လါယူၤလံ ၃ သီႇ ၂၀၂၄ နံၣ်ႇ ခ့ၣ်အဲးစံၣ်
ခ့ၣ်အဲၣ်ယူၣ်-ကညီဒီကလုာ်စၢဖှိၣ်ကရၢ ဒူသထူၣ်ကီၢ်ရ့ၣ်(သုးက့ ၁)ဟီၣ်က၀ီၤ လါယူၤတလါအတီၢ်ပူၤ ပယီၤသုးခးလီၤ ကျိဖးဒိၣ်ခဲလၢာ်(၂၃)ဘျီဒီးကမျၢၢ်သံ(၅)ဂၤႇဘၣ်ဒိ(၁၀)ဂၤ ပာ်ဖှိၣ်ခဲလၢာ်(၁၅)ဂၤအဂ့ၢ်န့ၣ် ကီၢ်ရ့ၣ်တၢ်မၤနီၣ်စရီပူၤအသိး သ့ၣ်ညါဘၣ်န့ၣ်လီၤႉ
(သုးက့ ၁)တၢ်ပၢဟီၣ်က၀ီၤအပူၤ အပူၤကွံာ်လါယူၤထီၣ် ၁ သီတုၤ ၃၀ သီအနံၤ ပယီၤသုးအံၤတၢ်ဒုးကဲထီၣ်အိၣ်ဂ့ၤႇ တအိၣ်ဂ့ၤခီဖျိခးလီၤ၀ဲဒၣ်ကျိဖးဒိၣ်ဆူလီၢ်က၀ီၤကမျၢၢ်ဒူသ၀ီတၢ်အိၣ်တၢ်ဆိးႇတၢ်ဖံးအီၣ်မၤအီၣ်လီၢ်ကျဲတလီၢ် တလီၢ်အဃိ ၦၤကမျၢၢ်ဒူဖိသ၀ီဖိတၢ်သံတၢ်ဘၣ်ဒိဘၣ်ထံးဘၣ်ဟဲကဲထီၣ်သးဒ်အံၤလီၤအဂ့ၢ်န့ၣ် သ့ၣ်ညါဘၣ်န့ၣ်လီၤႉ
ကျိဖးဒိၣ်အဃိကမျၢၢ်သံဘၣ်ဒိဘၣ်ထံး(၁၅)ဂၤအကျါပၣ်ဃုာ်၀ဲသီခါႇအူစ့ႇတပွဲဖိသ့ၣ်တဖၣ်ဒီးလၢန့ၣ်အမဲာ်ညါ သီခါဖၠၣ်(၃)ဖျၢၣ်ႇဒဲတဖျၢၣ်ဒီးဟံၣ်ဃီတၢ်သူၣ်ထီၣ်ဟးဂီၤဘၣ်ဒိဘၣ်ထံး(၁၃)ဖျၢၣ်ႇဆၣ်ဖိကီၢ်ဖိသံဘၣ်ဒိဘၣ်ထံးႇ ကျီးပူၤတၢ်မုၢ်တၢ်ဘိသ့ၣ်တဖၣ်စ့ၢ်ကီးဟးဂီၤ၀ဲဒၣ်အိၣ်အဂ့ၢ်န့ၣ် ဒူသထူၣ်ကီၢ်ရ့ၣ်တၢ်မၤနီၣ်စရီအပူၤ ပာ်ဖျါ၀ဲန့ၣ်လီၤႉ
ဒ်ဒူသထူၣ်ကီၢ်ရ့ၣ်တၢ်မၤနီၣ်စရီပူၤဖျါ၀ဲအသိးန့ၣ်ဟီၣ်က၀ီၤအပူၤ သုးကီၣ်ကးအသုးကလၢၤလၢအခးလီၤကျိဖးဒိၣ် သ့ၣ်တဖၣ်န့ၣ်မ့ၢ်၀ဲအမျိာ်သုး(၃၁၀),(၃၁၄),(၄၀၂)သုးရ့ၣ်ႇ နးကၠံပယီၤသုးကလၢၤဒီး ခီၣ်ချ့သုးရ့ၣ်(ခမရ-၉) သ့ၣ်တဖၣ် အံၤ အဂ့ၢ်န့ၣ် သ့ၣ်ညါဘၣ်န့ၣ်လီၤႉ
ဒ်န့ၣ်အသိးတလါအတီၢ်ပူၤလၢဒုးယၤတကပၤခီန့ၣ် ပယီၤသုးဒီးဟီၣ်က၀ီၤကညီဒီကလုာ်တၢ်ထူၣ်ဖျဲးသုးမုၢ်ဒိၣ် (KNLA) သုးရ့ၣ်(၃)ဒီးသုးရ့ၣ်(၂)သုးပာ်ဖှိၣ်သ့ၣ်တဖၣ်အံၤအဘၢၣ်စၢၤ တၢ်ဒုးစဲးပြဲးႇတၢ်ဘၣ်သဂၢၢ်ခးလိာ်သးကဲထီၣ် ၀ဲဒၣ်(၉)ဘျီ အဃိ ပယီၤသုးတကပၤသံ(၅)ဂၤႇဘၣ်ဒိ(၁၂)ဂၤဒီး မ့မ့ၢ်လၢတၢ်ပၢၢ်ဆၢသုးပာ်ဖှိၣ်တကပၤခီန့ၣ် ဘၣ်ဟ့ၣ်လီၤကွံာ် အသးသမူ(၂)ဂၤႇဘၣ်ဒိ(၁)ဂၤ အဂ့ၢ်န့ၣ် သ့ၣ်ညါဘၣ်န့ၣ်လီၤႉ
တကတီၢ်ဃီဒူသထူၣ်ကီၢ်ရ့ၣ် အပူၤကွံာ်လါမ့ၤတလါအတီၢ်ပူၤ ပယီၤသုးခးလီၤ၀ဲဒၣ်ကျိဖးဒိၣ်လၢဟီၣ်က၀ီၤပူၤ အိၣ်(၂၉)ဘျီႇကဘီယူၤစ့ၢ်ကီးဟဲခးလီၤတၢ်တဘျီအဃိ ၦၤကမျၢၢ်သံခဲလၢာ်(၆)ဂၤႇဘၣ်ဒိ(၃၅)ဂၤ တကးဒံးဘၣ် ဟံၣ်ဃီႇသီခါဖၠၣ်တၢ်သူၣ်ထီၣ်ဃုာ်ဒီးတၢ်ဖံးအီၣ်မၤအီၣ်လီၢ်ကျဲႇတၢ်မုၢ်တၢ်ဘိသ့ၣ်တဖၣ်ဟးဂူၤဟးဂီၤဘၣ်ဒိဘၣ်ထံး ၀ဲအဂ့ၢ်န့ၣ် သ့ၣ်ညါဘၣ်လၢကီၢ်ရ့ၣ်တၢ်မၤနီၣ်စရီပူၤအသိးန့ၣ်လီၤႉ