လါယူၤလံ ၂၃ သီ, ၂၀၂၆ နံၣ်, ခ့ၣ်အဲးစံၣ်
ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ မုၢ်တြီၢ်ကီၢ်ရ့ၣ်(သုးက့ ၅)ဟီၣ်ကဝီၤ လါယူၤလံ ၁ သီတုၤ ၁၅ သီ လါတဝၥ်အတီၢ်ပူၤ ဟီၣ်ကဝီၤကညီဒီကလုၥ်တၢ်ထူၣ်ဖျဲးသုးမုၢ်ဒိၣ်(KNLA)ဒီးပယီၤသုးအဘၢၣ်စၢၤ တၢ်ဒုးကဲထီၣ်ဝဲ(၃၈)ဘျီအဂ့ၢ်န့ၣ် ကီၢ်ရ့ၣ်တၢ်ကစီၣ် ထုးထီၣ်ပၥ်ဖျါဝဲဖဲ ၁၆ သီအနံၤန့ၣ်လီၤ.
လၢတၢ်(၁၅)သီအတီၢ်ပူၤန့ၣ် ပယီၤသုးတကပၤသံဝဲ(၁၂)ဂၤ, ဘၣ်ဒိဘၣ်ထံးဝဲ(၃၁)ဂၤအကျါပၣ်ဃုၥ်ဝဲသုးရ့ၣ်ခိၣ်-၂ တဂၤဒီး ပယီၤသုးအသိလ့ၣ်ဟးဂီၤစ့ၢ်ကီးဝဲ(၄)ခိၣ်အဂ့ၢ်န့ၣ် သ့ၣ်ညါဘၣ်န့ၣ်လီၤ.
ဒ်န့ၣ်အသိးလၢတၢ်ဒုးဘျီဝဲန့ၣ်အပူၤ ပယီၤသုးတကပၤတၢ်သံတၢ်ဘၣ်ဒိဘၣ်ထံးမ့အါဝဲဘၣ်ဆၣ် မ့မ့ၢ်လၢဟီၣ်ကဝီၤ(KNLA) သုးပၥ်ဖှိၣ် တကပၤခီန့ၣ် တၢ်ဘၣ်ဒိဘၣ်ထံးအိၣ်ဝဲတဆံးတက့ၢ်လီၤအဂ့ၢ်န့ၣ် လံၥ်တၢ်ပၥ်ဖျါအပူၤ ပၥ်ဖျါဝဲန့ၣ်လီၤ.
ဟီၣ်ခိၣ်မဲၥ်ဖံးခိၣ်တၢ်ဒုးအမဲၥ်ညါ လၢလါယူၤလံတဝၥ်အတီၢ်ပူၤအံၤစ့ၢ်ကီး ပယီၤသုးအံၤသူဝဲဒၣ်ကဘီယူၤ(၉)ဘျီ, ဒြိ(၁)ဘျီ ဒီး ခးလီၤဝဲကျိဖးဒိၣ်(၅)ဘျီန့ၣ်လီၤ.
ဒီးလၢကျိဖးဒိၣ်,ဒြိဒီးကဘီယူၤအံၤအဃိ ကမျၢၢ်ဘၣ်ဒိဘၣ်ထံးဝဲ(၅)ဂၤဒီး ဟံၣ်တၢ်သူၣ်ထီၣ်(၁၂)ဖျၢၣ်ဒီး သီခါဖၠၣ်တၢ်သူၣ်ထီၣ်ဟး ဂီၤဝဲအဂ့ၢ်န့ၣ် စံးဝဲန့ၣ်လီၤ.
(သုးက့ ၅)ဟီၣ်ကဝီၤအပူၤ အပူၤကွံၥ်လါယူၤတလါအတီၢ်ပူၤန့ၢ်စ့ၢ်ကီး ပယီၤသုးဒီးဟီၣ်ကဝီၤ(KNLA) သုးပၥ်ဖှိၣ်အဘၢၣ်စၢၤ တၢ်ဒုးကဲထီၣ်ဝဲ(၇၈)ဘျီဒီး ဖဲန့ၣ်ပယီၤတကပၤသံ(၂၃)ဂၤ,ဘၣ်ဒိဘၣ်ထံး(၅၄)ဂၤကဲထီၣ်ဒံးဝဲန့ၣ်လီၤ.
ဒ်န့ၣ်အသိးလၢတၢ်တလါန့ၣ်အတီၢ်ပူၤစ့ၢ်ကီးခီဖျိလၢကဘီယူၤ,ဒြိ,ကျိဖးဒိၣ်အဃိ ကမျၢၢ်သံ(၂)ဂၤ,ဘၣ်ဒိဘၣ်ထံး(၃)ဂၤဒီး ဟံၣ်(၁၂)ဖျၢၣ်,သီခါဖၠၣ်တၢ်သူၣ်ထီၣ်(၆)ဖျၢၣ် ပၥ်ဖှိၣ်ခဲလၢၥ်(၁၈)ဘၣ်ဒိဘၣ်ထံးဟးဂူၥ်ဟးဂီၤကဲထီၣ်ဒံးဝဲန့ၣ်လီၤ.
မုၢ်တြီၢ်ကီၢ်ရ့ၣ်ဟီၣ်ကဝီၤလၢကမျၢၢ်ထံဖိကီၢ်ဖိသဂၢၢ်ဘၣ်တၢ်သံတၢ်ပှၢ်,တၢ်ဘၣ်ဒိဘၣ်ထံးဒီးတၢ်ဟးဂူၥ်ဟးဂီၤ ကိးလါဒဲးဃၣ်ဃၣ် အံၤန့ၣ် တုၤလၢခဲအံၤဒုးယၤတၢ်ဖ့ၣ်စၢဆဲးကဲထီၣ်ဝဲဒံးဝဲလၢပယီၤသုးဒီး(KNLA)သုးပၥ်ဖှိၣ်အဘၢၣ်စၢၤအဖၢမုၢ်န့ၣ်လီၤ.
