လါအ့ဖြ့ၣ် ၂၆ သီႇ ၂၀၂၄ နံၣ်ႇ ခ့ၣ်အဲးစံၣ်
လၢကညီကီၢ်စဲၣ် ဒူပျာ်ယာ်ကီၢ်ရ့ၣ် ကီးတရံးကီၢ်ဆၣ် မၠၣ်၀တံၣ်၀့ၢ်ဃၢၤ ဖဲမဟါလါအ့ဖြ့ၣ် ၂၅ သီ မုၢ်နၤခီ အဆၢကတီၢ်န့ၣ်သုးကီၣ်ကးအကဘီယူၤဟဲတ့ၢ်လီၤမ့ၣ်ပိၢ်လၢလ့က့ၣ်ကိာ်ဟီၣ်က၀ီၤ ဒူသ၀ီတဖၣ်အပူၤ ကအိၣ်လၢ(၉)ဘျီဃၣ်ဃၣ်ညါအဂ့ၢ်န့ၣ် လီၢ်က၀ီၤၦၤဘၣ်မူဘၣ်ဒါ စံး၀ဲန့ၣ်လီၤႉ
ဖဲမဟါမုၢ်နၤခီ ၁၁း၀၀ အဆၢကအတီၢ်န့ၣ် ပယီၤသုးကဘီယူၤတဘ့ၣ်ဟဲတ့ၢ်လီၤမ့ၣ်ပိၢ်လၢ လ့က့ၣ်ကိာ်ႇ ထံမဲာ်၀ါခံသ၀ီႇတလးအ့းသ့းသ၀ီ(ယသ့ၣ်ကူၤ)တၢ်လီၢ်သ့ၣ်တဖၣ်အံၤကအိၣ်လၢ(၉)ဘျီဃၣ်ဃၣ်ညါအဂ့ၢ်န့ၣ် ကီးတရံးကီၢ်ဆၣ်ခိၣ် စီၤဖၣ်ထယါ စံး၀ဲန့ၣ်လီၤႉ
အ၀ဲစံး၀ဲလၢ“ဖဲမနၤ ၁၁ နၣ်ရံၣ်န့ၣ် ကဘီယူၤဟဲကွံာ်လီၤ၀ဲမ့ၣ်ပိၢ်မီၤနီၤႉ တၢ်လီၢ်ခီဒုတလးအ့းသ့ဖၠၣ်(ယသ့ၣ်ကူၤ) န့ၣ်ကွံာ်လီၤ၀ဲစ့ၢ်ႉမ့၀ံၤလၢထံမဲး၀ါခံႇလ့က့ၣ်ကိာ်တဖၣ်နါက့ဟဲကွံာ်လီၤ၀ဲစ့ၢ်ႉကွံာ်၀ဲတၢ်ဆၢကတီၢ်ဒုကအိၣ်လၢ ၁၁ နၣ်ရံၣ် တုၤလၢ ၁၂ နၣ်ရံၣ်ဃၣ်ဃၣ်ညါမီၤနီၤႉ ခဲလၢာ်ခဲစ့န့ၣ်ကွံာ်လီၤ၀ဲ(၉)၀ီမီၤႉပတယးကွၢ်န့ၣ် တ၀ီဒုကွံာ်လီၤ၀ဲ အစှၤကတၢၢ် (၆)ဖျၢၣ်ႇ(၇)ဖျၢၣ်လီၤမီနီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်-ကညီတၢ်ကစီၣ်န့ၣ်လီၤႉ
လၢန့ၣ်အမဲာ်ညါကဘီယူၤဟဲတ့ၢ်လီၤမ့ၣ်ပိၢ်ဘျီ၀ဲအံၤခီဖျိလီၢ်က၀ီၤဒူသ၀ီကမျၢၢ်လၢအိၣ်ဘူးဖဲန့ၣ်တဖၣ် ဃ့ၢ်ထီၣ်ဟးစံၣ် အိၣ်လၢတၢ်လီၢ်အဂၤန့ၢ်ဖးယံၤလံအဃိတၢ်သံတၢ်ဘၣ်ဒိဘၣ်ထံးတအိၣ်နီမံၤဘၣ်အဂ့ၢ်န့ၣ် ကီးတရံးကီၢ်ဆၣ်ခိၣ် စံးအါထီၣ်၀ဲန့ၣ်လီၤႉ
ဒူသ၀ီတၢ်လီၢ်လၢသုးကီၣ်ကးအကဘီယူၤဟဲခးလီၤတၢ်အခိၣ်အဃၢၤအံၤအိၣ်ဘူး၀ဲဒၣ်ဒီးပယီၤသုး(စွဲၤတီၤကိ) ကျိဖးဒိၣ်လူၢ်ဒီး ဒ်န့ၣ်အသိးတၢ်လီၢ်အံၤအခိၣ်အဃၢၤန့ၣ်ကညီဒီကလုာ်တၢ်ထူၣ်ဖျဲးသုးမုၢ်ဒိၣ်(KNLA)သုးပာ်ဖှိၣ် ဟူးဂဲၤ၀ဲအိၣ်ဘၣ်ဆၣ် စှၤသီအတီၢ်ပူၤအံၤတၢ်ဒုးတၢ်ယၤကဲထီၣ်တအိၣ်၀ဲဘၣ်အဂ့ၢ်န့ၣ် လီၢ်က၀ီၤၦၤဘၣ်မူဘၣ်ဒါ စံး၀ဲအသိးသ့ၣ်ညါဘၣ်န့ၣ်လီၤႉ
ဒ်န့ၣ်အသိးဖဲအပူၤကွံာ်လါမးရှး ၃၁ သီအနံၤန့ၣ် (KNLA)တၢ်ပၢၢ်ဆၢသုးပာ်ဖှိၣ်ထီၣ်မၤန့ၢ်၀ဲဒၣ် လ့က့ၣ်ကိာ်၀့ၢ်သီဃၢၤ သုးကီၣ်ကးအသုးကလၢၤတဖျၢၣ်လၢအမ့ၢ်(ယ့ၤကၤကိ)တၢ်လီၢ်အံၤဒံးဒီး ဖဲန့ၣ်ပယီၤသုးတကပၤသံဘၣ်ဒိ ဘၣ်ထံး အိၣ်၀ဲအသိးတၢ်မၤန့ၢ်ဃုာ်၀ဲကျိချံၦာ်သၣ်လၢဒုၣ်ဒါအအိၣ်အိၣ်စ့ၢ်ကီး၀ဲတနီၤအဂ့ၢ်န့ၣ် သ့ၣ်ညါဘၣ်န့ၣ်လီၤႉ