လါအီကူး ၁၇သီ, ၂၀၂၄နံၣ်, ခ့ၣ်အဲးစံၣ်,
ကမၤပတုၥ်ကွံၥ်သုးကီၣ်ကးအတၢ်မၤအၢလၢကမျၢၢ်လီၢ်ကဝီၤဖိတဖၣ်အဖီခိၣ်ဒီးဟ့ၣ်တၢ်ဆီၣ်သနံးတုၤလီၤတီၤလီၤအဂ့ၢ်,လၢၢ်ဒိၣ်ကီၢ်ဆၣ်ဂ့ၢ်ဂီၢ်အူကညီတၢ်တိစၢၤမၤစၢၤကမံးတံၥ်ဃ့ထီၣ်ဝဲထံဂုၤကီၢ်ဂၤဒီးထုးထီၣ်ဝဲလံၥ်တၢ်ဃ့ထီၣ်တဘ့ၣ်ဖဲအပူၤကွံၥ်လါအီကူး(၁၄)သီအနံၤန့ၣ်လီၤ.
လံၥ်ထုးထီၣ်ပၥ်ဖျါအပူၤဃ့ထီၣ်ဝဲလၢ,ဒ်ပှၤဟီၣ်ခိၣ်ဖိခွဲးယၥ်အလံၥ်တၢ်ရၤလီၤအိၣ်ဝဲအသိးန့ၣ်လၢကမၤပတုၥ်ကွံၥ်သုးကီၣ်ကးအတၢ်မၤအၢပညိၣ်ခးလီၤဝဲကမျၢၢ်လီၢ်ကဝီၤဖိတဖၣ်အံၤအဖီခိၣ်အဂီၢ်,ကီၢ်ပူၤကီၢ်ချၢပဒိၣ်ပပှၢ်,ပှၤတဝၢခိၣ်နၢ်ဃုၥ်ဒီးထံဂုၤကီၢ်ဂၤကဟ့ၣ်တၢ်ဆီၣ်သနံးလၢအတုၤလီၤတီၤလီၤဆူသုးကီၣ်ကးတဖၣ်ဒီးကမၤပတုၥ်ကွံၥ်စ့ၢ်ကီးဝဲပှၤလၢဟ့ၣ်ဂံၢ်ဟ့ၣ်ဘါသုးကီၣ်ကးကရူၢ်ကရၢတဖၣ်အတၢ်ဖံးတၢ်မၤတဖၣ်အမဲၥ်ညါ,သုးကီၣ်ကးအတၢ်ပညိၣ်ခးလီၤအကဘီယူၤ,ကျိဖးဒိၣ်ဒီးဒြိသ့ၣ်တဖၣ်အံၤကဘၣ်မၤပတုၥ်ကွံၥ်ဝဲတဘျီဃီအဂ့ၢ်,ပၥ်ဖျါဝဲလၢလံၥ်ထုးထီၣ်ပၥ်ဖျါအပူၤန့ၣ်လီၤ.
တကးဒံးဘၣ်,ဖဲ(၂၀၂၄)နံၣ်လါယူၤ(၁)သီတုၤလၢလါယူၤလံ(၃၁)ဖဲ(၂)လါအတီၢ်ပူၤ,သုးကီၣ်ကးအံၤမၤထီဒါမၤကမၣ်ဝဲပှၤဟီၣ်ခိၣ်ဖိခွဲးယၥ်ဆူကမျၢၢ်တဖၣ်အဖီခိၣ်လၢကဘီယူၤတၢ်ခးလီၤကျိဖိကျိဖးဒိၣ်,ခးလီၤတၢ်ဒီးဒြိသ့ၣ်တဖၣ်အိၣ်ဝဲအသိးဒီးဖီၣ်ကမျၢၢ်,ဟံန့ၢ်ဆူၣ်ဝဲကမျၢၢ်တၢ်ဖိတၢ်လံၤဒီးဒုးလီၤဝဲလၢဃိၣ်ပူၤ,တကးဘၣ်ဃ့အီၣ်ဝဲကမျၢၢ်ကျိစ့,မၢဆူၣ်ဝဲကမျၢၢ်တဖၣ်လၢကလဲၤကဲသုးသ့ၣ်တဖၣ်အိၣ်ဝဲဒၣ်အဂ့ၢ်,လံၥ်ထုးထီၣ်ပၥ်ဖျါအပူၤပၥ်ဖျါဝဲန့ၣ်လီၤ.
ဒီးခီဖျိသုးကီၣ်ကးမၤထီဒါဝဲပှၤဟီၣ်ခိၣ်ဖိခွဲးယၥ်ဆူကမျၢၢ်လီၢ်ကဝီၤဖိတဖၣ်အဖီခိၣ်ဒ်အံၤအိၣ်ဝဲအဃိ,ခံလါအတီၢ်ပူၤလီၢ်ကဝီၤကမျၢၢ်ဘၣ်သံကွံၥ်ဝဲ(၉)ဂၤဒီးဘၣ်ဒိဘၣ်ထံးဝဲ(၁၁)ဂၤနးနးကလဲၥ်အမဲၥ်ညါဟံၣ်(၁၁)ဖျၢၣ်,ကၠိတၢ်သူၣ်ထီၣ်ဃုၥ်ဒီးတၢ်ဘူၣ်တၢ်ဘါလီၢ်သီခါဖၠၣ်,သရိၥ်တဖၣ်ဘၣ်ဟးဂီၤကွံၥ်ဝဲတကးဘၣ်ကမျၢၢ်အဆၣ်ဖိကီၢ်ဖိကျီၢ်ဒီးတၢ်သူၣ်အီၣ်ဖျးအီၣ်လီၢ်တဖၣ်ဘၣ်ဟးဂီၤကွံၥ်ဝဲဒၣ်စ့ၢ်ကီးအဃိ,ဃ့ထီၣ်စ့ၢ်ကီးဝဲကီၢ်ပူၤကီၢ်ချၢပှၤဘၣ်မူဘၣ်ဒါ,ထံဂုၤကီၢ်ဂၤပှၤကညီဂ့ၢ်ဝီခွဲးယၥ်ပှၤဘၣ်မူဘၣ်ဒါဒီးပှၤတဝၢခိၣ်နၢ်တဖၣ်လၢကဟ့ၣ်တၢ်ဟ့ၣ်တၢ်ဒိသူၣ်ဒိသးတၢ်တိစၢၤမၤစၢၤဒီးတၢ်အိၣ်ဆူၣ်အိၣ်ချ့တၢ်ကူၣ်ဘၣ်ကူၣ်သ့တၢ်လိၣ်ဘၣ်တဖၣ်လၢကမျၢၢ်လၢအတူၢ်ဘၣ်ဝဲသုးကီၣ်ကးတၢ်မၤအၢမၤနးတဖၣ်အဂီၢ်အဂ့ၢ်,လံၥ်ထုးထီၣ်ပၥ်ဖျါအပူၤပၥ်ဖျါဝဲန့ၣ်လီၤ.
လၢန့ၣ်အမဲၥ်ညါ,တကီၢ်ခါခဲအံၤန့ဆၢၣ်တၢ်တတၢၤတနါအိၣ်ထီၣ်အဖီခိၣ်ထံဒိၣ်ခိၣ်ယွၤအဃိလၢၢ်ဒိၣ်ကီၢ်ဆၣ်အပူၤကမျၢၢ်ဒူသဝီအဖျၢၣ်(၁၀၀)ဘျဲၣ်,ဟံၣ်ခိၣ်(၁၀၀၀၀)ဘျဲၣ်ကမျၢၢ်လီၢ်ကဝီၤဖိ(၇၀၀၀၀)ဘျဲၣ်သဂၢၢ်ဘၣ်ဝဲထံဒိၣ်ဘၢတၢ်ဂ့ၢ်ကီအဂ့ၢ်ပၥ်ဖျါဝဲလၢလံၥ်ထုးထီၣ်ပၥ်ဖျါအပူၤန့ၣ်လီၤ.
တကတီၢ်ဃီ,စံးဘျူးဘၣ်ဝဲပှၤလၢအမၤစၢၤဆီၣ်ထွဲတ့ၢ်ဝဲကမျၢၢ်လီၢ်ကဝီၤဖိလၢအဘၣ်ကီဘၣ်ခဲသ့ၣ်တဖၣ်အသိး,ခါဆူညါကအိၣ်ဒီးတၢ်ပၥ်သးကျၢၤမူဆှူလၢကဆဲးမၤစၢၤလိၥ်သကိးသးခံခီယၢ်ပၤအဂ့ၢ်ဆီၣ်တခူပၥ်ဖျါစ့ၢ်ကီးဝဲလၢအလံၥ်ထုးထီၣ်ပၥ်ဖျါအပူၤန့ၣ်လီၤ.
ဒ်န့ၣ်အသိး,သုးဟံန့ၢ်ဆူၣ်တၢ်စိကမီၤအလီၢ်ခံ,လၢၢ်ဒိၣ်ကီၢ်ဆၣ်ဂ့ၢ်ဂီၢ်အူတၢ်တိစၢၤမၤစၢၤကမံးတံၥ်အံၤတိစၢၤမၤစၢၤဝဲကမျၢၢ်လီၢ်ကဝီၤဖိလၢအတူၢ်ဘၣ်တၢ်မၤထီဒါပှၤကညီဂ့ၢ်ဝီခွဲးယၥ်တဖၣ်ဒီးအိၣ်ဆၢထၢၣ်ဝဲဒီးကမျၢၢ်တဖၣ်အမဲၥ်ညါ,မၤစၢၤဆီၣ်ထွဲဝဲကမျၢၢ်တၢ်လိၣ်ဘၣ်တဖၣ်တသ့ဖဲအသ့အဂ့ၢ်,ပၥ်ဖျါဝဲလၢ်ဝဲလၢလံၥ်တၢ်ဃ့ထီၣ်အပူၤန့ၣ်စ့ၢ်ကီးန့ၣ်လီၤ.