လါယူၤလံ,၁၄ သီ,၂၀၂၆နံၣ် ခ့ၣ်အဲးစံၣ်.
ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ ဘျံးဒဝဲၢ်ကီၢ်ရ့ၣ် ကစၢၢ်ဒိၣ်ကီၢ်ဆၣ်အပူၤ ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ-ဘျံးဒဝဲၢ်ကီၢ်ရ့ၣ် စုတီၤဖီလၥ် ကီၢ်သူလ့ၤသ့ၣ်ပှၢ်ဝဲၤကျိၤ-(KFD)ဒီး လီၢ်ကဝီၤကမျၢၢ်တဖၣ်အိၣ်ဒီးတၢ်ရဲၣ်တၢ်ကျဲၤလၢ တၢ်ကဒုးအိၣ်ထီၣ်ဝဲကစၢၢ်ဒိၣ်တၢ်ကဟုကယၥ်ဟီၣ်ကဝီၤအဂ့ၢ် အံၤသ့ၣ်ညါဘၣ်ဒ် ခ့ၣ်အဲၣ်ယူၣ်, ဘျံးတဝဲၢ်ကီၢ်ရ့ၣ်, ကီၢ်သူလ့ၤသ့ၣ်ပှၢ်ဝဲၤကျိၤထုးထီၣ်ပၥ်ဖျါထီၣ်ဝဲဒၣ်ဖဲ အပူၤကွံၥ်လါယူၤလံ(၁၃)သီအနံၤ န့ၣ်လီၤ.
ဘၣ်ဃးဒီး တၢ်ကဒုးအိၣ်ထီၣ်ကစၢၢ်ဒိၣ်တၢ်ကဟုကယၥ်ဟီၣ်ကဝီၤအံၤ တၢ်မၤတ့ၢ်အီၤတဘျုၣ်နံၣ်လံဘၣ်ဆၣ် တၢ်ဘိးဘၣ်ရၤလီၤအီၤတအိၣ်ဒံးဘၣ်အဂ့ၢ် ဒီးဒ်သိးလီၢ်ကဝီၤကမျၢၢ်တဖၣ် ကသ့ၣ်ညါနၢ်ပၢၢ်တၢ်ဂ့ၢ်ဒ်အံၤအဂီၢ် တၢ်ဟ့ၣ်ဆိပၥ်တၣ်သ့ၣ်ညါနၢ်ပၢၢ်ဒ်အံၤလီၤအဂ့ၢ် ခ့ၣ်အဲၣ်ယူၣ် ဘျံးဒဝဲၢ်ကီၢ်ရ့ၣ် နဲၣ်ရွဲၣ် ပဒိၣ်စီၤအဲၣ်နၤစံးဝဲဒၣ်ဒ်အံၤန့ၣ်လီၤ.
အဝဲစံးဝဲလၢ“ပအိၣ်ဒီးတၢ်ရဲၣ်တၢ်ကျဲၤလၢ ကဒုးအိၣ်ထီၣ်ကစၢၢ်ဒိၣ်တၢ်ကဟုကယၥ်ဟီၣ်ကဝီၤဘၣ်ဆၣ် ပတဘိးဘၣ်ရၤလီၤအီၤဒံးဘၣ်. လၢတၢ်ကဘိးဘၣ်ရၤလီၤအီၤအဂီၢ် ပဟ့ၣ်ဆိပၥ်တၢ်သ့ၣ်ညါနၢ်ပၢၢ်ဆူကမျၢၢ်ဒီး ပှၤတၢ်ချၢတဖၣ်ဒ်သိး ကသ့ၣ်ညါထွဲဝဲန့ၣ်လီၤ. ပမၤတ့ၢ်ကစၢၢ်ဒိၣ်တၢ်ကဟုကယၥ်ဟီၣ်ကဝီၤအံၤ အိၣ်လံတဘျုၣ်နံၣ်လံန့ၣ်လီၤ.”အဂ့ၢ်စံးဝဲဒၣ်န့ၣ်လီၤ.
ဒ်န့ၣ်အသိး တၢ်ဒုးအိၣ်ထီၣ်ကစၢၢ်ဒိၣ်တၢ်ကဟုကယၥ်ဟီၣ်ကဝီၤအံၤ တၢ်ပၥ်ပနီၢ်အလီၢ်မ့ၢ်ဝဲဖဲ ၁.ထံမိၢ်ပှၢ်ဟီၣ်ကဝီၤ, ၂.ကစၢၢ်ဒိၣ်ကီၢ်ဆၣ် ပီချိဟီၣ်ကဝီၤ, ပလီးခံဒီး အလဲၢ်အထီအိၣ်ဝဲ(၁၃၂၅၄၅၀.၃၈၃) အ့ကၢၢ်န့ၣ်လီၤ.
တကတီၢ်ဃီ အတၢ်ပညိၣ်အံၤမ့ၢ်ဒ်သိး ကညီထူလံၤဖိတဖၣ် အတၢ်စိၥ်မူစိၥ်ဂဲၤဝဲလုၢ်လၢ်ထူသနူတၢ်ဆဲးတၢ်လၤ ဃုၥ်ဒီးတၢ်ကဟုကယၥ်တၢ်မူတဝၢဒ်အမ့ၢ် ဆၣ်ဖိကီၢ်ဖိတၢ်မံၤလၥ်တဖၣ်, ထံကျါဒ့ၣ်ညၣ်တၢ်မူတဖၣ်အမဲၥ်ညါ တၢ်ကဟုကယၥ်သ့ၣ်ပှၢ်ဒီး ထံကျိထံကွၥ်တဖၣ်အသုတဟါမၢ်တဂ့ၤအဂီၢ်အဂ့ၢ် ဘျံးဒဝဲၢ်ကီၢ်ရ့ၣ်-ကီၢ်သူလ့ၤသ့ၣ်ပှၢ်ဝဲၤကျိၤပၥ်ဖျါဃုၥ်ဝဲဒၣ်န့ၣ်လီၤ.
ဟီၣ်ကဝီၤဝဲအံၤန့ၣ် ကဘၣ်တၢ်ပၥ်ဖှိၣ်ပၢဆှၢကသကိးအီၤလၢပှၤခံဖုလၢအမ့ၢ်ဝဲဒၣ် ပှၤထူလံၤဖိတဖၣ်ဒီး ပှၤထူလံၤဖိပဒိၣ်အဂ့ၢ် ပၥ်ဖျါဃုၥ်စ့ၢ်ကီးဝဲဒၣ်န့ၣ်လီၤ.
လၢတၢ်ပၢဆှၢရဲၣ်ကျဲၤတကပၤန့ၣ် ပှၤထူလံၤဖိတဖၣ် အိၣ်ဒီး တၢ်ခွဲးတၢ်ယၥ်လၢ ကစံၣ်ညီၣ်ပၢပြးဒူသဝီဒီး တၢ်လုၢ်အီၣ်သးသမူအကျိၤအကွၥ်, အဟီၣ်ခိၣ်ကပံၥ်, အန့ဆၢၣ်အိၣ်ယၢၤလၢအဒူသဝီအဆၢပူၤအဂ့ၢ်,အဝဲသ့ၣ်အိၣ်ဒီး အဒူသဝီတၢ်ပၢတၢ်ဆှၢအကျိၤအကျဲဒီးတၢ်သိၣ်တၢ်သီတဖၣ်အသိး ထိၣ်ဃူဒီးမၤထွဲဝဲဒၣ် ပှၤထူလံၤဖိအပဒိၣ်တၢ်ပၢတၢ်ပြတၢ်သိၣ်တၢ်သီအသိးန့ၣ်လီၤ.
ဒ်န့ၣ်အသိး လၢပှၤထူလံၤဖိအပဒိၣ် တၢ်ပၢတၢ်ဆှၢရဲၣ်ကျဲၤတခီန့ၣ် ဟ့ၣ်တၢ်ခွဲးတၢ်ယၥ်ဒီး သ့ၣ်ညါပၥ်ကဲပှၤထူလံၤဖိတဖၣ် ဒူသဝီတၢ်ပၢတၢ်ပြးဒီး တၢ်ပၢဆှၢဒူသဝီဟီၣ်ခိၣ်ကပံၥ် န့ဆၢၣ်တၢ်အိၣ်ယၢၤတဖၣ်အသိး မ့ၢ်ဝဲ ခၢၣ်စးလၢပှၤထူလံၤဖိတဖၣ် အပဒိၣ်လၢကမၤတၢ်လၢ ပှၤထူလံၤဖိတဖၣ်အဂီၢ်ဒီးကွၢ်စူၣ်ကယၥ်ဝဲ တၢ်ပၢဆှၢန့ဆၢၣ်တၢ်အိၣ်ယၢၤ ကဘၣ်လီၢ်ဘၣ်ဆးဒီး မၤသကိးတၢ်ဒီးပှၤထူလံၤဖိတဖၣ်န့ၣ်လီၤအဂ့ၢ် ပၥ်ဖျါဃုၥ်ဝဲဒၣ်န့ၣ်လီၤ.
ဟီၣ်ကဝီၤဝဲအံၤအပူၤ အိၣ်ဝဲဒၣ်ဒီး တၢ်နီၤဖးလီၤတၢ်လီၢ်တၢ်ကျဲတဖၣ် ဒ်အမ့ၢ် ဆၣ်ဖိကီၣ်ဖိတၢ်မံၤလၥ်ပျံၤကွီၤတဖၣ်, ထံကွၥ်ခံသ့ၣ်ပှၢ်ကတီၤဒီးသ့ၣ်ပှၢ်ဆဲးကျိးတဖၣ်, တၢ်ကဟုကယၥ်ထံဘျါ, ဒီးထံဘျါတၣ်မူတဝၢတၢ်လီၢ်တဖၣ်, ပှၤထူလံၤဖိလုၢ်လၢ်ထူသနူတၢ်လီၢ်တဖၣ်, တၢ်ပဆှၢန့ဆၢၣ်အိၣ်ယၢၤလၢ အယူၥ်ကၢဒီး တၢ်ထုးထီၣ်သူန့ဆၢၣ်တၣ်အိၣ်ယၢၤလၢ လုၢ်လၢ်ထူသနူအကျဲတၢ်လီၢ်တဖၣ်, န့ဆၢၣ်တၢ်ဟးကသုၣ်ကသီအလီၢ်ဒီး တၢ်မၤလိန့ၢ်တၢ်လၢန့ဆၢၣ်အလီၢ်တဖၣ်, ကမျၢၢ်တၢ်သူၣ်တၢ်ဖျးလီၢ်, ဒူသဝီပှၤအိၣ်ပှၤဆိးအလီၢ်တဖၣ်, မုၢ်ကျိၤဝဲၤကွၥ် တၢ်လဲၤထီၣ်လဲၤထီအလီၢ် သ့ၣ်တဖၣ်န့ၣ်လီၤ.
ဟီၣ်ကဝီၤဝဲအံၤန့ၣ် နံၣ်လၢကဟဲအတီၢ်ပူၤ တၢ်ပၥ်ဂၢၢ်ပၥ်ကျၢၤ ဘိးဘၣ်ရၤလီၤအီၤလၢဖိသဲစးကန့ၢ်ဝဲဒၣ်အဂ့ၢ် ဘျံးဒဝဲၢ်ကီၢ်ရ့ၣ်ပဒိၣ်စီၤအဲၣ်နၤ စံးဝဲဒၣ်စ့ၢ်ကီးန့ၣ်လီၤ.
