လါစဲးပထ့ဘၢၣ် ၁ သီ, ၂၀၂၆ နံၣ်, ခ့ၣ်အဲးစံၣ်
ခ့ၣ်အဲၣ်ယူၣ် ဘျံးဒဝဲၢ်ကီၢ်ရ့ၣ်(သုးက့ ၄)လၢၢ်မုၢ်လါကီၢ်ဆၣ်တၢ်ပၢ ပယီၤသုးကျိၤလၢအဟဲထီၣ်ဆူမစီၢ်(မဇော)ကရူၢ်ပူၤတဖၣ်အံၤ နုၥ်လီၤဒွဲၣ်အူအီၣ်ကမျၢၢ်ဟံၣ်,မၤသံကဒီးဝဲကမျၢၢ်(၂)ဂၤ အဂ့ၢ်န့ၣ် ကီၢ်ရ့ၣ်တၢ်ရ့လိၥ်ကမျၢၢ်ဒီးတၢ်ဘိးဘၣ်ရၤလီၤတၢ်ကစီၣ် ထုးထီၣ်ပၥ်ဖျါဝဲဖဲမဟါလါအီကူး ၃၁ သီအံၤ န့ၣ်လီၤ.
ဒ်ခ့ၣ်အဲၣ်ယူၣ်အတၢ်ပၥ်ဖျါပူၤအသိးန့ၣ် အပူၤကွံၥ်လါအီကူး ၂၇ သီအနံၤန့ၣ် သုးမိၤစိရိၤအသုးကျိၤလၢဟဲထီၣ်နုၥ်လီၤအိၣ်ဆိးဝဲ ဖဲမစီၢ်ကရူၢ်(မစော)ကရူၢ်အပူၤအံၤတဖၣ် မၤသံဝဲငယးအဲ(ငါးရပ်အင်း)သဝီဖိပိၥ်ခွါ(၂)ဂၤတကးဒံးဘၣ်အမဲၥ်ညါ ဒွဲၣ်အူအီၣ် ဃုၥ်ဝဲ တူၢ်ပၠီၣ်(တုံးဗျော)သဝီဖိအဟံၣ်(၈)ဖျၢၣ် န့ၣ်လီၤ.
တကးဒံးဘၣ်တၢ်ကဲထီၣ်သးဖဲန့ၣ်ဝံၤမုၢ်ဆ့ၣ်ထီၣ်လါအီကူး ၂၈ သီအနံၤန့ၣ် ပယီၤသုးသ့ၣ်တဖၣ်အံၤနုၥ်လီၤဒွဲၣ်အူအီၣ် ကဒီးဝဲ ထံလီၤသံးခံ(ရေးခမ်းချောင်း)သဝီဖိဟံၣ်တဖျၢၣ်န့ၣ်လီၤ. အဃိမ့ဘၣ်ကွၢ်လၢတၢ်ခံသီအတီၢ်ပူၤအံၤ ပယီၤသုးနုၥ်လီၤဒွဲၣ်အူအီၣ်က မျၢၢ်ဟံၣ်ပၥ်ဖှိၣ်ခဲလၢၥ်အိၣ်ဝဲ(၉)ဖျၢၣ်န့ၣ်လီၤ.
ဒ်န့ၣ်အသိးမစီၢ်(မဇော)ကရူၢ်ပူၤဒူသဝီ(၄)ဖျၢၣ်လၢအမ့ၢ် ထံလီၤသံးခံသဝီ, ငယးအဲသဝီ, တူၢ်ပၠီၣ်သဝီဒီး ဒူကၠီၣ်သဝီသ့ၣ်တဖၣ် လၢသုးမီၤစိရိၤနုၥ်လီၤမၤထီဒါပှၤဟီၣ်ခိၣ်ဖိခွဲးယၥ်တပယူၥ်ဃီအံၤ သုးမီၤစိရိၤပၥ်ပနီၣ်အီၤလၢအမ့ၢ်သုးတၢ်ပၢဟီၣ်ကဝီၤ (မာရှယ်လောစစ်အုပ်ချုပ်ရေး) အဂ့ၢ်န့ၣ် ခ့ၣ်အဲၣ်ယူၣ် စံးဝဲဒၣ်န့ၣ်လီၤ.
မစီၢ်(မဇော)ကရူၢ်ငယးအဲဒီးတူၢ်ပၠီၣ်သဝီလၢပယီၤသုးနုၥ်လီၤဒွဲၣ်အူအီၣ်ကမျၢၢ်ဟံၣ်,မၤသံဝဲကမျၢၢ်အံၤန့ၣ် တချုးတၢ်ကဲထီၣ်သးအံၤ ဒံးဘၣ်ဖဲလါအီကူး ၂၄ သီအနံၤန့ၣ် ပယီၤသုးလၢအိၣ်ဆီလီၤသးဖဲတူၢ်ပၠီၣ်သဝီဃၢၤအံၤတဖၣ် ဘၣ်တၢ်နုၥ်လီၤခးဒံးအဝဲသ့ၣ်လၢ ဟီၣ်ကဝီၤကညီဒီကလုၥ်ဂၢၤသးကရၢ(KNDO)သုးရ့ၣ်-၇ အပှၤဒီးဖဲန့ၣ်တၢ်မၤန့ၢ်ဒံးဝဲတၢ်စုကဝဲၤတဖၣ်ကဲထီၣ်ဒံးန့ၣ်လီၤ.
လၢတၢ်န့ၣ်အဃိ ပယီၤသုးအံၤလၢတၢ်နုၥ်လီၤခးအဝဲသ့ၣ်ဒီးမၤန့ၢ်ဝဲအတၢ်စုကဝဲၤအိၣ်ထီၣ်ဒ်အံၤအဖီခိၣ် ပညိၣ်ဖီၣ်မၤသံဝဲ ကမျၢၢ်ဒီးဒွဲၣ်အူအီၣ်ဝဲကမျၢၢ်အဟံၣ်အဃီ ဘၣ်ဟဲကဲထီၣ်ဝဲဒ်အံၤလီၤအဂ့ၢ်န့ၣ် တၢ်ပဲၥ်ထံနီၤဖးစံးဝဲဒၣ်န့ၣ်လီၤ.
(သုးက့ ၄)ဟီၣ်ကဝီၤအပူၤ စှၤလါအတီၢ်ပူၤအံၤလီၤဆီဒၣ်တၢ်ဒူသဝီကမျၢၢ်လၢအိၣ်ဘူး ဝဲဒီး ပယီၤသုးကျိၤအတၢ်ဟဲထီၣ် ဟူးဂဲၤတဖၣ်အံၤ ဘၣ်ဃ့ၢ်ပလဲၥ်သးတကးဒံးဘၣ် ဘၣ်ကွၢ်ဆၢၣ်မဲၥ်ဝဲတၢ်ဖီၣ်ဆူၣ် တၢ်မၤသံ မၤဝီ,တၢ်ဒွဲၣ်အူအီၣ်အဝဲသ့ၣ် အဟံၣ်အဃီဒီးတၢ်ဟံဆူၣ်ကွံၥ်အသိလ့ၣ်ယီၢ်ဃုၥ်ဒီးတၢ်ဖိတၢ်လံၤလၢလုၢ်ဒိၣ်ပှ့ၤဒိၣ် တဖၣ်ဟဲအိၣ်ထီၣ် ဝဲတပယူၥ်ဃီန့ၣ်လီၤ.