လါနိၣ်၀့ဘၢၣ် ၃ သီ, ၂၀၂၄ နံၣ်, ခ့ၣ်အဲးစံၣ်
ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ ဒူသထူၣ်ကီၢ်ရ့ၣ်(သုးက့ ၁)ကၠဲးထိၣ်ကီၢ်ဆၣ်အပူၤ ပယီၤသုးကျိၤလၢအနုၥ်လီၤဟူးဂဲၤ တဖၣ်အံၤဒီးဟီၣ်က၀ီၤ(KNLA)သုးပၥ်ဖှိၣ်အဘၢၣ်စၢၤ တၢ်ဒုးဆဲးကဲထီၣ်၀ဲလၢခံခီခံကပၤအဘၢၣ်စၢၤအိၣ်၀ဲကိးမုၢ်နံၤဒဲးဃၣ်ဃၣ်ဒီး ဒုၣ်ဒါတကပၤတၢ်သံတၢ်ဘၣ်ဒိဘၣ်ထံးအိၣ်၀ဲအဂ့ၢ်န့ၣ် ဂံၢ်ခီၣ်ထံးပှၤဟ့ၣ်တၢ်ကစီၣ်ဖိစံး၀ဲန့ၣ်လီၤ.
ကၠဲးထိၣ်ကီၢ်ဆၣ် ဖွ့ဖူကၢ်ကရူၢ် ဖွ့ဖူကၢ်သ၀ီအပူၤ ဖဲတနံၤအံၤလါနိၣ်၀့ဘၢၣ် ၃ သီ ဂီၤခီအဆၢကတီၢ်န့ၣ် တၢ်ဒုးကဲထီၣ်ကဒီး၀ဲလၢ ကညီဒီကလုၥ်တၢ်ထူၣ်ဖျဲးသုးမုၢ်ဒိၣ်(KNLA) သုးရ့ၣ် ၃ သုးပၥ်ဖှိၣ်ဒီးပယီၤသုးတဘၢၣ်စၢၤအဂ့ၢ်န့ၣ် တၢ်ပၢၢ်ဆၢသုးကရူၢ်တကပၤ စံး၀ဲဒ်အံၤန့ၣ်လီၤ.
“တၢ်ဒုးကဲထီၣ်ဒုနနၥ်အဘျီမးတဘၣ်လၢၤဘၣ်.တနံၤအံၤဖဲမုကၢၤနါက့တိနိၣ်လိၥ်လၢသ၀ီပူၤခးလိၥ်သးတဘျီကဒီးလံ. ကဲထီၣ်ဖဲဖွ့ဖူကၢ်သ၀ီပူၤလီၤ.တၢ်ဒုး.ကဲထီၣ်န့ၣ်ဖဲမုကၢၤမုၢ်ထူၣ် ၁၁း၅၉ န့ၣ်လီၤ. ပယီၤသုးန့ၣ်အ၀ဲသ့ၣ်ကက့ၤလီၤကဒါဆူလၥ်ခီ တကပၤမီၤ. အ၀ဲသ့ၣ်န့ၣ်လဲၤထီၣ်တုၤလၢ(နးစ့ၣ်)၀ံၤ ဟဲက့ၤလီၤကဒါ,ဖဲအဟဲက့ၤလၢကျဲအခါ ပှၤလူၤတရီးခးအခိၣ်.”အဂ့ၢ်န့ၣ် စံးဘၣ်ခ့ၣ်အဲးစံၣ်-ကညီတၢ်ကစီၣ်ဖဲတနံၤအံၤန့ၣ်လီၤ.
ဒ်န့ၣ်အသိးဖဲမဟါလါနိၣ်၀့ဘၢၣ် ၂ သီ မုၢ်ဃ့ၢ်လီၤအဆၢကတီၢ်န့ၣ်စ့ၢ်ကီး လၢပနွဲၢ်လူၢ်သ၀ီဃၢၤန့ၣ် တၢ်ဒုးကဲထီၣ်စ့ၢ်ကီး၀ဲ ၂ ဘျီ ဒံး အသိး ပယီၤသုးတကပၤသံဘၣ်ဒိဘၣ်ထံးအိၣ်ကအါဘၣ်ဆၣ်တဲလီၤတံၢ်တဘၣ်ဒံးဘၣ်ဒီးမ့မ့ၢ်လၢတၢ်ပၢၢ်ဆၢသုးပၥ်ဖှိၣ်တကပၤ တၢ်သံတၢ်ဘၣ်ဒိဘၣ်ထံးတအိၣ်၀ဲဘၣ်အဂ့ၢ်န့ၣ် ဂံၢ်ခီၣ်ထံးပှၤဟ့ၣ်တၢ်ကစီၣ်ဖိ တဂၤဃီ၀ဲန့ၣ် စံးအါထီၣ်၀ဲန့ၣ်လီၤ.
“ဖဲမဟါလၢပနွဲၢ်လူၢ်သ၀ီဃၢၤန့ၣ်တၢ်ဒုးကဲထီၣ်(၂)ဘျီညါ.အကဲထီၣ်န့ၣ်ဖဲမုၢ်ဃ့ၢ်လီၤ ၁း၁၅ တဘျီဒီး လၢ ၂း၄၅ တဘျီ. တၢ်ခးလိၥ်သးကဲထီၣ်တၢတဘျီန့ၣ်ကတံၥ်တၥ်လၢအမံးနံး ၂၀ .လၢခံတဘျီခီန့ၣ်တၢ်ဆၢကတီၢ်ကတံၥ်တၥ်လၢတခီနၣ်ရံၣ် ညါမီၤနီၤ.ယဆိမိၣ်ပယီၤတကပၤဒုသံဘၣ်ဒိဘၣ်ထံးဖးအါညါ,ဘၣ်ဆၣ်လီၤတံၢ်ဒုတသ့ၣ်ညါခဲလၢၥ်ဘၣ်.တၢ်မၢၤလၢအ၀ဲသ့ၣ် အသွံၣ်လီၤတ့ၢ်သ့ၣ်မတၤဒုအိၣ်ဖးအါဖိညါ.မ့မ့ၢ်လၢအံၤတကပၤဒုတၢ်ဘၣ်ဒိဘၣ်ထံးတအိၣ်နီတဂၤဘၣ်”အဂ့ၢ်န့ၣ် စံး၀ဲန့ၣ်လီၤ.
ဒ်န့ၣ်အသိးဖဲမဟါတၢ်ဒုးကဲထီၣ်အကတီၢ် ခီဖျိပယီၤသုးတကပၤခးလီၤကျိဖးဒိၣ်အဃိ ပနွဲၢ်လူၢ်သ၀ီဖိကမျၢၢ်အဟံၣ်ဟးဂီၤ၀ဲဒၣ် တဖျၢၣ်ဒီး တုၤလၢခဲအံၤတၢ်ဖ့ၣ်စၢဆဲးကဲထီၣ်ဒံး၀ဲလၢခံခီခံကပၤအဘၢၣ်စၢၤအဂ့ၢ်န့ၣ် ပှၤလၢအဘူးဒီးတၢ်ပၢၢ်ဆၢ သုးကရူၢ်တဖၣ် စံး၀ဲန့ၣ်လီၤ.
ကၠဲးထိၣ်ကီၢ်ဆၣ်ပူၤ စးထီၣ်ဖဲလါအီးကထိဘၢၣ် ၃၀ သီ ဂီၤခီအဆၢကတီၢ်န့ၣ် ပယီၤသုးတဒူၣ်ဃီ၀ဲအံၤလၢအနီၣ်ဂံၢ်ကအိၣ်(၁၀၀) ဘျဲၣ်ခိၣ်ဃၢၤအံၤ စးထီၣ်နုၥ်လီၤ၀ဲဒၣ်လၢ၀ီၢ်ကျီၢ်ကရူၢ် လၢၢ်ပူၣ်သ၀ီ (KNLA)သုးရ့ၣ် ၃ တၢ်ပၢဟီၣ်က၀ီၤပူၤ၀ံၤ တၢ်ဒုးကဲထီၣ်ဒံး၀ဲဒီး ဒ်န့ၣ်အသိး တၢ်တနံၤန့ၣ်ပယီၤသုးဒွဲၣ်အူအီၣ်၀ဲသ၀ီပူၤတၢ်သူၣ်ထီၣ်တဖျၢၣ်ဒံးအဂ့ၢ်န့ၣ် သ့ၣ်ညါဘၣ်န့ၣ်လီၤ.