၢအိၣ်ဘူးဖဲန့ၣ်တဖၣ်ဟံၣ်တၢ်သူၣ်ထီၣ်ဟးဂီၤကအိၣ်လၢအဖျၢၣ်(၁၀၀)ဘျဲၣ်လံအသိး ကမျၢၢ်အဂၤ(၂၀၀၀၀)ဃၣ်ဃၣ် လၢအဃ့ၢ်ထီၣ်တဖၣ်စ့ၢ်ကီးတုၤလၢခဲအံၤဘၣ်ဟးစံၣ်အိၣ်လၢတၢ်ဘံၣ်တၢ်ဘၢလီၢ်အဖၢမုၢ်အဂ့ၢ်န့ၣ် လီၢ်ကဝီၤပှၤဘၣ်မူဘၣ်ဒါစံးဝဲ န့ၣ်လီၤ.
