ကျိဖးဒိၣ်လီၤတဲာ်လၢသီခါဖၠၣ်ကၠိဖီခိၣ်အဃိဘၣ်ဒိ၀ဲကၠိသရၣ်မုၣ်တဂၤဒီးကၠိဖိတဂၤ

လါဒံၣ်စ့ဘၢၣ် ၇ သီႇ ၂၀၂၂ နံၣ်ႇ ခ့ၣ်အဲးစံၣ်

လၢကညီကီၢ်စဲၣ် ကီးတရံး၀့ၢ်ကလံၤထံး ဖဲမဟါလါဒံၣ်စ့ဘၢၣ် ၆ သီ မုၢ်ထူၣ် ၁၂ နၣ်ရံၣ်ဘျဲၣ်အဆၢကတီၢ် ခီဖျိပယီၤသုးခးလီၤကျိဖးဒိၣ်လီၤတဲာ်ပိၢ်ဖးထီၣ်လၢ(မီမၣ်)သ၀ီသီ သီခါဖၠၣ်ကၠိဖီခိၣ်အဃိ ဘၣ်ဒိ၀ဲကၠိသရၣ်မုၣ်တဂၤဒီးၦၤကၠိဖိတဂၤအဂ့ၢ်န့ၣ် လီၢ်က၀ီၤကမျၢၢ်စံး၀ဲန့ၣ်လီၤႉ

ပယီၤသုးလၢအိၣ်ကီးတရံး၀့ၢ်ပူၤတဖၣ်ခီဖျိအ၀ဲသ့ၣ်ခးလီၤကျိဖးဒိၣ်ဆူသ၀ီပူၤလၢတၢ်ဒုးကဲထီၣ်တအိၣ်ဘၣ်အံၤအဃိကၠိသရၣ်မုၣ်(၃၀)နံၣ်တဂၤဒီးၦၤကၠိဖိပိာ်ခွါ(၇)နံၣ်တဂၤဘၣ်ဒိ၀ဲအဂ့ၢ်န့ၣ်သ၀ီဖိတဂၤစံး၀ဲဒ်အံၤန့ၣ်လီၤႉ

မီမၣ်သ၀ီသီ သ၀ီဖိတဂၤစံး၀ဲ“ကျိဖးဒိၣ်လီၤတဲာ်သၢဖျၢၣ်ႇအ၀ဲတဖျၢၣ်န့ၣ်လီၤတဲာ်လိၤလိၤလၢကၠိခိၣ်လီၤမီၤနီၤႉ မ့မ့ၢ်အ၀ဲခံဖျၢၣ်ခီန့ၣ်လီၤတဲာ်လၢကၠိကပၤႉကိညၢ်ဒံးဘၣ်ဖဲၦၤအိၣ်ဘှံးအီၣ်မုၢ်ထူၣ်တၢ်အီၣ်အခါႉဘၣ်၀ဲဒၣ်သရၣ်မုၣ်တဂၤဒီးၦၤကၠိဖိတဂၤမီၤနီၤႉၦၤကၠိဖိတဂၤခီန့ၣ်ဘၣ်၀ဲအစုႉမ့မ့ၢ်သရၣ်မုၣ်ခီန့ၣ်ဘၣ်၀ဲအမဲာ်သၣ်ႇအစုတဖၣ်လီၤ”အဂ့ၢ်န့ၣ်စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ

တကးဒံးဘၣ်လၢန့ၣ်အမဲာ်ညါပယီၤသုးမၤတၢ်ဒ်အံၤမ့ၢ်တၢ်ဖံးတၢ်မၤတခါလၢအအၢအသီဒိၣ်မးအဂ့ၢ်န့ၣ် မီမၣ်သ၀ီသီ သ၀ီဖိတဖၣ်စံး၀ဲန့ၣ်လီၤႉ

ဖဲအပူၤကွံာ်စှၤသီအခါစ့ၢ်ကီးပယီၤသုးလၢအိၣ်ကီးတရံး၀့ၢ်ပူၤတဖၣ်ခးတပျုာ်တပျီာ်ကျိဖးဒိၣ်အဃိ ကျိဖးဒိၣ်လီၤတဲာ်ပိၢ်ဖးထီၣ်လၢခူၣ်ဒိၤသ၀ီဒီးဘီၣ်ဒဲသ၀ီပူၤကဲထီၣ်တ့ၢ်အသးဒံးအဂ့ၢ်န့ၣ် လီၢ်က၀ီၤကမျၢၢ်စံး၀ဲန့ၣ်လီၤႉ

တကီၢ်ခါခဲအံၤပယီၤသုးနုာ်လီၤမၤဒုးယၤတၢ်ဟူးတၢ်ဂဲၤဟဲအါထီၣ်၀ဲဒီးဖဲမဟါလါနိၣ်၀့ဘၢၣ် ၆ သီအနံၤစ့ၢ်ကီး ပယီၤသုးနုာ်လီၤလၢကီးတရံးကလံၤထံး(ကီးနွဲၣ်)သ၀ီပူၤကအိၣ်စှၤနၢ်ရံၣ်၀ံၤက့ၤကဒါ၀ဲဆူ၀့ၢ်ပူၤအဂ့ၢ်န့ၣ် သ့ၣ်ညါဘၣ်လၢ(ကီးနွဲၣ်)သ၀ီဖိတဖၣ်အအိၣ်န့ၣ်လီၤႉ