တၢ်သုးကွံၥ်ကၠီၣ်တဲၣ်ပၢၤကီၢ်ခိၣ်နၢ်(၃)ဂၤလီၢ်ကျဲခီဖျိထံဆၢကီၢ်ဆၢတၢ်လံၣ်အီၣ်လီအီၣ်မၤကၤပှၤကညီ

လါယနူၤအါရံၤ ၂၈သီ, ၂၀၂၅နံၣ်, ခ့ၣ်အဲးစံၣ်,

ကီၢ်ကၠီၣ်တဲၣ်ကီၢ်ပယီၤကီၢ်ဆၢမဲၢ်ဆီး,မဲၢ်ရမး,ဖိးဖရၣ်ဝ့ၢ်တၢ်လီၢ်သၢတီၤအပူၤ,တၢ်သုးကွံၥ်ကွံၥ်ဝဲယိၤကၠီၣ်တဲၣ်ပၢၤကီၢ်ခိၣ်နၢ်(၃)ဂၤလၢတၢ်ဖံးတၢ်မၤအပူၤခီဖျိထံဆၢကီၢ်ဆၢတၢ်လံၣ်အီၣ်လီအီၣ်,တၢ်မၤကၤပှၤကညီအဃိအဂ့ၢ်,ကၠီၣ်တဲၣ်တၢ်ကစီၣ်သန့တဖၣ်ပၥ်ဖျါဝဲန့ၣ်လီၤ.

ကီၢ်ကၠီၣ်တဲၣ်,ကီၢ်ပယီၤကီၢ်ဆၢပၢၤကီၢ်ခိၣ်နၢ်လၢဘၣ်တၢ်သုးကွံၥ်ဝဲအတၢ်ဖံးတၢ်မၤလီၢ်တဖၣ်အံၤမ့ၢ်ဝဲမဲၢ်ဆီးပၢၤကီၢ်ခိၣ်(PittayakornPetcharat),မဲၢ်ရမးပၢၤကီၢ်ခိၣ်(ThampongPhetcharapirun)ဒီး,ဖိးဖရၣ်ပၢၤကီၢ်ခိၣ်(ChatchaiKhamying)သ့ၣ်တဖၣ်အဂ့ၢ်,သ့ၣ်ညါဘၣ်န့ၣ်လီၤ.

ဒီးကၠီၣ်တဲၣ်ပၢၤကီၢ်ခိၣ်သ့ၣ်တဖၣ်အံၤတၢ်သုးကွံၥ်ဝဲအတၢ်မၤလီၢ်ကျဲခီဖျိဟီၣ်ကဝီၤအပူၤတၢ်တီခိၣ်ရိၢ်မဲမၤစှၤလီၤဝဲတၢ်မၤလံၣ်အီၣ်လီအီၣ်ပှၤကညီ,တၢ်မၤကၤထံဂုၤကီၢ်ဂၤဖိလၢကီၢ်ဆၢရၤမတံတၢ်လီၢ်တၢ်ကျဲတဖၣ်အပူၤတအိၣ်ဝဲဘၣ်အဃိအဂ့ၢ်,ကၠီၣ်တဲၣ်တၢ်ကစီၣ်(BorderNewsAgency)ပၥ်ဖျါဝဲဖဲမဟါလါယနူၤအါရံၤ(၂၇)သီအနံၤန့ၣ်လီၤ.

တကးဒံးဘၣ်,ပၢၤကီၢ်ခိၣ်နၢ်လၢတၢ်သုးကွံၥ်လီၢ်(၃)ဂၤအံၤကီၢ်ရ့ၣ်ပၢၤကီၢ်ခိၣ်နၢ်တဖၣ်ဟ့ၣ်လီၤဝဲတၢ်ကလုၢ်လၢကဘၣ်က့ၤဖံးမၤက့ၤဝဲတၢ်ဆူ,အနီၢ်ကစၢ်တၢ်လီၢ်ကီၢ်ခီဒိၣ်(၆)ဝဲၤလီၢ်ခိၣ်သ့ၣ်အဂ့ၢ်,(BorderNewsAgency)ပၥ်ဖျါစ့ၢ်ကီးဝဲဒၣ်န့ၣ်လီၤ.

တကတီၢ်ဃီ,ဘၣ်ဃးဒီးတၢ်မၤကၤဝဲပှၤကညီဖဲထံဆၢကီၢ်ဆၢတၢ်ဂ့ၢ်အံၤန့ၣ်,စးထီၣ်ဖဲလါယနူၤအါရံၤထီၣ်သီအပူၤတၢ်ထံၣ်န့ၢ်က့ၤဝဲတရူးပှၤဂဲၤဒိဖိ(၀ါရှ့)အလီၢ်ခံ,လၢကမၤစှၤလီၤဒီးမၤလီၢ်မၢ်ကွံၥ်ဝဲတၢ်မၤကၤထံဂုၤကီၢ်ဂၤဖိသ့ၣ်တဖၣ်အဂီၢ်,ကၠီၣ်တဲၣ်ပှၤဘၣ်မူဘၣ်ဒါတဖၣ်စးထီၣ်မၤဃံးထီၣ်ဝဲတၢ်သမံသမိးလၢထံဆၢကီၢ်ဆၢတၢ်ဟးထီၣ်က့ၤလီၤကျဲဒ်အမ့ၢ်,ကဘီယူၤသန့,သိလ့ၣ်သန့ဒီးတၢ်နုၥ်လီၤခူသူၣ်ကျဲတၢ်ဟးထီၣ်က့ၤလီၤကျဲတဖၣ်အပူၤအိၣ်ဝဲဒၣ်န့ၣ်လီၤ.

ဒီးလၢတၢ်မၤဃံးထီၣ်ဝဲကီၢ်ဆၢကျဲတဖၣ်အပူၤန့ၣ်,ကီၢ်ကၠီၣ်တဲၣ်ကီၢ်ပယီၤကီၢ်ဆၢတးကီၢ်ရ့ၣ်ကီၢ်ဆၣ်(၅)ဘ့ၣ်လၢအမ့ၢ်,မဲၢ်ရမး,မဲၢ်ဆီး,ဖိးဖရၣ်,အူးဖၣ်ဒီးထၣ်စီၤယါတၢ်လီၢ်တၢ်ကျဲပၣ်ဃုၥ်ပၣ်ဂီၢ်ဝဲဒၣ်အသိး,ကၠီၣ်တဲၣ်ပှၤဘၣ်မူဘၣ်ဒါတဖၣ်အံၤသမံသမိးဃံးထီၣ်ဝဲတၢ်လၢပၥ်ပနီၣ်ဝဲကျဲသ့ၣ်တဖၣ်အပူၤအိၣ်ဝဲအမဲၥ်ညါ,ကးတံၥ်ကွံၥ်ဝဲကီၢ်ဆၢတဖိးမံသဲစးတၢ်နုၥ်လီၤဟးထီၣ်ကျဲဒီးပျံၤထးတဖၣ်အိၣ်ဝဲအဂ့ၢ်,သ့ၣ်ညါဘၣ်န့ၣ်လီၤ.