လါယူၤ ၃ သီ, ၂၀၂၆ နံၣ်, ခ့ၣ်အဲးစံၣ်
ခ့ၣ်အဲၣ်ယူၣ် ဘျံးဒဝဲၢ်ကီၢ်ရ့ၣ်(သုးက့ ၄)တနီသရံၣ်ကီၢ်ဆၣ်ဟီၣ်ကဝီၤအပူၤ ပယီၤသုးကျိၤတဖၣ်ဟဲထီၣ်ဒီးနုၥ်လီၤဒွဲၣ်အူအီၣ် ကွံၥ်ဝဲ လီၢ်ကဝီၤကမျၢၢ်အဟံၣ်အဃီအမဲၥ်ညါဒွဲၣ်အူအီၣ်ဃုၥ်ဝဲတၢ်ဘူၣ်တၢ်ဘါ,ကၠိတၢ်သူၣ်ထီၣ်သ့ၣ်တဖၣ်အဂ့ၢ်န့ၣ် ကီၢ်ရ့ၣ်တၢ်ကစီၣ် ထုးထီၣ်ပၥ်ဖျါဝဲဖဲတနံၤအံၤဟါခီအဆၢကတီၢ်န့ၣ်လီၤ.
ဖဲအပူၤကွံၥ်လါမ့ၤ ၁၉ သီအနံၤ သုးမီၤစိရိၤဟဲက့ၤထီၣ်ဒိၣ်စိက့ၤမိဒီၢ်(မောတောင်)ဝ့ၢ်ပူၤဝံၤလီၢ်ခံ ပယီၤသုးကျိၤတဖၣ် ဟဲထီၣ်ဒီး နုၥ်လီၤဒွၣ်အူအီၣ်ဝဲတကီဖီလူၢ်သဝီပူၤတၢ်သူၣ်ထီၣ်တဖၣ်ဘၣ်ဟဲအိၣ်ထီၣ်ဝဲဒ်အံၤန့ၣ်လီၤ.
ပယီၤသုးကျိၤနုၥ်လီၤဒွဲၣ်အူအီၣ်တၢ်လၢတကီဖီလူၢ်သဝီပူၤဘျီဝဲအံၤန့ၣ် ဒွဲၣ်အူအီၣ်ဝဲကမျၢၢ်အဟံၣ်(၇)ဖျၢၣ်, တီၤတီကၠိ(၁)ဖျၢၣ်, ကၠိဖိဟံၣ်ဒွဲ(၁)ဖျၢၣ်, တၢ်ထုကဖၣ်ဒၢး(၁)ဖျၢၣ်,လံၥ်စီဆှံကၠိတၢ်သူၣ်ထီၣ်(၁)ဖျၢၣ်,တၢ်အိၣ်ဖှိၣ်ဟံၣ်(၁)ဖျၢၣ်ဒီးတၢ်အိၣ်ဖှိၣ်ဘျီၣ်ဒိၣ် (၁)ဖျၢၣ် ပၥ်ဖှိၣ်ခဲလၢၥ်(၇)ဖျၢၣ်အဂ့ၢ်န့ၣ် လံၥ်တၢ်ပၥ်ဖျါအပူၤ ပၥ်ဖျါဝဲန့ၣ်လီၤ.
ဒ်တၢ်ဂီၤတၢ်မၤနီၣ်ပူၤအိၣ်ဖျါဝဲအသိးန့ၣ် ဟံၣ်,ကၠိ,တၢ်ဘူၣ်တၢ်ဘါတၢ်သူၣ်ထီၣ်လၢတၢ်ဒွဲၣ်အူအီၣ်ကွံၥ်ဝဲသ့ၣ်တဖၣ်အံၤန့ၣ် အါဒၣ်တက့ၢ် မ့ၣ်အူအီၣ်ကွံၥ်ဝဲဒီတဖျၢၣ်အိၣ်တ့ၢ်က့ၤထဲအထူၣ်သ့ၣ်တဖၣ်လီၤအသိး တၢ်သူၣ်ထီၣ်အမဲၥ်ညါလၢမ့ၣ်အူအီၣ်တၢ် ဘျီဝဲအံၤစ့ၢ်ကီးပၣ်ဃုၥ်ဝဲသိလ့ၣ်(၂)ခိၣ်လၢသူအီၣ်တသ့လၢၤဘၣ်အဂ့ၢ်န့ၣ် သ့ၣ်ညါဘၣ်န့ၣ်လီၤ.
တကးဒံးဘၣ်ပယီၤသုးအံၤဖဲအဝဲသ့ၣ်နုၥ်လီၤဒွဲၣ်အူအီၣ်တၢ်အဆၢကတီၢ် ဟးဃုခွံခွးထုးထီၣ်ဝဲတၢ်ဖိတၢ်လံၤလၢကၠိဖိဟံၣ်ဒွဲ တၢ်သူၣ်ထီၣ်တဖျၢၣ်အပူၤဒီး တီၢ်လီၤပှီၢ်မၤဟးဂီၤဝဲတၢ်ဖိတၢ်လံၤတဖၣ်အဂ့ၢ်န့ၣ် ခ့ၣ်အဲၣ်ယူၣ် စံးဝဲန့ၣ်လီၤ.
တကီၢ်ခါခဲအံၤခီဖျိလၢပယီၤသုးကျိၤနုၥ်လီၤဟူးဂဲၤ ပၥ်ဝဲတၢ်ခးပနီၣ်ဆူကမျၢၢ်ထံဖိကီၢ်ဖိတကးဒံးဘၣ်အမဲၥ်ညါ ဒွဲၣ်အူအီၣ်ဃုၥ်ဝဲ ကၠိတၢ်သူၣ်ထီၣ်ဒီးတၢ်ဘူၣ်တၢ်ဘါတၢ်သူၣ်ထီၣ်ဒ်အံၤအဖီခိၣ် လီၢ်ကဝီၤကမျၢၢ်လၢအိၣ်ဘူးဖဲတၢ်ကဲထီၣ်သးအခိၣ်အဃၢၤအံၤ သ့ၣ်တဖၣ် အါဒၣ်တက့ၢ်န့ၣ်ဃ့ၢ်ထီၣ်ဟးအိၣ်ဝဲလၢတၢ်ဘံၣ်တၢ်ဘၢလီၢ်အဂ့ၢ်န့ၣ် သ့ၣ်ညါဘၣ်န့ၣ်လီၤ.
တနီသရံၣ်ကီၢ်အပူၤ ဖဲအပူၤကွံၥ်လါမ့ၤ ၃၁ အနံၤန့ၣ်စ့ၢ်ကီး ပယီၤသုးအံၤဟ့ၣ်ထီၣ်ဝဲတၢ်ဂ့ၢ်လၢပှၤသ့ၣ်တဖၣ်အံၤ ပၥ်ဖှိၣ်မၤသကိး တၢ်ဒီးတၢ်ပၢၢ်ဆၢကရူၢ်အဃိ ဖီၣ်မၤဒၢၣ်မၤပယွဲမၤဆါဝဲမိဒီၢ်(မောတောင်)ဝ့ၢ် ကမျၢၢ်(၃)ဂၤလၢအပၣ်ဃုၥ်ဝဲပိၥ်မုၣ်တဂၤ ပှၤသ့ၣ်တဖၣ်အံၤ တကးဒံးဘၣ်ဖီၣ်မၤဒၢၣ်ဝဲကမျၢၢ်ပိၥ်ခွါတဂၤလၢကနဲၣ်ပၠးဝဲကျဲအဂီၢ်အံၤကဲထီၣ်ဒံးဝဲန့ၣ်လီၤ.
ခ့ၣ်အဲၣ်ယူၣ် ဘျံးဒဝဲၢ်ကီၢ်ရ့ၣ်ပူၤ အပူၤကွံၥ်လၢညါကျိဖးဒိၣ်,ကဘီယူၤမ့ၣ်ပိၢ်အမဲၥ်ညါ လၢပျီပူၤစ့ၢ်ကီးပယီၤသုးကျိၤအံၤညီနုၢ် အဝဲသ့ၣ်မ့ဟဲထီၣ်ဟူးဂဲၤလံန့ၣ် နုၥ်လီၤလၢကမျၢၢ်ဒူသဝီပူၤ ဟးဃုခွံခွးသမံသမိးတၢ်ဝံၤဒွဲၣ်အူအီၣ်ဝဲကမျၢၢ်အတၢ်သူၣ်ထီၣ် တကးဒံးဘၣ် ဖီၣ်မၤဒၢၣ်, မၤသံမၤဝီဝဲပှၤကမျၢၢ် ကဲထီၣ်အိၣ်ဝဲတလီၢ်လီၢ်အဂ့ၢ်န့ၣ် ကီၢ်ရ့ၣ်တၢ်မၤနီၣ်တၢ်ပၥ်ဖျါအပူၤ သ့ၣ်ညါဘၣ် န့ၣ်လီၤ.
