လါစဲးပထ့ဘၢၣ် ၄ သီ, ၂၀၂၆ နံၣ်, ခ့ၣ်အဲးစံၣ်
ခ့ၣ်အဲၣ်ယူၣ် မုၢ်တြီၢ်ကီၢ်ရ့ၣ်(သုးက့ ၅)တၢ်ပၢဟီၣ်ကဝီၤ လါအီကူးတလါအတီၢ်ပူၤ ကညီဒီကလုၥ်တၢ်ထူၣ်ဖျဲးသုးမုၢ်ဒိၣ် (KNLA) သုးပၥ်ဖှိၣ် ဒီးပယီၤသုးအဘၢၣ်စၢၤတၢ်ဒုးကဲထီၣ်ဝဲ(၁၁၇)ဘျီဒီး ပယီၤသုးသံအဂၤ(၄၀)ဘျဲၣ်အဂ့ၢ်န့ၣ် ကီၢ်ရ့ၣ်တၢ်ကစီၣ် ထုးထီၣ် ပၥ်ဖျါဝဲဖဲမဟါလါစဲးပထ့ဘၢၣ် ၃ သီအံၤန့ၣ်လီၤ.
ဖဲအပူၤကွံၥ်လါအီကူး ၁ သီတုၤ ၃၁ သီ (သုးက့ ၅)ဟီၣ်ကဝီၤအပူၤ ခံခီခံကပၤအဘၢၣ်စၢၤတၢ်ဒုးကဲထီၣ်(၁၁၇)ဘျီဒီး ပယီၤသုး တကပၤ သံ(၄၃)ဂၤ,ဘၣ်ဒိဘၣ်ထံး(၄၂)ဂၤဒီး ဒ်န့ၣ်အသိးပယီၤသုးသံအကျါပၣ်ဃုၥ်ဝဲသုးဒ့ခိၣ်(၃)ဂၤဒီးဘၣ်ဒိအကျါစ့ၢ်ကီး ပၣ်ဃုၥ်ဝဲသ့ၣ်ပှၢ် သုးဒ့ခိၣ်(၁)ဂၤအဂ့ၢ်န့ၣ် စံးဝဲန့ၣ်လီၤ.
တကးဒံးဘၣ်လၢလါအီကူးဒီတလါအတီၢ်ပူၤအံၤစ့ၢ်ကီး သုးမီၤစိရိၤသူဝဲကျိဖးဒိၣ်ခးလီၤတၢ်(၃၂)ဘျီ,ဒြိ(၄)ဘျီဒီးကဘီယူၤ လဲၤခးလီၤတၢ်လၢကမျၢၢ်ဒူသဝီတၢ်ဖံးအီၣ်မၤအီၣ်လီၢ်အိၣ်ဝဲ(၂၁)ဘျီ ပၥ်ဖှိၣ်ခဲလၢၥ်(၅၇)ဘျီညါန့ၣ်လီၤ.
ဒီးခီဖျိလၢကျိဖးဒိၣ်ဒီးကဘီယူၤအံၤအဃိ လီၢ်ကဝီၤကမျၢၢ်သံလၢအတၢ်ကမၣ်တအိၣ်ဝဲဘၣ်အံၤသံဝဲ(၃)ဂၤဒီး ဘၣ်ဒိဘၣ်ထံးဝဲ (၁၀)ဂၤအမဲၥ်ညါ ဟံၣ်(၉၅)ဖျၢၣ်,ဒဲ(၁)ဖျၢၣ်,သီခါဖၠၣ်တၢ်သူၣ်ထီၣ်(၅)ဖျၢၣ်ဒီးကၠိတၢ်သူၣ်ထီၣ်(၁)ဖျၢၣ် ပၥ်ဖှိၣ် ခဲလၢၥ်(၁၀၂)ဖျၢၣ် ဘၣ်ဒိဘၣ်ထံးဟးဂူၥ်ဟးဂီၤဝဲဒၣ် အဂ့ၢ်န့ၣ် လံၥ်တၢ်ပၥ်ဖျါအပူၤ ပၥ်ဖျါဝဲန့ၣ်လီၤ.
ဒ်န့ၣ်အသိးခီဖျိလၢပယီၤသုးအံၤခးလီၤကျိဖးဒိၣ်သူစ့ၢ်ကီးဝဲကလံၤကျါအတၢ်ဟူးတၢ်ဂဲၤအံၤအဃိ လီၢ်ကဝီၤကမျၢၢ်တဖၣ်ဘၣ်ဃ့ၢ် မှံဟးဖျိးသဂၢၢ်ဘၣ်ဝဲတၢ်သံတၢ်ဘၣ်ဒိဘၣ်ထံးတပယူၥ်ဃီဒီး လီၤဆီဒၣ်တၢ်ဖိဒံဖိသၣ်သ့ၣ်တဖၣ်တဖံးလိမၤဒိးဘၣ်တၢ်မူၤမူၤ နီၢ်နီၢ်ဘၣ် မ့မ့ၢ်တခီ ဘၣ်အိၣ်ဝဲလၢတၢ်ဘၣ်ယိၣ်တၢ်ပျံၤတၢ်ဖုးအပူၤထီဘိအဂ့ၢ်န့ၣ် ခ့ၣ်အဲၣ်ယူၣ် စံးဝဲန့ၣ်လီၤ.
ကီၢ်ပယီၤပူၤစးထီၣ်လၢသုးဟံန့ၢ်ဆူၣ်ထံကီၢ်တၢ်စိတၢ်ကမီၤလၢတၢ်(၅)နံၣ်ဘျဲၣ်အတီၢ်ပူၤအံၤ လီၤဆီဒၣ်တၢ်(သုးက့ ၅)ဟီၣ်ကဝီၤ အံၤ တၢ်ဒုးတၢ်ယၤကဲထီၣ်ဝဲတပယူၥ်ဃီဒီး ကမျၢၢ်တဖၣ်သဂၢၢ်ဘၣ်ဝဲကဘီယူၤ,ကျိဖးဒိၣ်အတၢ်လီၤဘၣ်ယိၣ်အိၣ်ဝဲကိးမုၢ်နံၤဒဲး ဃၣ်ဃၣ်တုၤလၢခဲအံၤန့ၣ်လီၤ.
အဃိဖဲအပူၤကွံၥ်လါယူၤလံအခါန့ၣ်စ့ၢ်ကီး မုၢ်တြီၢ်ကီၢ်ရ့ၣ်(သုးက့ ၅)ဟီၣ်ကဝီၤ တၢ်ဒုးကဲထီၣ်ဝဲ(၉၁)ဘျီဒီး ဖဲန့ၣ်ပယီၤသုးသံ (၂၃)ဂၤ,ဘၣ်ဒိဘၣ်ထံး(၅၅)ဂၤကဲထီၣ်ဒံးဝဲအသိး ခီဖျိလၢပယီၤသုးအကျိဖးဒိၣ် ဒီးကဘီယူၤအံၤအဃိ စ့ၢ်ကီး ကမျၢၢ်ဘၣ်ဒိ ဘၣ်ထံးဝဲ(၇)ဂၤဒီးဟံၣ်,တၢ်ဘူၣ်တၢ်ဘါဃုၥ်ဒီးဟံၣ်ဒွဲၣ်တၢ်သူၣ်ထီၣ်ဟးဂီၤဝဲအဖျၢၣ် (၅၀)ဘျဲၣ်ဒံးန့ၣ်လီၤ.