လါစဲးပထ့ဘၢၣ် ၂သီ, ၂၀၂၆နံၣ်, ခ့ၣ်အဲးစံၣ်,
ကီၢ်ကၠီၣ်တဲၣ်-ကီၢ်ပယီၤကီၢ်ဆၢ တးကီၢ်ရ့ၣ် ထၣ်ဆီၣ်ယါ ကီၢ်ဆၣ် မဲၢ်လးကညီဘၣ်ကီဘၣ်ခဲဒဲကဝီၤ အကဝီၤဒ့တနီၤ အပူၤ တၢ်စးထီၣ်မၤဝဲ တၢ်ထီထီၣ် ထံ(မံထၢၣ်)နီၣ်ထိၣ်လံအဂ့ၢ်, သ့ၣ်ညါဘၣ်လၢ ဒဲကဝီၤဖိဒီး ပှၤဘၣ်မူဘၣ်ဒါတဖၣ် အအိၣ် န့ၣ်လီၤ.
ထံ(မံထၢၣ်)နီၣ်ထိၣ် အတၢ်ရဲၣ်တၢ်ကျဲၤအံၤ ပညိၣ်ဝဲလၢ တၢ်ကဘၣ်မၤဝဲဒဲကဝီၤဒီတဘ့ၣ်ပတီၢ်ဒီး တၢ်ရဲၣ်ကျဲၤ ပၥ်လီၤ ထီထီၣ်ဝံၤအလီၢ်ခံ, ပှၤဒဲကဝီၤဖိတဖၣ် ကဘၣ်စးထီၣ်ဟ့ၣ်ဝဲ တၢ်သူထံအလုၢ်အပှ့ၤဒ်တၢ်ပၥ်ပနီၣ်ဝဲအသိး အဂ့ၢ်, မဲၢ်လး ဒဲကဝီၤ ဂ့ၢ်ဝီ မူဒါခိၣ် စံးဝဲဒ် အံၤန့ၣ်လီၤ.
“ထံမံၣ်ထၢၣ်န့ၣ်ခဲအံၤ စးထီၣ်လံ အရဲၣ်ကျဲၤဝဲန့ၣ်ပှၤလၢအကဟံထံ မံထၢၣ်သ့ၣ်တဖၣ်န့ၣ် ကဘၣ်ထုးထီၣ်ဝဲ ထံမံထၢၣ်အပှ့ၤ(၇၅၀)ဘးန့ၣ်လီၤ. ဝံၤအလီၢ်ခံတမံထၢၣ်န့ၣ် တၢ်ကဘၣ်ဟ့ၣ်ဝဲ (၁၀)ဘးဒီး ထံတမံထၢၣ်(၁၀)ဘး အံၤကဒိးန့ၢ်ဘၣ်ဝဲထံ(၅)ပံၤပၤန့ၣ်လီၤ. တၢ်ထီထီၣ်ဒဲကဝီၤပူၤမ့ဝံၤလၢၥ်န့ၣ် ဒဲကဝီၤအပူၤအံၤဘၣ်ဃးဒီးထံ တၢ်ဆီၣ် ထွဲမၤစၢၤယဆိကမိၣ်လၢတအိၣ်လၢၤဘၣ်.”န့ၣ်လီၤ.
မဲၢ်လးဒဲကဝီၤအပူၤ တကီၢ်ခါခဲအံၤ တၢ်စးထီၣ်ထီဝဲထံ(မံထၢၣ်)နီၣ်ထိၣ်ထဲကဝီၤဒိၣ် (zone) ကဝီၤဒ့ (A-5) တတီၤ အဂ့ၢ်, သ့ၣ်ညါဘၣ်န့ၣ်လီၤ.
တၢ်ထီထီၣ် ထံမံထၢၣ် အဖီခိၣ် ဒဲကဝီၤဖိတဂၤစံးစ့ၢ်ကီးဝဲလၢ “လၢ(A5)တကပၤပှၤစးထီၣ်လံဘၣ်ဆၣ်ဖဲယအိၣ်ကဝီၤဒ့ပှၤတစးထီၣ်ဘၣ်ဒံးဘၣ်.ပှၤတဲလၢပှၤမၤမ့ဝံၤလၢၥ်ပကဘၣ်ဟ့ၣ်တမံထၢၣ်(၁၀)ဘးန့ၣ်လီၤ.ဒ်လဲၣ်ဂ့ၤဒ်လဲၣ်ဂ့ၤဖဲပှၤကပၥ်လီၤန့ၢ်ပှၤပဘၣ်ဟ့ၣ်လီၤဝဲလီၤ.ပမၤတဘၣ်ဘၣ်.ယဲယဟံၣ်ပှၤဟးမၤတၢ်ဆူတၢ်ချၢတသ့နီတဂၤဒံး ဒီးဒဲကဝီၤပူၤ တၢ်အိၣ်သးဒ်အံၤ အဃိ ပဘၣ်သူပံၢ်ဒံးဝဲန့ၣ်လီၤ.” အဂ့ၢ်စံးဝဲန့ၣ်လီၤ.
ကီၢ်ကၠီၣ်တဲၣ်-ကီၢ်ပယီၤ ကီၢ်ဆၢ ဘၣ်ကီဘၣ်ခဲဒဲကဝီၤတဖၣ်အပူၤ (IRC)တၢ်ဆီၣ်ထွဲမၤစၢၤတအိၣ်လၢၤဘၣ်အလီၢ်ခံ မဲၢ်လးဒဲကဝီၤအံၤ ဘှါရှဲဝဲ ထံတၢ်လၢၥ်ဘူၣ်လၢၤစ့ၤတၢ်ဂ့ၢ်ကီလၢတၢ်ထၢဝဲ ပှၤဒဲကဝီၤဖိတဖၣ်နီၢ်တဂၤထံလဲ(၆)ဘးအဂ့ၢ် သ့ၣ်ညါဘၣ်န့ၣ်လီၤ.
ဒီးဖဲတၢ်ထၢပှၤဒဲကဝီၤဖိနီၢ်တဂၤ(၆)ဘးအဆၢကတီၢ် တၢ်ဘၢၣ်စၢၤ ‘ဂံၢ်ခီၣ်ထံးတၢ်ကရၢကရိတဖၣ် အတၢ်ဆီၣ် ထွဲမၤစၢၤ အိၣ်ထီၣ်တဘျီလၢ်လၢ်အခါ တၢ်ပတုၥ်ဃၥ်ဝဲ တၢ်ထၢပှၤဒဲကဝီၤဖိ ထံလဲ အဖီခိၣ်, ဒဲကဝီၤဖိတဖၣ်အံၤ ဘၣ်ဟ့ၣ်ထံလဲ အိၣ်ဒၣ်ထဲ (၂)လါ ဃၣ်ဃၣ်ဒံးလီၤအဂ့ၢ် သ့ၣ်ညါဘၣ်န့ၣ်လီၤ.
တကတီၢ်ဃီ,ဒဲကဝီၤပူၤဘၣ်ဃးဒီးတၢ်သူထံအံၤ တၢ်ကိၢ်ခါကတီၢ် တၢ်ဘၣ်ယိၣ်အိၣ်ဝဲအဃိ, တကီၢ်ခါခဲအံၤ တၢ်စးထီၣ်ရဲၣ်ကျဲၤဝဲလၢ ဟံၣ်ကိးဖျၢၣ် ကမၤဝဲတၢ်ထီထံ(မံထၢၣ်)ဒ်ကၠီၣ်တဲၣ်ပူၤဒူသဝီတဖၣ် သူဝဲထံအကျိၤအကျဲအဂ့ၢ်, ဒဲကဝီၤပှၤဘၣ်မူဘၣ်ဒါတဖၣ်စံး ဝဲန့ၣ်လီၤ.
ဒ်န့ၣ်အသိး, တကီၢ်ခါခဲအံၤ တၢ်စူၤခါအဆၢကတီၢ် ပှၤတနီၤဟံးန့ၢ်သူဝဲထံလၢ ပှၤဒဲကဝီၤဖိကဒဲကဒဲဆဲးထီၣ် ရၤလီၤ အီၤလၢ ကစၢၢ်ထံအိၣ်ဝဲဘၣ်ဆၣ်, တၢ်ကိၢ်ခါကတီၢ် တၢ်ဂ့ၢ်ကီအိၣ်ထီၣ်ဝဲသ့အဃိ, ဖဲတၢ်ရဲၣ်ကျဲၤမၤလီၤထံမံထၢၣ် အဖၢမုၢ်ပှၤဒဲကဝီၤဖိတဖၣ် ကဆိမိၣ်မၤလီၤတံၢ်ဆၢတဲၥ်လီၤသး အဂ့ၢ် ပှၤဘၣ်မူဘၣ်ဒါတဖၣ်ဆီၣ်တခူဝဲန့ၣ်လီၤ.
