ခီဖျိပယီၤသုးခးလီၤဒံးကျိဖးဒိၣ်အဃိ ချၢၣ်လွံၢ်ထူၣ်လီၢ်က၀ီၤကမျၢၢ်က့ၤလၢဟံၣ်တဘူၣ်ဒံးဘၣ်

လါယူၤလံ ၁၁ သီႇ ၂၀၂၃ နံၣ်ႇ ခ့ၣ်အဲးစံၣ်

လၢခ့ၣ်အဲၣ်ယူၣ်–ကညီဒီကလုာ်စၢဖှိၣ်ကရၢ(သုးက့ ၃)တၢ်ပၢဟီၣ်က၀ီၤ ချၢၣ်လွံၢ်ထူၣ်ကီၢ်ရ့ၣ်အပူၤ စးထီၣ်ဖဲလါယူၤလံထီၣ်တုၤလၢခဲအံၤတစုခီဖျိပယီၤသုးခးလီၤဒံးကျိဖးဒိၣ်လၢသ၀ီပူၤအဃိလီၢ်က၀ီၤကမျၢၢ် က့ၤလၢဟံၣ်တဘူၣ်ဒံးဘၣ်အဂ့ၢ်န့ၣ် သ့ၣ်ညါဘၣ်လၢလီၢ်က၀ီၤဂံၢ်ခီၣ်ထံးတၢ်ကစီၣ်အအိၣ်န့ၣ်လီၤႉ

တလါအံၤလါယူၤလံထီၣ် ၁ သီ တုၤလၢ ၅ သီအနံၤ တၢ်ဒုးကဲထီၣ်၀ဲလၢကညီဒီကလုာ်တၢ်ထူၣ်ဖျဲးသုးမုၢ်ဒိၣ်(KNLA) သုးပာ်ဖှိၣ် ဒီးပယီၤသုးအဘၢၣ်စၢၤအိၣ်၀ဲ(၉)ဘျီ၀ံၤလီၢ်ခံ ခီဖျိပယီၤသုးခးလီၤကျိဖးဒိၣ်ဆူချၢၣ်လွံၢ်ထူၣ်ကီၢ်ရ့ၣ် ယ့ၤတွ့ကိႇညီၤကိႇသပၠ့ၤကိႇယၤမၠိအီၤႇအိၣ်စှ့ၣ်ကိသ၀ီပူၤအဃိ လီၢ်က၀ီၤကမျၢၢ်သံ(၂)ဂၤဒီးဘၣ်ဒိ၀ဲ(၆)ဂၤအဂ့ၢ်န့ၣ် ခ့ၣ်အဲၣ်ယူၣ်လီၢ်ခၢၣ်သးထုးထီၣ်ပာ်ဖျါ၀ဲဖဲလါယူၤလံ ၇ သီအနံၤန့ၣ်လီၤႉ

ဒ်န့ၣ်အသိးခီဖျိပယီၤသုးခးလီၤကျိဖးဒိၣ်အဃိလီၢ်က၀ီၤကမျၢၢ်ဘၣ်ဃ့ၢ်ထီၣ်အဂၤ(၄၀၀၀)ဃၣ်ဃၣ်ညါဒီး တုၤလၢခဲအံၤတစုခီဖျိပယီၤသုးခးလီၤဒံးကျိဖးဒိၣ်အဃိကမျၢၢ်သ့ၣ်တဖၣ်အံၤက့ၤအိၣ်လၢအဟံၣ်အဃီသ၀ီပူၤတဘူၣ်ဒံး၀ဲဘၣ်အဂ့ၢ်န့ၣ် လီၢ်က၀ီၤကမျၢၢ်ပိာ်ခွါတဂၤ စံး၀ဲဒ်အံၤန့ၣ်လီၤႉ

“ၦၤ(ယၤမၠိအီၤ)တဖၣ်န့ၣ်လဲၤစံၣ်အိၣ်လၢ(ယ့ၤတွ့ကိ)ႇ(အိၣ်စှ့ၣ်ကိ)သ၀ီတကပၤန့ၣ်မီၤနီၤႉခဲအံၤဖဲန့ၣ်နါက့ကျိဖးဒိၣ်လီၤတဲာ်အဃိအ၀ဲသ့ၣ်ဘၣ်စံၣ်ထီၣ်ကဒီးလၢတၢ်လီၢ်အဂၤလီၤႉပယီၤသုးခးလီၤကျိဖးဒိၣ်န့ၣ်တမ့ၢ်ထဲတၢ်လီၢ်တတီၤဃီဘၣ်ႉ ပယီၤသုးကျိၤမ့ဟဲလီၤလံန့ၣ်ၦၤသ၀ီဖိတဖၣ်ဘၣ်ယိၣ်၀ဲလၢတၢ်ကကဲထီၣ်သးဒ်သိးဒီး(ညီၤပ့ၤသၤ)သ၀ီန့ၣ်အဃိ ၦၤဟးစံၣ်ပလဲာ်သးမီၤနီၤ”အဂ့ၢ်န့ၣ် စံး၀ဲန့ၣ်လီၤႉ

ကမျၢၢ်လၢအဃ့ၢ်ထီၣ်တဖၣ်န့ၣ်တၢ်တန့ၢ်အနီၣ်ဂံၢ်လီၤတံၢ်လီၤဆဲးဒံးဘၣ်ဒီးတကီၢ်ခါခဲအံၤတၢ်ဆီၣ်ထွဲမၤစၢၤန့ၢ်၀ဲထဲ ၦၤနီၣ်ဂံၢ်အဂၤ(၂၀၀၀)ဘျဲၣ်ဒံးလီၤအဂ့ၢ်န့ၣ် ချၢၣ်လွံၢ်ထူၣ်ကီၢ်ရ့ၣ်ပူၤ ကညီဂံၢ်ခီၣ်ထံးတၢ်ကရၢကရိအၦၤမၤတၢ်ဖိလၢ လၢအမၤစၢၤၦၤဃ့ၢ်မှံဟးဖျိးတဂၤ စံး၀ဲန့ၣ်လီၤႉ

အ၀ဲစံး၀ဲလၢ“ပဟးထၢၦၤနီၣ်ဂံၢ်စရီန့ၢ်ထဲ(၂)ကထိဘျဲၣ်လီၤႉၦၤသ့ၣ်တဖၣ်အံၤပမၤစၢၤန့ၢ်ဘၣ်ဆၣ်တၢ်လိၣ်ဘၣ်လၢအဂၤဒုအိၣ်ဒံးမီၤနီၤႉခဲအံၤစ့ၢ်ကီးဘၣ်လၢတၢ်စူၤခါႇပစိၤအ့ၣ်တၢ်ဃၢ်ဖျးအဃိၦၤဘၣ်၀ဲဒၣ်တၢ်ညၣ်ဂိၢ်တိးကွ့တၢ်ဆါမီၤနီၤႉအဃိကသံၣ်ကသီစ့ၢ်ကီးလိၣ်၀ဲဒၣ်ႇဟုသးဒီးပ့ၢ်ပီၤစ့ၢ်ကီးလိၣ်၀ဲလီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ် လီၤႉ

လၢန့ၣ်အမဲာ်ညါခီဖျိပယီၤသုးခးလီၤကျိဖးဒိၣ်အဖျၢၣ်(၁၀၀)ဘျဲၣ်အဃိ လီၢ်က၀ီၤကမျၢၢ်အဟံၣ်ဟးဂီၤ၀ဲ(၁၃)ဖျၢၣ် တကးဒံးဘၣ်အမဲာ်ညါပယီၤသုးနုာ်လီၤလၢ(အိပ့ၤစူၣ်)သ၀ီပူၤဒီးဟံဆူၣ်၀ဲဒၣ်ကမျၢၢ်လၢအဟဲစံၣ်အိၣ်ဖဲသီခါဖၠၢ်ကရၢၢ်ပူၤတဖၣ်အံၤအလီတဲစိ(၇)ဖျၢၣ်ႇစ့ပယီၤ(၂၅)ကလီၢ်ဘျဲၣ်အဂ့ၢ်န့ၣ် ခ့ၣ်အဲၣ်ယူၣ်ထုးထီၣ်ပာ်ဖျါ၀ဲဖဲလါယူၤလံ ၇ သီ အနံၤန့ၣ်လီၤႉ

ဒ်န့ၣ်အသိးလၢ(၅)သီအတီၢ်ပူၤတၢ်ဒုးကဲထီၣ်၀ဲလၢပယီၤသုးဒီး(KNLA)သုးပာ်ဖှိၣ်အဘၢၣ်စၢၤအိၣ်၀ဲ ၉ ဘျီဒီး ဖဲန့ၣ် ပယီၤသုးတကပၤသံ၀ဲ(၃၂)ဂၤႇဘၣ်ဒိ၀ဲ(၂၂)ဂၤအသိး မ့မ့ၢ်တၢ်ပၢၢ်ဆၢသုးပာ်ဖှိၣ်တကပၤန့ၣ် ဘၣ်ဟ့ၣ်လီၤကွံာ်အသးသမူ (၁)ဂၤႇဘၣ်ဒိ၀ဲ(၁)ဂၤအဂ့ၢ်န့ၣ် ခ့ၣ်အဲၣ်ယူၣ်လံာ်တၢ်ပာ်ဖျါအပူၤ ပာ်ဖျါ၀ဲန့ၣ်လီၤႉ