လါစဲးပထ့ဘၢၣ် ၁၁ သီႇ ၂၀၂၄ နံၣ်ႇ ခ့ၣ်အဲးစံၣ်
ကီၢ်ကၠီၣ်တဲၣ်-ကီၢ်ပယီၤကီၢ်ဆၢ မဲၢ်လးဘၣ်ကီဘၣ်ခဲဒဲက၀ီၤအပူၤ လါလၢကဟဲန့ၣ်လၢၦၤဒဲက၀ီၤဖိအဂီၢ် တၢ်ကအိးထီၣ်န့ၢ်၀ဲတၢ်လုၢ်အီၣ်နီၢ်ခိသးသမူတၢ်စုသ့ခီၣ်ဘၣ်ဒီးကံၢ်စီတၢ်သ့တၢ်ဘၣ်တၢ်ဒိၣ်ထီၣ်ထီထီၣ်တၢ်တိၤကျဲၤ တၢ်မၤလိတခါလၢၦၤဒဲက၀ီၤဖိအဂီၢ်အဂ့ၢ်န့ၣ် သ့ၣ်ညါဘၣ်န့ၣ်လီၤႉ
မဲၢ်လးဘၣ်ကီဘၣ်ခဲဒဲက၀ီၤအပူၤ ၦၤကမျၢၢ်တဖၣ်ဒ်သိးအ၀ဲသ့ၣ်ကသ့ဖံးအီၣ်မၤအီၣ်တၢ်ဒီးအိၣ်ဆၢထၢၣ်လၢ နီၢ်ကစၢ်ခီၣ် ကသ့အဂီၢ်န့ၣ် လါလၢကဟဲလါအီးကထိဘၢၣ်အံၤ ဒဲက၀ီၤ(ADRA)ဒီးၦၤဘၣ်မူဘၣ်ဒါဘၣ်ထွဲတဖၣ်တီခိၣ်ရိၣ်မဲက အိးထီၣ်န့ၢ်၀ဲတၢ်လုၢ်အီၣ်နီၢ်ခိသးသမူတၢ်သ့တၢ်ဘၣ်ဒ်အမ့ၢ်တၢ်ခၠးဆဲး,တၢ်တ့ကိၣ်ဒီးခီၣ်ဖၠူထၢၣ်တၢ်သ့တၢ်ဘၣ်တၢ်မၤလိတဖၣ်အံၤလၢ ၦၤဒဲက၀ီၤဖိအဂီၢ်အဂ့ၢ်န့ၣ် မဲၢ်လးဒဲက၀ီၤၦၤဘၣ်မူဘၣ်ဒါစံး၀ဲန့ၣ်လီၤႉ
ဘၣ်ဃးတၢ်ကဟ့ၣ်တၢ်မၤလိဘျီ၀ဲအံၤအတၢ်ပညိၣ်ဒီးတၢ်အိၣ်သးအဂ့ၢ်အကျိၤန့ၣ် မဲၢ်လးဒဲက၀ီၤ ADRA Coordinator ၦၤဘၣ်မူဘၣ်ဒါ စီၤကပီၤမူ စံး၀ဲလၢ“ပတၢ်ပညိၣ်န့ၣ်အိၣ်ဒ်သိးၦၤကိးဂၤဒဲးအနီၢ်ကစၢ်ကစးထီၣ်တၢ်ဖံးတၢ်မၤလၢ တၢ်လုၢ် အီၣ်နီၢ်ခိသးသမူကသ့ဒီးဆၢထၢၣ်လၢအကစၢ်ခီၣ်ကသ့အဂီၢ်န့ၣ်ပမၤစၢၤဒ်အံၤလီၤမီၤႉကမၤ၀ဲတၢ်လုၢ်အီၣ်နီၢ်ခိသးသမူန့ၣ်ကမ့ၢ်ဒၣ်ခီၣ်ခါအဆိကတၢၢ်တခါလၢအ၀ဲသ့ၣ်အဂီၢ်မီၤနီၤဒ်န့ၣ်ႉပကိးၦၤကညီဘျီ၀ဲအံၤပပာ်ပနီၣ်ဃာ်လၢခီၣ်ဖၠူထၢၣ်န့ၣ်ပကကိး(၂၂)ဂၤႇလၢတၢ်တ့ကိၣ်န့ၣ်ပကကိးအစှၤကတၢၢ်(၂၅)ဂၤဒီးမ့မ့ၢ်လၢတၢ်ခၠးဆဲးတကပၤခီန့ၣ်ပကကိး၀ဲအဂၤ(၂၀)လီၤႉ”အဂ့ၢ်န့ၣ် စံးဘၣ်ခ့ၣ်အဲးစံၣ်-ကညီတၢ်ကစီၣ်န့ၣ်လီၤႉ
လၢန့ၣ်အမဲာ်ညါၦၤဘၣ်ကီဘၣ်ခဲဖိလၢအိၣ်ဒဲက၀ီၤအပူၤတဖၣ်လၢကလဲၤဃုဖံးဃုလၢတၢ်ချၢအဂီၢ်န့ၣ် တၢ်ဂ့ၢ်ကီအိၣ်အဃိ ညီနုၢ်တၢ်အိးထီၣ်န့ၢ်၀ဲတၢ်စုသ့ခီၣ်ဘၣ်တၢ်မၤလိလၢအ၀ဲသ့ၣ်အဂီၢ်ဒီးတကးဒံးဘၣ် တၢ်မၤလိတၢ်ကဟ့ၣ်၀ဲခဲအံၤစ့ၢ်ကီးန့ၣ် ကကဲထီၣ်တၢ်တိစၢၤမၤစၢၤတဆံးတက့ၢ်လၢၦၤဒဲက၀ီၤဖိအဂီၢ်အဂ့ၢ်န့ၣ် သရၣ်စီၤကပီၤမူ စံး၀ဲန့ၣ်လီၤႉ
“ကကဲထီၣ်ဒိၣ်ထီၣ်၀ဲဒၣ်မ့တမ့ၢ်ဒိၣ်ဒိၣ်မုၢ်မုၢ်ဘၣ်ဆၣ်ကအိၣ်ဆၢထၢၣ်၀ဲလၢနီၢ်ကစၢ်တဂၤကသ့၀ဲလီၤမီၤနီၤႉ ဒ်သိးတၢ်ဟဲနုာ်ကအိၣ်လၢအဟံၣ်ဖိဃီဖိပူၤတဆံးတက့ၢ်ဒီးကကဲထီၣ်တၢ်မၤစၢၤတဆံးတက့ၢ်လၢအ၀ဲသ့ၣ် အတၢ်အိၣ်မူ ပူၤအဂီၢ်ႉမ့၀ံၤတနီၤနီၤန့ၣ်အ၀ဲသ့ၣ်မ့ဂုၤကျဲးစၢး၀ဲဒ်အဂုာ်ကျဲးစၢး၀ဲအသိးဒုကကဲထီၣ်ခီၣ်ခါဖးဒိၣ်လၢအ၀ဲသ့ၣ်တၢ်အိၣ်မူအဂီၢ်လီၤမီၤနီၤ”အဂ့ၢ်န့ၣ် စံးန့ၣ်လီၤႉ
ဒ်န့ၣ်အသိးၦၤလၢအပတံထီၣ်တၢ်သ့ၣ်တဖၣ်န့ၣ်ကဘၣ်မ့ၢ်သးနံၣ်အိၣ်(၁၈)နံၣ်တုၤ(၅၉)နံၣ်ဒီးတၢ်စးထီၣ်ပထံထီၣ်အီၤသ့၀ဲဖဲတလါအံၤလါစဲးပထ့ဘၢၣ် ၁၀ သီတုၤ ၂၂ သီအသိး တၢ်ကဘၣ်လဲၤဟံန့ၢ်လံာ်လၢဒဲက၀ီၤ(Vocational Training) ၀ဲၤဒၢးႇ က၀ီၤဒ့(Zone C C3-A)အမဲာ်ညါဒဲက၀ီၤအ၀ဲၤဒၢးသ့ၣ်တဖၣ်ဒီး ဖဲ(၂၆)သီအနံၤန့ၣ် တၢ်ကစးထီၣ်မၤ၀ဲ တၢ်သံဒိးသံကွၢ်အဂ့ၢ်န့ၣ် သ့ၣ်ညါဘၣ်န့ၣ်လီၤႉ
လၢၦၤဒဲက၀ီၤဖိအဂီၢ်တၢ်လုၢ်အီၣ်နီၢ်ခိသးသမူတၢ်စုသ့ခီၣ်ဘၣ်လၢတၢ်ကအိးထီၣ်၀ဲဘျီ၀ဲအံၤန့ၣ် တၢ်ကစးထီၣ်အီၤ ဖဲလါလၢကဟဲလါအီးကထိဘၢၣ် ၁ သီတုၤလၢလါဒံၣ်စ့ဘၢၣ် ၁၅ သီခိၣ်ဃၢၤ တၢ်ဆၢကတီၢ်လၢခံလါဘျဲၣ်အတီၢ်ပူၤ အဂ့ၢ်န့ၣ် သ့ၣ်ညါဘၣ်န့ၣ်လီၤႉ
ဒ်(၂၀၂၄)နံၣ်တၢ်မၤနီၣ်စရီပူၤအသိးန့ၣ် တကီၢ်ခါခဲအံၤမဲၢ်လးဘၣ်ကီဘၣ်ခဲဒဲက၀ီၤအပူၤ ဟံၣ်ခိၣ်အိၣ်၀ဲအဖျၢၣ် (၆၀၀၀)ဃၣ်ဃၣ်ဒီးၦၤနီၣ်ဂံၢ်ပာ်ဖှိၣ်ခဲလၢာ်အိၣ်၀ဲ(၃၀၀၀၀)ဃၣ်ဃၣ်အဂ့ၢ်န့ၣ် သ့ၣ်ညါဘၣ်လၢဒဲက၀ီၤၦၤဘၣ်မူဘၣ်ဒါ အအိၣ်န့ၣ်လီၤႉ