လါဒံၣ်စ့ဘၢၣ် ၁၃ သီ, ၂၀၂၄ နံၣ်, ခ့ၣ်အဲးစံၣ်
ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ ဖၣ်အၣ်ကီၢ်ရ့ၣ် ဒူယီၢ်ကီၢ်ဆၣ်အပူၤ ဖဲအပူၤကွံၥ်လါဒံၣ်စ့ဘၢၣ် ၈ သီအနံၤန့ၣ် သးစၢ်လၢအသးနံၣ်ကအိၣ်ဖဲ(၁၀)နံၣ်ဘျဲၣ်လၢအိၣ်ခလိးသ၀ီအံၤတဂၤ ဖဲအဟဲက့ၤလၢဘူၣ်က့ၤလၢကျဲအခါ ဘၣ်တၢ်ခးသံအီၤဖဲ ပယီၤသုးဒီး သုးခိးကီၢ်ဆၢ(BGF)သုးပၥ်ဖှိၣ်သုးကလၢၤတၢ်သမံသမိးတြဲၤအံၤ အဂ့ၢ်န့ၣ် ကမျၢၢ်အိၣ်၀့ၢ်ပူၤတဖၣ်စံး၀ဲန့ၣ်လီၤ.
ဖဲလါဒံၣ်စ့ဘၢၣ် ၈ သီ ဟါခီ(၁၂)နၣ်ရံၣ်ဃၣ်ဃၣ်အဆၢကတီၢ် သးစၢ်လၢအသံတဂၤအံၤ ဖဲအလဲၤကွၢ်ကၠး(ဇာတ်ပွဲ)လၢပှၤသ၀ီ၀ံၤ ကက့ၤဆှၢအတၢ်အဲၣ်တီမုၣ်လၢ(စၤဖလံ)သ၀ီ က့ၤတုၤဖဲ(မၠဲၤသၤယၤ)သုးပၥ်ဖှိၣ်တၢ်သမံသမိးတြဲၤအခါန့ၣ် ပယီၤသုးအံၤ ကသမံသမိးအီၤဘၣ်ဆၣ်ခီဖျိအ၀ဲအတအိၣ်ပတုၥ်ဆဲးကဲးဘၣ်အဃိ ဘၣ်တၢ်ခးသံအီၤအဂ့ၢ်န့ၣ် သ၀ီဖိလၢအိၣ်ဘူးဖဲန့ၣ်တဂၤ စံး၀ဲန့ၣ်လီၤ.
“တၢ်ကဲထီၣ်သးန့ၣ်ဖဲအ၀ဲသ့ၣ်လဲၤကွၢ်ဘူၣ်ဟဲက့ၤလၢကျဲအခါမီၤနီၤ.အတၢ်အဲၣ်တီမုၣ်န့ၣ်နီဆဲးကဲး,အ၀ဲခီန့ၣ်အိၣ်လၢအလီၢ်ခံ. ဖဲအ၀ဲသ့ၣ်ဟဲက့ၤတုၤဖဲတၢ်သမံသမိးတြဲၤဘျီန့ၣ်မ့မ့ၢ်ပှၤအဂၤတဖၣ်န့ၣ်ဒိးသမံသမိးအသး.မ့မ့ၢ်လၢအ၀ဲသ့ၣ်ဆဲးကဲးခီန့ၣ် တဒိးသမံသမိးအသးဘၣ်,အဃိပှၤခးသံအီၤ”အဂ့ၢ်န့ၣ် စံး၀ဲန့ၣ်လီၤ.
လၢန့ၣ်အမဲၥ်ညါဖဲတၢ်ကဲထီၣ်သးတနၤဃီ၀ဲန့ၣ် ပယီၤသုးလၢအိၣ်ခိးတၢ်ဖဲတၢ်သမံသမိးတြဲၤ၀ဲန့ၣ်တဖၣ်ခးပိၢ်ထီၣ်၀ဲကျိ တစှၤန့ၢ် (၅)ထံၣ်အဂ့ၢ်န့ၣ် ပှၤလၢအိၣ်ဘူးဖဲတၢ်ခိၣ်တၢ်ဃၢၤဖဲန့ၣ်တဖၣ် စံး၀ဲအသိး သ့ၣ်ညါဘၣ်န့ၣ်လီၤ.
ပယီၤသုးပၥ်ဖှိၣ်လၢအိၣ်ခိးတိၢ်ဖဲမၠဲၤသၤယၤတၢ်သမံသမိးတြဲၤအံၤတဖၣ် ခိးသမံသမိးသိလ့ၣ်,သိလ့ၣ်ယီၢ်လၢအလ့ၢ်ထီၣ်လ့ၢ်လိၤ ဖဲန့ၣ်တဖၣ်ဒီးထၢ၀ဲစ့အိၣ်၀ဲအဂ့ၢ်န့ၣ် လီၢ်က၀ီၤကမျၢၢ် စံး၀ဲန့ၣ်လီၤ.
ပှၤနီသိလ့ၣ်ဖိတဂၤစံး၀ဲလၢ“အ၀ဲသ့ၣ်န့ၣ်သမံသမိးပှၤအိၣ်လၢသိလ့ၣ်ပူၤတဖၣ်လၢနအိၣ်ဟဲဖဲလဲၣ်,နကလဲၤဖဲလဲၣ်ဒ်န့ၣ်. မ့မ့ၢ်သိလ့ၣ်လၢအကလဲၤထီၣ်ဆူမၠၣ်၀တံၣ်တဖၣ်ခီန့ၣ်အ၀ဲသ့ၣ်သမံသမိး၀ဲဖးယံၤညါ”အဂ့ၢ်န့ၣ် စံးဘၣ်ခ့ၣ်အဲးစံၣ်-ကညီတၢ်ကစီၣ် န့ၣ်လီၤ.
ကညီကီၢ်စဲၣ်အပူၤ ဖဲတၢ်ဒုးတၢ်ယၤကဲထီၣ်အကတီၢ်အံၤ ဒူသ၀ီလၢအိၣ်ဒူယီၢ်ကီၢ်ဆၣ်ပူၤအံၤတဖၣ်တနီၤန့ၣ် ဖဲတၢ်မၤဘူၣ်မၤဘါ, တၢ်အိးထီၣ်တိၤမူးတၢ်ရဲၣ်တကျဲၤအခါန့ၣ်လၢဘူၣ်အပူၤအိၣ်ဃုၥ်၀ဲဒီးတၢ်သူၣ်၀ံၣ်သးဆၢ,တၢ်ဂဲၤကလံၣ်ကၠးသ့ၣ်တဖၣ် တၢ်ထၢနုၥ်ဃုၥ်၀ဲအိၣ်အဂ့ၢ်န့ၣ် သ့ၣ်ညါဘၣ်န့ၣ်လီၤ.