လါစဲးပထ့ဘၢၣ် ၂ သီႇ ၂၀၂၄ နံၣ်ႇ ခ့ၣ်အဲးစံၣ်
ခ့ၣ်အဲၣ်ယူၣ် ဒူသထူၣ်ကီၢ်ရ့ၣ်(သုးက့ ၁)ကၠဲးထိၣ်ကီၢ်ဆၣ်အပူၤ ကရူၢ်ခံဘ့ၣ်ကမျၢၢ်လၢအဘၣ်စံၣ်ဘၣ်ဃ့ၢ်လၢ ပယီၤသုး အတၢ်ခးလီၤကျိဖးဒိၣ်အဃိအံၤတဖၣ်လၢအီၣ်အီအဂီၢ် ဖဲအပူၤကွံာ်စှၤသီအခါကညီပိာ်မုၣ်ကရၢ(KWO)တီခိၣ်ရိၣ်မဲ ဟ့ၣ်လီၤ၀ဲဂ့ၢ်ဂီၢ်အူ စ့ဆီၣ်ထွဲမၤစၢၤအဂ့ၢ်န့ၣ် သ့ၣ်ညါဘၣ်န့ၣ်လီၤႉ
ခီဖျိကျိဖးဒိၣ်ဒီးတၢ်ဒုးတၢ်ယၤအဃိ ခရၢၢ်ကရူၢ် သ၀ီ(၈)ဖျၢၣ် ဟံၣ်ခိၣ်(၁၀၄၇)ဖျၢၣ်လၢအဘၣ်ဃ့ၢ်မှံဟးဖျိးတဖၣ် ဖဲအပူၤကွံာ်လါအီကူာ် ၂၈ သီအနံၤန့ၣ် (KWO)ဟ့ၣ်လီၤမၤစၢၤ၀ဲဒၣ်ဂ့ၢ်ဂီၢ်အူစ့ဆီၣ်ထွဲမၤစၢၤလၢဟံၣ်တဖျၢၣ် (၅၀၀၀၀) ကၠးအဂ့ၢ်န့ၣ် ကီၢ်ရ့ၣ်ၦၤဘၣ်မူဘၣ်ဒါ စံး၀ဲန့ၣ်လီၤႉ
ဒ်န့ၣ်အသိးတကတီၢ်ဃီမုၢ်ဆ့ၣ်ထီၣ်လါအီကူာ် ၂၉ သီအနံၤစ့ၢ်ကီး လဲၤဟ့ၣ်လီၤကဒီးစ့ဆီၣ်ထွဲမၤစၢၤလၢ ဖှ့ဖူကၢ် ကရူၢ် သ၀ီ(၇)ဖျၢၣ် ဟံၣ်ခိၣ်(၈၁၃)ဖျၢၣ်လၢအဘၣ်ဃ့ၢ်တၢ်ဒုးတၢ်ယၤအံၤလၢဟံၣ်တဖျၢၣ်(၅၀၀၀၀)ကၠး စ့ၢ်ကီးအဂ့ၢ်န့ၣ် သ့ၣ်ညါဘၣ်န့ၣ်လီၤႉ
တကးဒံးဘၣ်တၢ်လဲၤဟ့ၣ်စ့တၢ်ဆီၣ်ထွဲမၤစၢၤဘျီ၀ဲဖှ့ဖူကၢ်ကရူၢ် အပူၤကွံာ်ကျိဖးဒိၣ်အဃိကမျၢၢ်လၢအသံခံဂၤဒီး ဘၣ်ဒိလွံၢ်ဂၤအံၤတၢ်ဆီၣ်မၤစၢၤ၀ဲတဂၤ(၂၀၀၀၀၀)ကၠးဒီးကမျၢၢ်လၢပယီၤသုးဒွဲၣ်အူအီၣ်အဟံၣ်ခံဖျၢၣ်စ့ၢ်ကီးမၤစၢၤ၀ဲ ဟံၣ်တဖျၢၣ်(၄၀၀၀၀၀)ကၠးစုာ်စုာ်အဂ့ၢ်န့ၣ် လီၢ်က၀ီၤၦၤဘၣ်မူဘၣ်ဒါ စံး၀ဲန့ၣ်လီၤႉ
တၢ်လဲၤဟ့ၣ်လီၤစ့ဆီၣ်ထွဲမၤစၢၤဘျီ၀ဲအံၤ ကရူၢ်ခံဘ့ၣ် သ၀ီခဲလၢာ်(၁၅)ဖျၢၣ်ႇ ဟံၣ်ခိၣ်ပာ်ဖှိၣ်(၁၈၅၉)ဖျၢၣ် ဒီး ကျိၣ်စ့လၢတၢ်ဆီၣ်ထွဲမၤစၢၤ၀ဲအံၤမ့ၢ်ဒ်သိးကမျၢၢ်ကၦ့ၤအီၣ်ကဒါက့ၤတၢ်အီၣ်တၢ်အီသ့ၣ်တဖၣ်လီၤအဂ့ၢ်န့ၣ် KWO ကရၢ်ခိၣ် နီၢ်ကညီဖီ စံးဘၣ်ခ့ၣ်အဲးစံၣ်-ကညီတၢ်ကစီၣ်န့ၣ်လီၤႉ
“ညီနုၢ်ပိာ်မုၣ်ကရၢ်န့ၣ်လီၢ်က၀ီၤပူၤကမျၢၢ်တဖၣ်မ့ဘၣ်ကွၢ်ဆၢၣ်မဲာ်တၢ်ဂ့ၢ်ကီလၢပယီၤသုးအတၢ်ထီၣ်ဒုးဒီး ဘၣ်စံၣ်မှံ ဟးဖျိးတဖၣ်မ့၀ံၤခီဖျိကျိဖးဒိၣ်ႇကဘီယူၤအဃိၦၤလၢအဘၣ်သံဘၣ်ၦၢ်ဘၣ်ဒိဘၣ်ထံးတဖၣ်ၦၤမ့ပာ်ဖျါထီၣ် န့ၢ်ၦၤန့ၣ် ပမၤစၢၤအ၀ဲသ့ၣ်မီၤနီၤႉခဲအံၤန့ၣ်ပမၤစၢၤအ၀ဲသ့ၣ်လၢစ့ပမၢအ၀ဲသ့ၣ်ၦ့ၤအီၣ်က့ၤတၢ်အီၣ်တၢ်အီလီၤမီၤနီၤႉ ဘၣ်မနုၤအဃိ လဲၣ်န့ၣ်ခဲအံၤတၢ်လဲၤတၢ်က့ၤတညီဘၣ်အဃိပလဲၤခီဖျိလၢလီၢ်က၀ီၤသ့ၣ်တဖၣ်ကတၢၣ်ပီၣ်လိာ်သးဟ့ၣ်မ့ညီလၢဟုသးဒီးကၦ့ၤဖှိၣ်ဟုသးႇမ့တညီဘၣ်န့ၣ်ဟ့ၣ်လီၤလၢစ့လၢကၦ့ၤအီၣ်က့ၤ၀ဲလၢအနီၢ်ကစၢ်ဒ်န့ၣ်မီၤနီၤ”အဂ့ၢ်န့ၣ် စံး၀ဲန့ၣ် လီၤႉ
တကီၢ်ခါခဲအံၤကရူၢ်ခံဘ့ၣ်လၢတၢ်လဲၤဟ့ၣ်စ့တၢ်ဆီၣ်ထွဲမၤစၢၤအံၤအကျါမ့မ့ၢ်လၢဖှ့ဖူကၢ်ကရူၢ်ကမျၢၢ်လၢအဃ့ၢ်ထီၣ်တဖၣ်က့ၤအိၣ်လၢအဒူသ၀ီပူၤလံဒီးမ့မ့ၢ်လၢခရၢၢ်တကပၤခီန့ၣ်ခီဖျိပယီၤသုးခးလီၤဒံးကျိဖးဒိၣ်အိၣ်အဃိ ကမျၢၢ်က့ၤအိၣ်အိၣ် ဘၣ်ဆၣ်တနီၤန့ၣ်က့ၤအိၣ်၀ဲတဘူၣ်ဒံးဘၣ်စ့ၢ်ကီးအိၣ်၀ဲအဂ့ၢ်န့ၣ် လီၢ်က၀ီၤၦၤဘၣ်မူဘၣ်ဒါလၢအိၣ် ဖဲန့ၣ်စံး၀ဲန့ၣ်လီၤႉ
“ခဲအံၤကရူၢ်ခံဘ့ၣ်န့ၣ်ၦၤကမျၢၢ်က့ၤအိၣ်လၢာ်လံႉက့ၤအိၣ်ဘၣ်ဆၣ်လၢခရၢ၁်ဒီးစ့းကွ့တဖၣ်န့ၣ်ၦၤက့ၤအိၣ်တဘူၣ်အါအါ ဒံးဘၣ်ႉဖဲမုၢ်နၤန့ၣ်ကျိဖးဒိၣ်လီၤဒံးတဖျၢၣ်ဒံးဖဲ ၁၁ နၣ်ရံၣ်အဆၢကတီၢ်န့ၣ်”အဂ့ၢ်န့ၣ် စံးဘၣ်ခ့ၣ်အဲးစံၣ်-ကညီတၢ် ကစီၣ် ဖဲတနံၤအံၤန့ၣ်လီၤႉ
ဒ်ကီၢ်ရ့ၣ်တၢ်မၤနီၣ်စရီပူၤအိၣ်၀ဲအသိးန့ၣ် ကၠဲးထိၣ်ကီၢ်ဆၣ်ပူၤ ကရူၢ်ခံဘ့ၣ်အံၤ ဖဲအပူၤကွံာ်လါယူၤထီၣ်အခါန့ၣ် ခီဖျိပယီၤသုးကျိၤနုာ်လီၤဟူးဂဲၤအါထီၣ်ဒီးခးလီၤ၀ဲကျိဖးဒိၣ်အဃိၦၤကမျၢၢ်လၢအိၣ်ဖဲန့ၣ်တဖၣ်ဘၣ်ဃ့ၢ်ထီၣ်၀ဲဒၣ် ခဲလၢာ်ဃၣ်ဃၣ်အဂ့ၢ်န့ၣ် သ့ၣ်ညါဘၣ်န့ၣ်လီၤႉ