ပယီၤသုးခးလီၤကျိဖးဒိၣ်အဃိ ၄ သီအတီၢ်ပူၤ ကမျၢၢ်သံ ၆ ဂၤဒီး ဘၣ်ဒိ ၇ ဂၤ

လါအီကူး ၁၈ သီႇ ၂၀၂၃ နံၣ်ႇ ခ့ၣ်အဲးစံၣ်

လၢခ့ၣ်အဲၣ်ယူၣ်–ကညီဒီကလုာ်စၢဖှိၣ်ကရၢ(သုးက့ ၃)ဟီၣ်က၀ီၤ ချၢၣ်လွံၢ်ထူၣ်ကီၢ်ရ့ၣ် ကီၢ်ဆၣ်(၃)ဘ့ၣ်အပူၤ လါအီကူး ၁၃ သီ တုၤလၢ ၁၆ သီ လၢလွံၢ်သီအတီၢ်ပူၤ ခီဖျိပယီၤသုးခးလီၤကျိဖးဒိၣ်အဃိ ကမျၢၢ်သံ(၆)ဂၤဒီး ဘၣ်ဒိ(၇)ဂၤအဂ့ၢ်န့ၣ် ခ့ၣ်အဲၣ်ယူၣ်လီၢ်ခၢၣ်သးထုးထီၣ်ပာ်ဖျါ၀ဲဖဲမဟါလါအီကူး ၁၇ သီအနံၤန့ၣ်လီၤႉ

ချၢၣ်လွံၢ်ထူၣ်ကီၢ်ရ့ၣ် ဆီထံးကီၢ်ဆၣ်ႇမူကီၢ်ဆၣ်ဒီးလၢၢ်ဒိၣ်ကီၢ်ဆၣ်သၢဘ့ၣ်အံၤအပူၤ ခီဖျိပယီၤသုးခးလီၤ(၁၀၅ မမ)ႇ (၁၂၂ မမ)ႇ (၈၁ မမ)ဒီး (၆၀ မမ)သ့ၣ်တဖၣ်အံၤအဃိ ကမျၢၢ်သံ(၆)ဂၤအကျါပၣ်ဃုာ်၀ဲၦၤကၠိဖိ(၂)ဂၤဒီး ဘၣ်ဒိဘၣ်ထံး၀ဲ(၇)ဂၤအဂ့ၢ်န့ၣ် ခ့ၣ်အဲၣ်ယူၣ်လံာ်တၢ်ပာ်ဖျါအပူၤပာ်ဖျါ၀ဲန့ၣ်လီၤႉ

ၦၤလၢအသံတဖၣ်န့ၣ်မ့ၢ်၀ဲၦၤကၠိဖိခံဂၤလၢအမ့ၢ်စီၤအဲၣ်ကလုာ်ထူ(၁၃)နံၣ်ႇစီၤဘိၣ်လိၣ်(၁၆)နံၣ်ႇကိၤမီၤထွ့(ကိး) ကၠီၤစ့ၤယၣ်(၆၀)နံၣ်ႇကိၤသၣ်စီၤ(၃၅)နံၣ်သ့ၣ်တဖၣ်အံၤဘၣ်၀ဲဒီးကျိအက့အခီဒီး မ့မ့ၢ်ၦၤဘၣ်ဒိဘၣ်ထံး(၇)ဂၤအကျါ န့ၣ်ပၣ်ဃုာ်၀ဲဖိသၣ်စီၤခွါစံၣ်(၁၁)နံၣ်ႇနီၢ်ဘှဲဘှဲ(၁၅)နံၣ်ႇကၠိသရၣ်မုၣ်(၁)ဂၤဒီးၦၤကၠိဖိပိာ်ခွ(၂)ဂၤအဂ့ၢ်န့ၣ် ခ့ၣ်အဲၣ်ယူၣ် စံး၀ဲန့ၣ်လီၤႉ

လၢန့ၣ်အမဲာ်ညါပယီၤသုးလၢအခးလီၤကျိဖးဒိၣ်သ့ၣ်တဖၣ်အံၤမ့ၢ်၀ဲခီၣ်သုးရ့ၣ်(ခလရ–၂၆၄)ဒီး ပယီၤသုးရ့ၣ်လၢ အိၣ်ဆီလီၤသးကီၢ်ဆၣ်(၃)ဘ့ၣ်အပူၤတဖၣ်အံၤန့ၣ်လီၤႉ ပယီၤသုးတဖၣ်အံၤပညိၣ်ခးလီၤတၢ်လၢ ဒိတါသ၀ီႇ ပဲသီၤႇ အ့ၤကိႇလ့ၤတါႇသထ့ကိႇကိဒလၣ်ကၠံႇအ့ကၣ်ပလ့ၣ်ႇသ့ၣ်ခၠီၣ်ခ့ၤႇစလိၣ်ကၠံႇဖယါလဟၤႇ ငါမၠ့ၣ်အ့သ၀ီသ့ၣ်တဖၣ်အံၤအပူၤ အဂ့ၢ်န့ၣ် ခ့ၣ်အဲၣ်ယူၣ်လံာ်တၢ်ပာ်ဖျါအပူၤ ပာ်ဖျါ၀ဲန့ၣ်လီၤႉ

ပယီၤသုးတဖၣ်အံၤခးလီၤကျိဖးဒိၣ်ဆူသ၀ီပူၤ၊ကဘီယူၤစ့ၢ်ကီးဟဲခးလီၤတၢ်တကးဒံးဘၣ်အမဲာ်ညါ ခီဖျိပယီၤသုးကျိၤလၢ အဟဲနုာ်လီၤသ့ၣ်တဖၣ်အံၤဒွဲၣ်အူအီၣ်၀ဲကမျၢၢ်အဟံၣ်ကအိၣ်အဖျၢၣ်(၂၀)ဃၣ်ဃၣ်ညါအဃိ လီၢ်က၀ီၤကမျၢၢ် တဖၣ် ဘၣ်ဃ့ၢ်ထီၣ်၀ဲအဂ့ၢ်န့ၣ် သ့ၣ်ညါဘၣ်လၢဟီၣ်က၀ီၤဂံၢ်ခီၣ်ထံးတၢ်ကစီၣ်အအိၣ်န့ၣ်လီၤႉ

ပယီၤသုးအံၤခးလီၤကျိဖးဒိၣ်ဆူသ၀ီပူၤႇသူစ့ၢ်ကီးကဘီယူၤဟဲခးလီၤတၢ်ဒီးဒွဲၣ်အူအီၣ်ကမျၢၢ်အဟံၣ်အဃီ တကးဒံးဘၣ် ဟံ၀ဲဒၣ်ကမျၢၢ်အတၢ်ဖိတၢ်လံၤတၢ်သ့ၣ်တဖၣ်အံၤတမ့ၢ်အကဲထီၣ်သးထဲလၢ(သုးက့ ၃)ဟီၣ်က၀ီၤပူၤ ဘၣ်ဒီးမ့မ့ၢ်တခီလၢ (ခ့ၣ်အဲၣ်ယူၣ်)တၢ်ပၢဟီၣ်က၀ီၤပူၤလၢအဂၤစ့ၢ်ကီးမၤ၀ဲဒ်အံၤအိၣ်၀ဲအဂ့ၢ်န့ၣ် ခ့ၣ်အဲၣ်ယူၣ်အတၢ်ပာ်ဖျါကိးလါဒဲးအပူၤအသိး သ့ၣ်ညါဘၣ်န့ၣ်လီၤႉ