ကီးတရံး-မၠၣ်၀တံၣ်ကျဲ တၢ်ပၢၢ်ဆၢသုးကရူၢ်ဒီးအီၣ်စ့ၣ်ယးသုးကျိၤသုးပၥ်ဖှိၣ်တၢ်ဒုးအပူၤတၢ်မၤန့ၢ်ကျိချံပှၥ်သၣ်တနီၤ

လါအီးကထိဘၢၣ် ၂၈ သီ, ၂၀၂၄ နံၣ်, ခ့ၣ်အဲးစံၣ်

ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ ဒူပျၥ်ယၥ်ကီၢ်ရ့ၣ် ကီးတရံးကီၢ်ဆၣ် ကီးတရံး-မၠၣ်၀တံၣ်အ့ရှါကျဲမုၢ် ပယီၤသုးလၢ အဟဲထီၣ်(စစ်ကူ)တဖၣ်အံၤဒီးတၢ်ပၢၢ်ဆၢသုးပၥ်ဖှိၣ်ကရူၢ်အဘၢၣ်စၢၤတၢ်ဒုးကဲထီၣ်၀ဲဒီး တၢ်ဒုးဘျီ၀ဲအံၤအပူၤ တၢ်မၤ၀ဲဒုၣ်ဒါအ ကျိချံပှၥ်သၣ်တနီၤအဂ့ၢ်န့ၣ် ကလံၤထံးသုးဟီၣ်က၀ီၤ (PDF)တၢ်ကစီၣ်ဒီးတၢ်ဘိးဘၣ်ရၤလီၤ ထုးထီၣ်ပၥ်ဖျါ၀ဲဖဲတဟါ လါအီးကထိဘၢၣ် ၁၇ သီအနံၤန့ၣ်လီၤ.

ဖဲလါအီးကထိဘၢၣ် ၂၆ သီအနံၤ သုးကီၣ်ကးအသုးတြိၤ(၅၅),စကခ(၁၂),သုးတြိၤ(၄၄),အီၣ်စ့ၣ်ယးသုးကျိၤသုးပၥ်ဖှိၣ်သ့ၣ်တဖၣ် အံၤ လၢအဟဲထီၣ်(စစ်ကူ)ဆူမၠၣ်၀တံၣ်အဂီၢ် ဖဲဟဲထီၣ်လၢကျဲတၢ်ဒ့ၣ်စၢၤအခါတၢ်ဒုးကဲထီၣ်၀ဲဒီး(KNLA)တၢ်ပၢၢ်ဆၢသုးပၥ်ဖှိၣ် ကရူၢ်လၢအဃိ တၢ်မၤန့ၢ်ဒုၣ်ဒါအကျိချံပှၥ်သၣ်တနီၤအမဲၥ်ညါဒုၣ်ဒါတကပၤသံဘၣ်ဒိဘၣ်ထံးအိၣ်၀ဲအဂ့ၢ်န့ၣ် ကလံၤထံးသုးဟီၣ်က၀ီၤ တၢ်ကစီၣ်ဒီးတၢ်ဘိးဘၣ်ရၤလီၤလံၥ်တၢ်ပၥ်ဖျါအပူၤ ပၥ်ဖျါ၀ဲန့ၣ်လီၤ.

ခံခီခံကပၤတၢ်ဒုးကဲထီၣ်ဘျီ၀ဲအံၤအပူၤန့ၣ် တၢ်ပၢၢ်ဆၢသုးပၥ်ဖှိၣ်မၤန့ၢ်၀ဲ(RPG)အချံ,(၆၀ မမ)အချံ,(၄၀ မမ)အချံ ဃုၥ်ဒီးမ့ၣ်ပိၢ်လၢ အဂၤ ပၥ်ဖှိၣ်ကအိၣ်၀ဲ(၄၀)ခိၣ်ဃၢၤဒီး ဒုၣ်ဒါသံဘၣ်ဒိဘၣ်ထံးအမဲၥ်ညါ မ့မ့ၢ်လၢတၢ်ပၢၢ်ဆၢသုးပၥ်ဖှိၣ်ကရူၢ်တကပၤန့ၣ်ဘၣ်ဒိ(၃)ဂၤ တၢ်ဘၣ်ယိၣ်တအိၣ်အဂ့ၢ်န့ၣ် သ့ၣ်ညါဘၣ်န့ၣ်လီၤ.

ဒ်န့ၣ်အသိးတၢ်ဒုးဘျီ၀ဲအံၤန့ၣ်မ့ၢ်၀ဲကညီဒီကလုၥ်တၢ်ထူၣ်ဖျဲးသုးမုၢ်ဒိၣ်(KNLA),ကလံၤထံးသုးဟီၣ်က၀ီၤ သုးဟီၣ်က၀ီၤဒ့ နီၣ်ဂံၢ်(၃), ခီၤဘြၤသုးကျိၤ(၁), ခီၤဘြၤသုးကျိၤ(၂), ခ့ဖါသူသုးကျိၤ,ဘီသိၣ်၀ါသုးကျိၤ,ယီၤနံၤ(Golden Eagle)ဒြိသုးကရူၢ်, Federal Wings/Justice Wings/Fixed Wings သုးပၥ်ဖှိၣ်သ့ၣ်တဖၣ်အံၤ မၤ၀ဲဒုးယၤတၢ်ဟူးတၢ်ဂဲၤအဂ့ၢ်န့ၣ် သ့ၣ်ညါဘၣ်န့ၣ်လီၤ.

သုးကီၣ်ကးအံၤလၢကဒိၣ်စိက့ၤ၀ဲကညီကီၣ်စဲၣ် ကီၢ်ကၠီၣ်တဲၣ်-ကီၢ်ပယီၤကီၢ်ဆၢ မၠၣ်၀တံၣ်၀့ၢ်အံၤလၢလၢပှဲၤပှဲၤအဂီၢ်န့ၣ် စးထီၣ်ဖဲအပူၤကွံၥ်လါအ့ဖြ့ၣ်အခါန့ၣ် လၢကီးတရံး-မၠၣ်၀တံၣ်အ့ရှါကျဲမုၢ်အသီဒီးကျဲမုၢ်လီၢ်လံၤအံၤတဆီ (အောင်ဇေယျ) သုးကျိၤ သုးပၥ်ဖှိၣ်ဟဲထီၣ်၀ဲဒီးတုၤလၢခဲအံၤဟဲထီၣ်တၢ်ဆၢကတီၢ်န့ၢ်၀ဲ(၅)လါဘျဲၣ်လံဘၣ်ဆၣ်ခီဖျိတၢ်ပၢၢ်ဆၢသုးပၥ်ဖှိၣ်ခိးခး၀ဲလၢတၢ်ဒ့ၣ်စၢၤအဃိတုၤလၢခဲအံၤမၠၣ်၀တံၣ်၀့ၢ်ဃၢၤမးဟဲထီၣ်တတုၤဒံး၀ဲဘၣ်အဂ့ၢ်န့ၣ် သ့ၣ်ညါဘၣ်န့ၣ်လီၤ.