လါအီကူာ် ၁၇ သီႇ ၂၀၂၄ နံၣ်ႇ ခ့ၣ်အဲးစံၣ်
အပူၤကွံာ်စှၤသီအခါတၢ်ဂီၤမူတၢ်ကစီၣ်ရၤလီၤသးတခါလၢသုးခိးကီၢ်ဆၢ(BGF)အခိၣ် စီၤခၠံၣ်သူၤ ဒီးအခ့အၦၤတဖၣ် မၤ၀ဲဒၣ်တၢ်ဃ့ထုကဖၣ်မူးတၢ်ရဲၣ်တၢ်ကျဲၤဒိၣ်ဒိၣ်မုၢ်မုၢ်တခါလၢတရူးကၠါဖၠၣ် She Zhijiang အဂီၢ် လၢအမံၤဟူသၣ်ဖျါ လၢတၢ်လံၣ်အီၣ်လီအီၣ်လၢကလံၤကျါတၢ်တၤကျိၣ်တၤစ့လၢစွ့ၣ်ကိၣ်ကိၤဟီၣ်က၀ီၤပူၤန့ၣ်လီၤႉ
She Zhijiang လၢအဘၣ်တၢ်မၤန့ၢ်အီၤတၢ်ထုကဖၣ်တၢ်ရဲၣ်တၢ်ကျဲၤအံၤမ့ၢ်ၦၤတဂၤလၢအပၣ်ဃုာ်လၢ စွ့ၤကိၣ်ကိၤ ၀့ၢ်သီ တၢ်တိၤကျဲၤအပူၤန့ၣ်လီၤႉ ဖဲအပူၤကွံာ်(၂၀၂၂)လါအီကူာ်အခါန့ၣ်မ့ၢ်စ့ၢ်ကီးၦၤတဂၤလၢကၠီၣ်တဲၣ်ပၢၤကီၢ်ကရူၢ်ဖီၣ်ဃာ်အီၤ ခီဖျိလၢတၢ်ဆါအီၣ်ၦၤကညီႇကလံၤကျါတၢ်တၤကျိၣ်တၤစ့ဃုာ်ဒီးတၢ်ဖံးတၢ်မၤလၢအဖိးသဲစးတအိၣ်ဘၣ်သ့ၣ်တဖၣ် အဂ့ၢ်န့ၣ် သ့ၣ်ညါဘၣ်န့ၣ်လီၤႉ
လၢ(She Zhijiang)အဂီၢ်လၢတၢ်မၤတၢ်ဘါထုကဖၣ်တၢ်ရဲၣ်တၢ်ကျဲၤအပူၤန့ၣ်ပထံၣ်ဘၣ်လၢ တရူးၦၤဒိၣ်ကျိၣ်ဒိၣ်စ့, သုးခိးကီၢ်ဆၢ(She Zhijiang)သုးခိၣ်ခၠံၣ်သူၤဃုာ်ဒီးအဖိခွါ(၂)ဂၤႇခိၣ်နၢ်ၦၤမၤသကိးတၢ်ဖိလၢအဂၤတကးဒံးဘၣ် လီၢ်က၀ီၤကမျၢၢ်ႇ ကၠိသရၣ်သရမုၣ်ႇၦၤကၠိဖိႇသူၣ်ဘီၣ်သးစၢ်သ့ၣ်တဖၣ်ဟဲထီၣ်၀ဲဒၣ်အါအါဂီၢ်ဂီၢ်န့ၣ် ထံၣ်ဘၣ်လၢတၢ်ဂီၤမူ ရၤလီၤသးတခါအံၤ အပူၤန့ၣ်လီၤႉ
ဒ်တၢ်ဂီၤမူတခါအံၤပူၤပာ်ဖျါ၀ဲအသိးန့ၣ် တၢ်ရဲၣ်တၢ်ကျဲၤအပူၤထံၣ်ဘၣ်လၢသုးခိၣ်ခၠံၣ်သူၤထီၣ်ကတိၤလီၤတၢ်လၢ တၢ်မဲာ်ညါ အိၣ်ဘၣ်ဆၣ်တၢ်ဂီၤမူအပူၤတၢ်ပာ်ဖျါအီၤဒၣ်ထဲတၢ်ကတိၤလီၢ်ခံကတၢၢ်လၢဆၢဂ့ၤဆၢ၀ါဟီၣ်က၀ီၤသုးဖိ သံၣ်ဖိႇကမျၢၢ်ႇ ကၠိသရၣ်သရမုၣ်ဃုာ်ဒီးၦၤကၠိဖိသ့ၣ်တဖၣ်န့ၣ်လီၤႉ
“တနံၤအံၤလၢ(She Zhijiang)အဂီၢ်တၢ်ဘါထုကဖၣ်တၢ်ရဲၣ်တၢ်ကျဲၤအံၤအပူၤသီခါႇၦၤမၤသကိးတၢ်ဖိႇ စွ့ၣ်ကိၣ်ကိၤ ကမျၢၢ်ထံဖိကီၢ်ဖိႇၦၤကၠိဖိႇကၠိသရၣ်သရၣ်မုၣ်ဃုာ်ဒီး(BGF)သုးခိၣ်သုးနၢ်ႇသုးဖိသံၣ်ဖိတဖၣ်ခဲလၢာ်လီၢ်ခံကတၢၢ် ကအိၣ်ဘၣ်ထူးထူးတီၤတီၤႇကအိၣ်ဆူၣ်အိၣ်ချ့ဒီးတၢ်လၢသုမိၣ်န့ၢ်သးလီတဖၣ်ကလၢၦဲၤဘၣ်၀ဲတက့ၢ်” သုးခိၣ်စီၤခၠံၣ်သူၤ စံးလီၤလၢတၢ်ထုကဖၣ်တၢ်ရဲၣ်တၢ်ကျဲၤပူၤန့ၣ်လီၤႉ
တၢ်ထုကဖၣ်တၢ်ရဲၣ်တၢ်ကျဲၤဘျီ၀ဲအံၤအပူၤန့ၣ်တရူးဃုာ်ဒီး(BGF)သုးခိၣ်သုးနၢ်သုးမုၢ်သံၣ်ဘိႇကမျၢၢ်လၢအဟဲ ထီၣ်တၢ်ရဲၣ် တၢ်ကျဲၤတဖၣ်ခဲလၢာ်ဟဲကူဟဲသိး၀ဲဒၣ်ဆ့ကၤ၀ါလၢအမဲာ်ညါအိၣ်၀ဲဒီး(She Zhijiang)အတၢ်ဂီၤႇတကးဒံးဘၣ်တၢ်ရဲၣ် တၢ်ကျဲၤအပူၤတရူးၦၤဒိၣ်ကျိၣ်ဒိၣ်စ့ဒီးသီခါႇ(BGF)သုးခိၣ်ခၠံၣ်သူၤႇခိၣ်နၢ်လၢအဂၤတဖၣ်ပျၢ်ဖျဲးထီၣ်သကိး၀ဲထိၣ်လွံၢ်၀ါဆူမူခိၣ်ႇတၢ်ဆၢတံၢ်သကိးတၢ်ကံညာ်က့ဂီၤဂီၤဖိလၢပျံၤလိၤတၢ်ဟူးတၢ်ဂဲၤသ့ၣ်တဖၣ်ပၣ်ဃုာ်၀ဲ အဂ့ၢ်န့ၣ် သ့ၣ်ညါဘၣ်န့ၣ်လီၤႉ
(She Zhijiang)လၢအဘၣ်တၢ်မၤတၢ်ထုကဖၣ်လၢအဂီၢ်တဂၤအံၤမ့ၢ်တဂၤလၢအမၤသကိးတၢ်ဒီး သုးကီၣ်ကးစုတီၤ ဖီလာ်သုးခိးကီၢ်ဆၢ(BGF)ခိၣ်နၢ်တနီၤဒီးဒ်န့ၣ်အသိးမ့ၢ်စ့ၢ်ကီးၦၤတဂၤလၢအသူၣ်ထီၣ်၀ဲဒၣ်စွ့ၣ်ကိၣ်ကိၤ၀့ၢ်သီ တၢ်တိာ်ကျဲၤ အံၤန့ၣ်လီၤႉ
ဘၣ်ဃးသုးခိၣ်ခၠံၣ်သူၤမၤ၀ဲဒၣ်တၢ်ထုကဖၣ်တၢ်ရဲၣ်တၢ်ကျဲၤအံၤအဖီခိၣ် ကညီတၢ်ဆီၣ်ထွဲမၤစၢၤတၢ်မုာ်တၢ်ခုၣ်ၦာ်ဘျးစဲ (KPSN) ၦၤနဲၣ်တၢ် နီၢ်၀ါခုၣ်ဆှံ ပဲာ်ထံနီၤဖး၀ဲဒ်အံၤန့ၣ်လီၤႉ
“တရူးတဂၤအံၤတၢ်ဖီၣ်အီၤလၢတၢ်ကမၣ်ဖးဒိၣ်မီၤနီၤႉဘၣ်ဃးလၢတၢ်လံၣ်အီၣ်လီအီၣ်တၢ်လၢကလံၤကျါမ့ၢ်ဂ့ၤႇတၢ်ဖံးတၢ်မၤလၢတဖိးသဲစးတဖၣ်အဃိပနၢ်ဟူလၢတရူးပဒိၣ်လိၣ်ဘၣ်အီၤဒီးကဲ၀ဲဒၣ်ၦၤဘၣ်တၢ်ကမၣ်ဖိမီၤႉနါက့လၢၦၤကညီဖိတနီၤလီၤဆီဒၣ်တၢ်(BGF)သုးခိၣ်ခၠံၣ်သူၤမၤတၢ်ထုကဖၣ်လၢအဂီၢ်အဃိဖျါလလီၤရၢၢ်လီၤစၢၢ်ဒိၣ်မးလီၤႉဘၣ်မနုၤလဲၣ်ၦၤတဂၤလၢအကဲ(World Criminal)န့ၣ်ၦၤဖီၣ်အီၤလံမးဘါထုကဖၣ်တၢ်လၢအဂီၢ်ဒံးႉခီဖျိပကဲၦၤတကလုာ်ဃီအဃိဘၣ်ဒိဘၣ် ထံးစ့ၢ်ကီးပၦၤကညီမီၤနီၤႉအဃိလီၤရၢၢ်ဖးဒိၣ်လၢၦၤကညီတၢ်စံၣ်စိၤတဲစိၤမ့ၢ်ဂ့ၤႇမ့ဘၣ်တဲလၢတၢ် အိၣ်သးအဖီခိၣ်န့ၣ် တလီၤနာ်ဘၣ်မီၤနီၤႉဘၣ်ဆၣ်ဒ်လဲၣ်ဂ့ၤ(BGF)သုးခိၣ်ခၠံၣ်သူၤနါက့ဘၣ်တၢ်ယၢၤထီၣ်အမံၤဒီးနမ့ကွၢ်လၢတၢ်ကစီၣ်ပူၤမ့ၢ်ဂ့ၤန့ၣ်အတၢ်ဘၣ်ဃးအိၣ်အသိးအ၀ဲစ့ၢ်ကီးအိၣ်၀ဲလၢ(Black List)အပူၤလီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်-ကညီတၢ်ကစီၣ် န့ၣ်လီၤႉ
ဒ်ထံဂုၤကီၢ်ဂၤတၢ်ဃိထံသ့ၣ်ညါကရူၢ်ဃုသ့ၣ်ညါပာ်ဖျါ၀ဲအသိးန့ၣ် ကလံၤကျါတၢ်လံၣ်အီၣ်လီအီၣ်ကျိၣ်စ့တၢ်ဖံး တၢ်မၤႇ တၢ်တၤကျိၣ်တၤစ့ဃုာ်ဒီးတၢ်ဖံးတၢ်မၤလၢအဖိးမံသဲစးတအိၣ်ဘၣ်သ့ၣ်တဖၣ်အံၤ အတၢ်ဘၣ်ထွဲအိၣ်၀ဲဒီး (BGF)ခိၣ် အဟံၣ်ဖိဃီဖိဒီးတကးဒံးဘၣ်အ၀ဲသ့ၣ်စ့ၢ်ကီးဒိးန့ၢ်ဘၣ်၀ဲတၢ်ဘၣ်ဘျုးအိၣ်၀ဲအဂ့ၢ်န့ၣ် သ့ၣ်ညါဘၣ်န့ၣ်လီၤႉ
တကးဒံးဘၣ်လၢန့ၣ်အမဲာ်ညါသုးခိၣ်ခၠံၣ်သူၤဒီးတရူး(She Zhijiang)အတၢ်ပာ်ဖှိၣ်မၤသကိးတၢ်အံၤအိၣ်ဖျါ၀ဲဖျိဖျိဖျါဖျါ အသိးအတၢ်မၤတၢ်ထုကဖၣ်တၢ်ရဲၣ်တၢ်ကျဲၤအံၤအဖီခိၣ်ကဲထီၣ်တၢ်အုၣ်ကီၤသးလီၤတံၢ်ဒိၣ်ထီၣ်၀ဲအဂ့ၢ်န့ၣ် နီၢ်၀ါခုၣ်ဆှံ စံး၀ဲန့ၣ်လီၤႉ
“အတၢ်ပၣ်ဃုာ်ပၣ်ဂီၢ်ဒုအိၣ်ဖျါကြၢၢ်ကလာ်လီၤႉတၢ်ဟီၣ်က၀ီၤ၀ဲန့ၣ်ကဲ၀ဲဒၣ်အဟီၣ်က၀ီၤဒီးအ၀ဲသ့ၣ်နါက့အိၣ်လၢကီၢ်ပယီၤသုးတၢ်တီခိၣ်ရိၣ်မဲတၢ်ဟံစုနဲၣ်ကျဲဖီလာ်မ့၀ံၤၦၤလၢတၢ်ဖီၣ်အီၤခဲအံၤဒီးသုးခိၣ်ခၠံၣ်သူၤန့ၣ်အတၢ်ဘျးစဲမ့ၢ်ဒၣ်တၢ်တမံၤဃီလီၤနသမၢအလီၢ်တအိၣ်ဘၣ်ႉတၢ်ဃိထံသ့ၣ်တဖၣ်န့ၣ်မ့ၢ်ဒၣ်အမ့ၢ်အတီအဘၣ်လီၤႉပမ့ဘၣ်ကွၢ်တၢ်သ့ၣ်တဖၣ်အံၤန့ၣ်တၢ်ကဟံထီၣ်ဂ့ၢ်၀ီကဘှါဆှဲအီၤန့ၣ်တအိၣ်ခီတခါဘၣ်ႉအဂၤတခါန့ၣ်တၢ်ဘၣ်ဒိဘၣ်ထံးလၢတၢ်ဖံးတၢ်မၤသ့ၣ်တဖၣ်အံၤမ့ဘၣ်ကွၢ်န့ၣ်ဟူလၢတၢ်ကစီၣ်သန့ဟီၣ်ခိၣ်ဒီတဘ့ၣ်လီၤႉအဃိတၢ်လၢအတကြၢးကဲထီၣ်ဘၣ်န့ၣ်ကဲထီၣ်သးႇတၢ်ခဲလၢာ်န့ၣ်တၢ်လၢအပိာ်ထွဲထီၣ်အခံန့ၣ်ပာ်ဖျါထီၣ်၀ဲတၢ်အုၣ်ကီၤသးလီၤတံၢ်ဒိၣ်ထီၣ်လီၤမီၤနီၤ”အဂ့ၢ်န့ၣ် စံး၀ဲန့ၣ်လီၤႉ
တကတီၢ်ဃီ(She Zhijiang)အံၤလၢကလံၤကျါတၢ်လံၣ်အီၣ်လီအီၣ်ကျိၣ်စ့တၢ်ဖံးတၢ်မၤသ့ၣ်တဖၣ်အံၤအဃိ မ့ၢ်ၦၤတဂၤ လၢတရူးပဒိၣ်လိၣ်ဘၣ်အီၤအသိးထံဂုၤကီၢ်ဂၤပၢၤကီၢ်ကရူၢ်စ့ၢ်ကီးဘၣ်တၢ်ပာ်ပနီၣ်အီၤလၢၦၤလၢတၢ်ဘၣ်ယိၣ်အိၣ်တဂၤအဂ့ၢ်န့ၣ် သ့ၣ်ညါဘၣ်န့ၣ်လီၤႉ
ဒ်န့ၣ်အသိးဘၣ်ဃးသုးခိးကီၢ်ဆၢ(BGF)ခိၣ်နၢ်တနီၤအတၢ်မၤ၀ဲဒၣ်တၢ်ထုကဖၣ်လၢတရူး(She Zhijiang)အဂီၢ် အဖီခိၣ်အံၤန့ၣ် ကညီပိာ်မုၣ်ကရၢ(KWO)ကရၢခိၣ် နီၢ်ကညီဖီစ့ၢ်ကီးပဲာ်ထံနီၤဖးစံး၀ဲလၢ“ဘၣ်ဃးလၢစွ့ၤကိၣ်ကိၤ တၢ်မၤတၢ်ထုကဖၣ်လၢတရူးတဂၤန့ၣ်အဂီၢ်တရူးတဂၤန့ၣ်ဘၣ်တၢ်ဖီၣ်အီၤခီဖျိၦၤလၢအဘျးစဲလၢတၢ်ဘျၢလီၤကျိၣ်စ့လၢတၢ်တၤကျိၣ်တၤစ့မ့ၢ်ဂ့ၤႇတၢ်လံၣ်အီၣ်လီအီၣ်ၦၤကညီတဖၣ်မ့ၢ်ဂ့ၤတကးဘၣ်ဟီၣ်က၀ီၤဖဲန့ၣ်သ့ၣ်တဖၣ်အိၣ် (Human Trafficking)တၢ်ဆါအီၣ်ၦၤကညီမ့ၢ်ဂ့ၤႇတၢ်သ့ၣ်တဖၣ်မ့ဘၣ်တဲန့ၣ်မ့ၢ်တၢ်လၢအတဂ့ၤဘၣ်ခဲလၢာ် လီၤႉခီဖျိ တၢ်အုၣ်သး တဖၣ်အိၣ်အဃိန့ၣ်တရူသ့ၣ်တဖၣ်တၢ်ဖီၣ်အီၤဒီးလၢအံၤတကပၤၦၤကညီခီဒုခီးလဲၤဘါထုကဖၣ်လၢအဂီၢ်ဒ်သိးလၢအကထူၣ်ဖျဲးထီၣ်ကွံာ်ဧါဒ်န့ၣ်အဃိတပာ်ဖျါထီၣ်၀ဲဒၣ်တၢ်အိၣ်ဖျါလၢအဂ့ၤနီတစဲးဘၣ်ႉဘၣ်မနုၤဃိလဲၣ်ပကျဲးစၢးဒ်သိးလၢတၢ်တၤကျိၣ်တၤစ့လၢအိၣ်ပဟီၣ်က၀ီၤပူၤသ့ၣ်တဖၣ်အံၤသုတအိၣ်လၢၤတဂ့ၤအဂီၢ်ႉအဃိပမ့မၤဒ်အံၤလီၤဂာ်ဒ်သိးဖျါလိၤလိၤလၢဟီၣ်ခိၣ်ဒီဘ့ၣ်အမဲာ်ညါလၢပပၣ်ဃုာ်ပၣ်ဂီၢ်လီၤနီၤႉအဃိလၢကညီဖိအဂီၢ်န့ၣ်ကဲ၀ဲဒၣ်တၢ်လီၤသးအုးဖးဒိၣ်တခါလီၤႉႉ”အဂ့ၢ်န့ၣ် စံး၀ဲန့ၣ်လီၤႉ
လၢန့ၣ်အမဲာ်ညါခီဖျိတၢ်တၤကျိၣ်တၤစ့ႇတၢ်လံၣ်အီၣ်လီအီၣ်ၦၤကညီလၢကလံၤကျါတၢ်ဖံးတၢ်မၤသ့ၣ်တဖၣ်အံၤ ဟဲအိၣ်လၢၦၤကညီဖိအကျါအဃိကဲထီၣ်တၢ်သူၣ်တမုာ်သးတမုာ်ဖးဒိၣ်ညါအသိးတၢ်သ့ၣ်တဖၣ်အံၤအလီၢ်အိၣ် စ့ၢ်ကီးလၢတၢ်ကဘၣ်ဘှါဆှဲအီၤလၢအဆိအချ့အဂ့ၢ်န့ၣ် နီၢ်ကညီဖီ စံးအါထီၣ်၀ဲန့ၣ်လီၤႉ
စွ့ၤကိၣ်ကိၤဟီၣ်က၀ီၤအပူၤကလံၤကျါတၢ်လံၣ်အီၣ်လီအီၣ်ကျိၣ်စ့တၢ်ဖံးတၢ်မၤႇကၣ်စံၣ်နိၣ်ဃုာ်တၢ်ဖံးတၢ်မၤလၢ အတဖိး သဲစးဘၣ်သ့ၣ်တဖၣ်အံၤဘၣ်တၢ်ဒီသဒၢဟံန့ၢ်တၢ်ဘံၣ်တၢ်ဘၢလၢသုးခိးကီၢ်ဆၢ(BGF)တကးဒံးဘၣ်ပၣ်ဃုာ်၀ဲဒၣ် လၢ တၢ်ဘျၢလီၤကျိၣ်စ့အိၣ်အဃိကယဲၢ်မ့ၢ်(BGF)အမုၢ်ကျိၤ၀ဲၤကွာ်တၢ်ဖံးတၢ်မၤသ့ၣ်တဖၣ်န့ၣ် သုးခိၣ်ခၠံၣ်သူၤဒီးအဖိမုၣ်ဖိခွါ ပၢဘၣ်၀ဲကအိၣ်လၢ ၅၀ မျးကယၤဃၣ်ဃၣ်ညါအဂ့ၢ်န့ၣ် (Justice For Myanmar)ထုးထီၣ်ပာ်ဖျါ၀ဲအသိးသ့ၣ်ညါဘၣ် န့ၣ်လီၤႉ