လါမ့ၤ ၃ သီ, ၂၀၂၆ နံၣ်, ခ့ၣ်အဲးစံၣ်
ခ့ၣ်အဲၣ်ယူၣ် ချၢၣ်လွံၢ်ထူၣ်ကီၢ်ရ့ၣ်(သုးက့ ၃)လၢၢ်ဒိၣ်ကီၢ်ဆၣ်လၢသုးမီၤစိရိၤလဲၤခးလီၤတၢ်ခဲအံၤခဲအံၤန့ၣ် ကဘီယူၤဒီးကျိဖးဒိၣ် အဃိ(၃)သီအတီၢ်ပူၤ ကမျၢၢ်ဘၣ်ဒိကဒီးဝဲ(၃)ဂၤဒီးဟံၣ်ဟးဂီၤဝဲအဖျၢၣ်(၁၀)အဂ့ၢ်န့ၣ် ကီၢ်ရ့ၣ်တၢ်ကစီၣ်ထုးထီၣ်ပၥ်ဖျါဝဲ ဖဲတဟါအံၤန့ၣ်လီၤ.
ဒ်ကီၢ်ရ့ၣ်တၢ်ကစီၣ်တၢ်ပၥ်ဖျါပူၤအသိးန့ၣ် ဖဲမဟါလါမ့ၤ ၂ သီအနံၤ သၤယၤကိ(သာယာကုန်း)ပယီၤသုးတဖၣ်အံၤ ပညိၣ် ခးလီၤဝဲ(၁၂၀ မမ)ကျိဖးဒိၣ် ၄ ဖျၢၣ် လီၤတဲၥ်ပိၢ်ဖးထီၣ်ဝဲလၢကၠ့ၣ်ကွ့(ကြိတ်ကွင်း)သဝီကပၤ(၂)ဖျၢၣ်,သဝီပူၤ(၂)ဖျၢၣ်အဃိ ဟံၣ်ဟးဂီၤ(၁)ဖျၢၣ်ဒီး စဲးထူစံၥ်ဟးဂီၤ(၁)ခိၣ်အဂ့ၢ်န့ၣ် စံးဝဲန့ၣ်လီၤ.
တချုးတၢ်ကဲထီၣ်သးအံၤဒံးဘၣ်ဖဲလါမ့ၤ ၁ သီအနံၤန့ၣ်စ့ၢ်ကီး လၢလ့ၤပ့ၣ်ဝဲ(လိန်ပင်ဝိုင်း)သဝီအပူၤ ပယီၤသုးခီၣ်သုးရ့ၣ်(ခလရ-၂၆၄)သုးရ့ၣ်အံၤ ခးလီၤဝဲ(၁၂၀ မမ)ကျိဖးဒိၣ် ၄ ဖျၢၣ်အဃိ ကမျၢၢ်မီၤစီၣ်လွ့ၤ(၅၆)နံၣ်, မၣ်မံသူၤ(၄၀)နံၣ်ဒီး ဒီၤနွဲၤထ့(၅၈)နံၣ် သ့ၣ်တဖၣ်အံၤ ဘၣ်ဒိဘၣ်ထံးဝဲဒၣ်ဒၣ်စုၥ်စုၥ်အမဲၥ်ညါ ဟံၣ်ဟးဂီၤဝဲ(၆)ဖျၢၣ်စ့ၢ်ကီးန့ၣ်လီၤ.
တကးဒံးဘၣ်ဖဲလါအ့ဖြ့ၣ် ၂၉ သီအနံၤန့ၣ်စ့ၢ်ကီး လၢကဝီၤမုၥ်ဒၢသဝီအပူၤ သုးမီၤစိရိၤကဘီယူၤလဲၤတ့ၢ်လီၤဝဲ ပီၣ်(၂၅၀)မ့ၣ်ပိၢ် ဒီး ပီၣ်(၅၀)မ့ၣ်ပိၢ် ၂ ဖျၢၣ်အဃိ ကမျၢၢ်ဟံၣ်ဟးဂီၤဝဲ(၃)ဖျၢၣ်စ့ၢ်ကီးအဂ့ၢ်န့ၣ် တၢ်ပၥ်ဖျါအပူၤ ပၥ်ဖျါဝဲန့ၣ်လီၤ.
ချၢၣ်လွံၢ်ထူၣ်ကီၢ်ရ့ၣ် မူကီၢ်ဆၣ်,ဆီထံးကီၢ်ဆၣ်ဒီးလၢၢ်ဒိၣ်ကီၢ်ဆၣ်အပူၤ ဖဲအပူၤကွံၥ်လါအ့ဖြ့ၣ် ၄ သီ, ၉ သီ, ၁၆ သီ, ၂၀ သီ ဒီး ၂၄ သီအနံၤ ခီဖျိလၢကဘီယူၤဒီးကျိဖးဒိၣ်အံၤအဃိ ကမျၢၢ်သံဝဲ(၂)ဂၤ, ဘၣ်ဒိဘၣ်ထံးဝဲ(၁၀)ဂၤဒီး ဟံၣ်(၁၂)ဖျၢၣ်,တၢ်ဆါဟံၣ် တၢ်သူၣ်ထီၣ်(၂) ဖျၢၣ်,သိလ့ၣ်(၁)ခိၣ်ဘၣ်ဒိဘၣ်ထံးဟးဂီၤဝဲအဂ့ၢ်န့ၣ် ကီၢ်ရ့ၣ်တၢ်မၤနီၣ်စရီ ပူၤအသိးသ့ၣ်ညါဘၣ်န့ၣ်လီၤ.
သုးမီၤစိရိၤအံၤ လၢခ့ၣ်အဲၣ်ယူၣ် ကီၢ်ရ့ၣ်/သုးက့(၇)ဘ့ၣ်လၢၥ်အပူၤ စးထီၣ်ဖဲလါအ့ဖြ့ၣ်ထီၣ်တါလါတုၤလၢဝဲလၢခဲအံၤတစု န့ၣ် လၢဟီၣ်ကဝီၤအပူၤတၢ်ဒုးကဲထီၣ်အိၣ်ဂ့ၤ,တအိၣ်ဂ့ၤ သူဝဲကျိဖးဒိၣ်,ဟးခးလီၤတၢ်ဒီးကဘီယူၤအဆၢတတဲၥ်အိၣ်ဝဲကိးမုၢ်နံၤ ဒဲးဃၣ်ဃၣ်န့ၣ်လီၤ.
ဒီးလၢအတၢ်ဟူးတၢ်ဂဲၤသ့ၣ်တဖၣ်အံၤအဃိ ကမျၢၢ်လၢအသံဘၣ်ဒိဘၣ်ထံးတဖၣ်အကျါပၣ်ဃုၥ်ဝဲဖိဒံဖိသၣ်, ပှၤကၠိဖိလၢ အသးနံၣ်တပှဲၤ ဒံးဘၣ်ဝဲသ့ၣ်တဖၣ်အဂ့ၢ်န့ၣ် သ့ၣ်ညါဘၣ်န့ၣ်လီၤ.
