လါအီးကထိဘၢၣ် ၂၀ သီ, ၂၀၂၆ နံၣ်, ခ့ၣ်အဲးစံၣ်
ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ မုၢ်တြီၢ်ကီၢ်ရ့ၣ်(သုးက့ ၅)ဟီၣ်ကဝီၤ လါအီးကထိဘၢၣ် ၁ သီတုၤလၢ ၁၅ သီ လၢ လါတဝၥ်အတီၢ်ပူၤ ပယီၤသုးဒီးဟီၣ်ကဝီၤကညီဒီကလုၥ်တၢ်ထူၣ်ဖျဲးသုးမုၢ်ဒိၣ်(KNLA)အဘၢၣ်စၢၤ တၢ်ဒုးကဲထီၣ်ဝဲ(၆၁)ဘျီ အဂ့ၢ်န့ၣ် ကီၢ်ရ့ၣ်တၢ်ကစီၣ်ထုးထီၣ်ပၥ်ဖျါဝဲဖဲမဟါအနံၤန့ၣ်လီၤ.
ဒ်ကီၢ်ရ့တၢ်မၤနီၣ်စရီပူၤအသိးန့ၣ်လၢ(၁၅)သီ တၢ်ဒုးကဲထီၣ်(၆၁)ဘျီအတီၢ်ပူၤအံၤန့ၣ် ပယီၤသုးသံ (၁၄)ဂၤ,ဘၣ်ဒိဘၣ်ထံးဝဲ(၁၅)ဂၤ ဒီး ဘၣ်ဒိဘၣ်ထံးတဖၣ်အကျါပၣ်ဃုၥ်ဝဲ သုးခိၣ်ဒိၣ်ဂီၢ်ဂ့ၢ်(၁)ဂၤဒီး သုးခိၣ်ဖိ(၁)ဂၤအဂ့ၢ်န့ၣ် သ့ၣ်ညါဘၣ်န့ၣ်လီၤ.
တကးဒံးဘၣ်လၢန့ၣ်အမဲၥ်ညါကျိဖးဒိၣ်,ကဘီယူၤ,ဒြိလၢပယီၤသုးသူဝဲကိးမုၢ်နံၤဒဲးန့ၣ် လဲၤတ့ၢ်လီၤဝဲဒြိမ့ၣ်ပိၢ်(၃)ဘျီ, ခးလီၤဝဲ(၁၂၀ မမ),(၁၂၂ မမ) ကျိဖးဒိၣ်ဆူကမျၢၢ်ဒူသဝီ, တၢ်ဖံးအီၣ်မၤအီၣ်လီၢ်ကျဲပၥ်ဖှိၣ်အိၣ်ဝဲ (၂၃)ဘျီန့ၣ်လီၤ.
ဒီးလၢဒြိဒီးကဘီယူၤ,ကျိဖးဒိၣ်သ့ၣ်တဖၣ်အံၤအဃိ ဟီၣ်ကဝီၤဖဲန့ၣ်အပူၤအါဒၣ်တက့ၢ်ကိးလါဒဲးဃၣ်ဃၣ် သဂၢၢ်ဘၣ်ဝဲ တၢ်ဘၣ် ဒိဘၣ်ထံး,တၢ်ဟးဂူၥ်ဟးဂီၤ အိၣ်ဝဲထီဘိန့ၣ်လီၤ.
ဘၣ်ဆၣ်လီၤဆီဒၣ်တၢ်လၢလါအီးကထိလါတဝၥ်အတီၢ်ပူၤအံၤ ကျိဖးဒိၣ်,ဒြိတၢ်ထီၣ်ဒုးအဘျီနီၣ်ဂံၢ်သ့ၣ်တဖၣ်တၢ်ပၥ်ဖျါထီၣ်ဝဲမ့ အိၣ်ဘၣ်ဆၣ် ဘၣ်ဃးတၢ်ဘၣ်ဒိဘၣ်ထံး,တၢ်ဟးဂူၥ် ဟးဂီၤတၢ်အိၣ်သးတဖၣ်ခီန့ၣ် ထံၣ်ဘၣ်လၢတၢ်ထုးထီၣ်ပၥ်ဖျါဃုၥ်ဝဲ တအိၣ်ဝဲဘၣ်န့ၣ်လီၤ.
(သုးက့ ၅)ဟီၣ်ကဝီၤလၢတၢ်ဒုးကဲထီၣ်ဝဲတပယူၥ်ဃီအံၤ အပူၤကွံၥ်လါစဲးပထ့ဘၢၣ်တလါအတီၢ်ပူၤန့ၣ်စ့ၢ်ကီး တၢ်ဒုးကဲထီၣ်ဝဲ (၁၀၆)ဘျီ ပယီၤသုးသံဝဲ(၄၇)ဂၤ, ဘၣ်ဒိ(၂၇)ဂၤဒီး ဒ်န့ၣ်အသိးပှၤဘၣ်ဒိဘၣ်ထံးသ့ၣ်တဖၣ်အံၤအကျါပၣ်ဃုၥ်ဝဲ သုးဒ့ခိၣ်(၁)ဂၤဒီး သုးခိၣ်ဖိ(၁)ဂၤ ကဲထီၣ်ဒံးဝဲန့ၣ်လီၤ.
တကီၢ်ခါခဲအံၤဟီၣ်ကဝီၤပူၤဖဲန့ၣ်အပူၤ ဖၣ်ပူၣ်ဟီၣ်ကဝီၤအမဲၥ်ညါ လၢကမၤမိၢ်-ကတၢတံၥ်ဘၢၣ်စၢၤ ထံဆီမဲဟီၣ်ကဝီၤအပူၤန့ၣ် ဒုးယၤတၢ်ဖ့ၣ်စၢဆဲးဆူၣ်ထီၣ်ဝဲအသိး ကျိဖးဒိၣ်,ကဘီယူၤ,ဒြိလၢပယီၤသုးပၥ်ဂံၢ်ပၥ်ဘါဝဲအံၤ သူဒံးဝဲတပယူၥ်ဃီအဂ့ၢ်န့ၣ် (သုးက့ ၅) ပှၤကတိၤတၢ်ပၢ ပဒိၣ်စီၤထိၣ်ရီၤဘ့ၤ စံးဝဲန့ၣ်လီၤ.
“အခဲအံၤပယီၤသုးကျိၤန့ၣ်သူဝဲဒၣ် ခံနံၤတဘျီ သၢနံၤတဘျီ တဘျီတခီၣ်န့ၣ်မၤဝဲဆဲးတဲးလၢကျိဒိၣ်,ကျိဖိ, ကဘီယူၤမ့ဝံၤ ဒြိသ့ၣ် တဖၣ်န့ၣ် သူဝဲကိးမုၢ်နံၤဒဲးလီၤ. မ့မ့ၢ်အသုးကျိၤခီန့ၣ်ဒ်သိးပတဲအသိးလီၤအတၢ်အိၣ်ဆူၣ်အိၣ်ချ့တဂ့ၤဘၣ် လၢသးသဟီၣ် မ့ၢ်ဂ့ၤ, လၢဂံၢ်ဘါမ့ၢ်ဂ့ၤ,ကံၢ်စီတကပၤ,တၢ်တူၢ်ခီၣ်ပၥ်သးမ့ၢ်ဂ့ၤတၢ်အိၣ်သးတဂ့ၤလၢၤဘၣ်.အိၣ်ဒၣ် မၤဆူၣ်ဝဲလၢတၢ်စုဆူၣ် ခီၣ်တကးလၢ ကျိဒိၣ်,ကဘီယူၤသ့တဖၣ်န့ၣ်လီၤ.ဖဲယတဲတၢ်ဒီးနၤခဲအံၤတၢ်သီၣ်လဲးလိးလီၤလၢန့ၣ်တကပၤန့ၣ်.”အဂ့ၢ်န့ၣ် စံးဘၣ်ခ့ၣ်အဲးစံၣ်-ကညီတၢ်ကစီၣ်ဖဲတနံၤအံၤန့ၣ်လီၤ.
(သုးက့ ၅)ဟီၣ်ကဝီၤအမဲၥ်ညါ လၢအတပၣ်ဃုၥ်ဝဲ(သုးက့ ၇)ဟီၣ်ကဝီၤဘၣ်အံၤ ကီၢ်ရ့ၣ်/သုးက့လၢအဂၤခဲလၢၥ်ဃၣ်ဃၣ် သုးမီၤစိရိၤအံၤလၢကထီၣ်ဒိၣ်စိက့ၤ ဟီၣ်ကဝီၤလၢတၢ်ပၢၢ်ဆၢထီၣ်န့ၢ်ဒိၣ်စိဝဲတဖၣ်အဂီၢ်န့ၣ် ဂုၥ်ကျဲးစၢးဆှၢထီၣ်သုးဂံၢ်ဘါအဃိ ဒုးယၤတၢ်ဖ့ၣ်စၢကဲထီၣ်ဝဲလၢခံခီခံကပၤအဘၢၣ်စၢၤန့ၣ်လီၤ.
