လါအီးကထိဘၢၣ် ၂၀ သီ, ၂၀၂၆ နံၣ်, ခ့ၣ်အဲးစံၣ်
ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ ဒူသထူၣ်ကီၢ်ရ့ၣ်(သုးက့ ၁)ကၠဲးထိၣ်ကီၢ်ဆၣ် (KNLA)တၢ်သမံသမိးတြဲၤတၢ်လီၢ်တတီၤ ပယီၤသုးလဲၤတ့ၢ်လီၤဝဲဒြိမ့ၣ်ပိၢ်တဘ့ၣ်အဂ့ၢ်န့ၣ် သ့ၣ်ညါဘၣ်လၢပှၤလၢဘူးဒီးတၢ်ပၢၢ်ဆၢကရူၢ်ကရၢတဖၣ် အအိၣ်န့ၣ်လီၤ.
ဖဲမဟါလါအီးကထိဘၢၣ် ၂၀ သီ ဟါခီ ၈း၄၈ မံးနံးအဆၢကတီၢ်န့ၣ် ပယီၤသုးခီၣ်ချ့သုးရ့ၣ်(ခမရ-၂၀၇) သုးရ့ၣ် အံၤပျၢ်ထီၣ် လဲၤတ့ၢ်လီၤဝဲ ဒြိတူၢ်သံသးတဘ့ၣ်လၢကၠီၣ်ယ့ၤတွ့ -သိခွးသဝီဘၢၣ်စၢၤ ကညီဒီကလုၥ်တၢ်ထူၣ်ဖျဲးသုး မုၢ်ဒိၣ်(KNLA) ကၠီၣ်ပိၤကၠံ တၢ်သမံသမိးတြဲၤအံၤန့ၣ်လီၤ.
ပှၤလၢဘူးဒီးတၢ်ပၢၢ်ဆၢကရူၢ်တဂၤ စံးဝဲလၢ “အလဲၤကွံၥ်လီၤဝဲဖဲန့ၣ်လီၤ.တမ့ၢ်ပှၤအိၣ်ခိးထၢစ့တြဲၤဘၣ် အိၣ်ဒၣ်ပှၤအိၣ်ခိးသမံသမိး တၢ်ဒ်န့ၣ်လီၤ. တၢ်ဘၣ်ဒိဘၣ်ထံးဒုတအိၣ်ဘၣ် အိၣ်ဒၣ်ဟးဂီၤတစဲးတမွဲးဖိဒ်န့ၣ်လီၤ. ”အဂ့ၢ်န့ၣ် စံးဘၣ်ခ့ၣ်အဲးစံၣ်-ကညီတၢ်ကစီၣ် ဖဲနံၤအံၤန့ၣ်လီၤ.
ဒ်လီၢ်ကဝီၤပှၤဘၣ်မူဘၣ်ဒါ စံးဝဲအသိးန့ၣ် ပှၤလၢအိၣ်ဝီၢ်က့တကပၤတဖၣ်မ့လဲၤဆူသ့ၣ်စ့ၣ်ယးဝ့ၢ်ပူၤန့ၣ် ဘၣ်လဲၤခီဖျိ ဝဲ ကၠီၣ်ပိၤကၠံတၢ်သမံသမိးတြဲၤအံၤအသိး တြဲၤအံၤအိၣ်စီၤစုၤယံၤဝဲဒီး(ခမရ-၂၀၇)တၢ်လီၢ်ထဲခံတၢၣ်ဧိၤလီၤ ဒီး တြဲၤအံၤအရ့ဒိၣ် ဝဲလၢသုးဂ့ၢ်ဝီတကပၤလၢခံခီခံကပၤအဂီၢ်အဂ့ၢ်န့ၣ် သ့ၣ်ညါဘၣ်န့ၣ်လီၤ.
ဖဲအပူၤကွံၥ်တနံၣ်အံၤ ၂၀၂၆ လါဖ့ၤဘြူၤအါရံၤအခါန့ၣ်စ့ၢ်ကီး လၢကဟဲထီၣ်ဒိၣ်စိဝဲဟီၣ်ကဝီၤဝဲန့ၣ်အဂီၢ် ပယီၤသုးဂံၢ် ဘါလၢတစှၤန့ၢ်ဝဲ(၅၀၀)ဃၣ်ဃၣ်အံၤဟဲထီၣ်နုၥ်လီၤ တၢ်ဒုးကဲထီၣ်ဝဲဒိၣ်ဒိၣ်မုၢ်မုၢ်ဒံးဒီးဟီၣ်ကဝီၤကညီဒီကလုၥ်တၢ်ထူၣ်ဖျဲးသုးမုၢ်ဒိၣ် (KNLA),(PDF)တၢ်ပၢၢ်ဆၢသုးပၥ်ဖှိၣ်ကရူၢ်တဖၣ်အံၤဒံးဒီးဖဲန့ၣ်ခီဖျိပယီၤသုးတူၢ်တန့ၢ်လၢၤဘၣ်အဃိဘၣ်ဂုၤကဒါက့ၤအလီၢ်ခံကဲထီၣ်ဒံး ဝဲဒၣ် န့ၣ်လီၤ.
ကၠဲးထိၣ်ကီၢ်ဆၣ်ပူၤ စးထီၣ်ဖဲလါစဲးပထ့ဘၢၣ် ၂၄ သီလီၢ်ခံန့ၣ် ပယီၤသုးအံၤသူဝဲဒၣ်ကဘီယူၤဒီး,ကျိဖးဒိၣ်,ဒြိပညိၣ်လဲၤခးလီၤ ဝဲတၢ်လၢတၢ်ပၢၢ်ဆၢကရူၢ်ကရၢအိၣ်ဆိးလီၢ်အခိၣ်အဃၢၤဟဲအါထီၣ်ဝဲဒီး တကးဒံးဘၣ်ကမျၢၢ်ဒူသဝီလၢအတၢ်ဘၣ်ထွဲ တအိၣ်ဝဲ ဒီးတၢ်ပၢၢ်ဆၢကရူၢ်ကရၢအံၤဘၣ်စ့ၢ်ကီး ခးလီၤဝဲတၢ်အိၣ်ဝဲကိးမုၢ်နံၤဒဲးဃၣ်ဃၣ်န့ၣ်လီၤ.
