ပယီၤသုခးလီၤကျိဖးဒိၣ်ႇကဘီယူၤဟဲခးလီၤတၢ်အဃိၦၤဘၣ်ဒိ(၇)ဂၤအကျါပၣ်ဃု၁်(KNLA)အၦၤ ၃ ဂၤ

လါအီးကထိဘၢၣ် ၁၈ သီႇ ၂၀၂၃ နံၣ်ႇ ခ့ၣ်အဲးစံၣ်

လၢခ့ၣ်အဲၣ်ယူၣ်-ကညီဒီကလုာ်စၢဖှိၣ်ကရၢ(သုးက့ ၃) ချၢၣ်လွံၢ်ထူၣ်ကီၢ်ရ့ၣ်အပူၤ ဖဲလါအီးကထိဘၢၣ် ၁၆ သီ ဒီး ၁၇ သီ အနံၤ ခီဖျိပယီၤသုးခးလီၤကျိဖးဒိၣ်ႇကဘီယူၤဟဲခးလီၤတၢ်အဃိ ၦၤဘၣ်ဒိဘၣ်ထံး(၇)ဂၤအကျါ ပၣ်ဃုာ် ကညီဒီကလုာ်တၢ်ထူၣ်ဖျဲးသုးမုၢ်ဒိၣ်(KNLA)အၦၤ ၃ ဂၤဒီး ၦၤကမျၢၢ်ပိာ်မုၣ်(၂)ဂၤအဂ့ၢ်န့ၣ် သ့ၣ်ညါဘၣ်လၢ (ခ့ၣ်အဲၣ်ယူၣ်)ဒီးကမျၢၢ်တဖၣ်အအိၣ်န့ၣ်လီၤႉ

ဖဲလါအီးကထိဘၢၣ် ၁၆ သီ ဟါခီအဆၢကတီၢ် ပယီၤသုးခီၣ်သုးရ့ၣ်(ခလရ-၂၆၄)လၢအိၣ်ဆီလီၤသးဖဲ ချၢၣ်လွံၢ်ထူၣ်ကီၢ်ရ့ၣ် ဆီထံးကီၢ်ဆၣ် ပ့စလိၣ်အံၤဒီး တီၤ၀ံၤဒီးယ့ၤကၠံၤခၠီ ပယီၤသုးကလၢၤတဖၣ်အံၤ ခးလီၤ ကျိဖးဒိၣ် လီၤတဲာ်ပိၢ်ဖးထီၣ်လၢ ခၠိၤအ့သ၀ီ သ၀ီဖိတဂၤအဟံၣ်ခိၣ်အဃိ ၦၤပိာ်မုၣ်(၂)ဂၤဒီးပိာ်ခွါတဂၤဘၣ်ဒိဘၣ်ထံး ၀ဲအဂ့ၢ်န့ၣ် ခ့ၣ်အဲၣ်ယူၣ် ထုးထီၣ်ပာ်ဖျါ၀ဲဖဲလါအီးကထိဘၢၣ် ၁၇ သီအနံၤန့ၣ်လီၤႉ

လၢန့ၣ်အမဲာ်ညါဖဲမဟါလါအီးကထိဘၢၣ် ၁၇ သီအနံၤ ခီဖျိပယီၤသုးကဘီယူၤဟဲခးလီၤတၢ်လၢလၢၢ်ဒိၣ်ကီၢ်ဆၣ် ဒူသ၀ီပူၤအဃိ ၦၤကမျၢၢ်ပိာ်ခွါ(၂၅)နံၣ် တဂၤ ဒီး (KNLA)အၦၤ ၃ ဂၤဘၣ်ဒိဘၣ်ထံး၀ဲအဂ့ၢ်န့ၣ် လံာ်တၢ်ပာ်ဖျါပူၤဒီး ကမျၢၢ်စံး၀ဲအသိးသ့ၣ်ညါဘၣ်န့ၣ်လီၤႉ

“ကဘီယူၤဟဲခးလီၤတၢ်ဖဲမဟါန့ၣ်ၦၤသ၀ီဖိဘၣ်ဒိတဂၤဘၣ်တအါဘၣ်ႉမ့မ့ၢ်လၢၦၤသုးဖိသၢဂၤန့ၣ်ခီန့ၣ်ၦၤတဲလၢ အဘၣ်နးမီၤနီၤႉဖဲတဂီၤညါအံၤပတနၢ်ဟူကဘီယူၤဟဲသီၣ်လၢၤဘၣ်ႉမ့မ့ၢ်လၢကျိဖးဒိၣ်ဒုနၢ်ဟူအဖၢမုၢ်ဒံးလီၤ” အဂ့ၢ်န့ၣ် လီၢ်က၀ီၤၦၤပိာ်မုၣ်တဂၤ စံးဘၣ်ခ့ၣ်အဲးစံၣ်-ကညီတၢ်ကစီၣ်ဖဲတနံၤအံၤန့ၣ်လီၤႉ

ခီဖျိကျိဖးဒိၣ်ဒီးကဘီယူၤဟဲခးလီၤတၢ်လၢခံသီအတီၢ်ပူၤအံၤအဃိကၠိ(၁)ဖျၢၣ်ႇကမျၢၢ်တၢ်သူၣ်ထီၣ်ဒီးဟံၣ်တစှၤန့ၢ် (၆)ဖျၢၣ်ဟးဂူာ်ဟးဂီၤ၀ဲညါဒီးကျီၢ်သံ၀ဲဒၣ်ခံဒုႇဘၣ်ဒိတဒုအဂ့ၢ်န့ၣ် ခ့ၣ်အဲၣ်ယူၣ်လံာ်တၢ်ပာ်ဖျါအပူၤပာ်ဖျါ၀ဲန့ၣ်လီၤႉ

လၢတၢ်န့ၣ်အဃိ လၢၢ်ဒိၣ်ကီၢ်ဆၣ်ပူၤ တီၤထီကၠိႇ ချၢၣ်လွံၢ်ထူၣ် ကၠူၣ်နံၣ်ယၢၣ်ခီလ့းကၠိသ့ၣ်တဖၣ်အံၤတၢ်ပံးကွံာ်၀ဲဒီး လီၢ်က၀ီၤၦၤကမျၢၢ်တဖၣ်ဟးစံၣ်အိၣ်လၢတၢ်လီၢ်အဂၤအဂ့ၢ်န့ၣ် ခ့ၣ်အဲၣ်ယူၣ်လံာ်တၢ်ပာ်ဖျါအပူၤ ပာ်ဖျါ၀ဲန့ၣ်လီၤႉ

လီၢ်က၀ီၤကမျၢၢ်လၢအဂၤတဂၤစ့ၢ်ကီးစံး၀ဲလၢ“ကဘီယူၤဟဲခးလီၤတၢ်အဃိဟံၣ်ဟးဂီၤတဖၣ်ပၣ်ဃုာ်ယသကိး အဟံၣ်စ့ၢ်မီၤနီၤႉတၢ်ကဲထီၣ်သးဖဲမဟါတၢ်လီၢ်သၢတီၤန့ၣ်အိၣ်တဘူးတယံၤလိာ်သးလီၤႉတမ့ၢ်တၢ်ဒုးကဲထီၣ်ဒီး (KNLA)စ့ၢ်ဘၣ်ႉအဟဲခးလီၤ၀ဲဒီးကဘီယူၤကၠဲးလိၤလိၤဒ်န့ၣ်လီၤ”အဂ့ၢ်န့ၣ်န့ၣ် စံး၀ဲန့ၣ်လီၤႉ ဘၣ်ဃးဒီးတၢ်ဂ့ၢ်ကဲထီၣ်သးအံၤသုးကီၣ်ကးတကပၤထုးထီၣ်ပာ်ဖျါတၢ်ကစီၣ်တအိၣ်နီတမံၤဘၣ်န့ၣ်လီၤႉ

လၢချၢၣ်လွံၢ်ထူၣ်ကီၢ်ရ့ၣ် လၢၢ်ဒိၣ်ႇမူႇဆီထံးကီၢ်ဆၣ်အပူၤ တုၤလၢတလါအံၤလါအီးကထိဘၢၣ်န့ၣ် ခီဖျိခံခီခံကပၤ တၢ်သဘံၣ်သဘုၣ်ဒီးသုးကီၣ်ကးအတၢ်မၤကမၣ်ၦၤဂ့ၢ်၀ီခွဲးယာ်အဃိၦၤဃ့ၢ်မှံဟးဖျိးအနီၣ်ဂံၢ်အိၣ်ထီၣ်တုၤလၢ (၂၄၀၀၀၀) ဘျဲၣ်လံဒီးၦၤသ့ၣ်တဖၣ်အံၤအဂီၢ်လိၣ်ဘၣ်၀ဲဂ့ၢ်ဂီၢ်အူတၢ်အီၣ်တၢ်အီဒီးၦၤဂ့ၢ်၀ီတၢ်ဆီၣ်ထွဲမၤစၢၤတဖၣ် အဂ့ၢ်န့ၣ် ခ့ၣ်အဲၣ်ယူၣ် ထုးထီၣ်ပာ်ဖျါတ့ၢ်ဃာ်၀ဲဖဲလါအီးကထိဘၢၣ် ၁၄ သီအနံၤန့ၣ်လီၤႉ