လါယနူၤအါရံၤ ၁၃ သီ, ၂၀၂၅ နံၣ်, ခ့ၣ်အဲးစံၣ်
ခ့ၣ်အဲၣ်ယူၣ် ဒူသထူၣ်ကီၢ်ရ့ၣ်(သုးက့ ၁) ဘံလ့ကီၢ်ဆၣ်အပူၤ ဖဲမဟါမုၢ်နၤခီအဆၢကတီၢ် မဲးပြ့ခံပယီၤသုးကလၢၤခးလီၤကျိဖးဒိၣ် အဃိ ကျိဖးဒိၣ်အက့အခီဘၣ်၀ဲအံစူၢ်ခံကမျၢၢ်တဂၤတဘၣ်ယိၣ်တအိၣ်ဒီး ဟံၣ်တၢ်သူၣ်ထီၣ်ဟးဂီၤ၀ဲဒၣ်(၆)ဖျၢၣ်အဂ့ၢ်န့ၣ် သ့ၣ်ညါဘၣ်လၢသုးက့ပှၤဘၣ်မူဘၣ်ဒါအအိၣ်န့ၣ်လီၤ.
ဖဲမဟါလါယနူၤအါရံၤ ၁၂ သီ မုၢ်နၤခီ ၁၀ နၣ်ရံၣ်ဃၣ်ဃၣ်အဆၢကတီၢ်န့ၣ် မဲးပြ့ခံပယီၤသုးခီၣ်ချ့သုးရ့ၣ်(ခမရ-၄၀၅)သုးရ့ၣ်အံၤ ခးလီၤကျိဖး ဒိၣ်(၃)ဖျၢၣ်ဆူအံစူၢ်ခံကရူၢ်ပူၤအဃိ အံစူၢ်ခံသ၀ီဖိဘၣ်ဒိဒီးပှၤကမျၢၢ်ဟံၣ်တၢ်သူၣ်ထီၣ် ဘၣ်ဟးဂီၤကဲထီၣ်၀ဲဒၣ်ဒ်အံၤ လီၤအဂ့ၢ်န့ၣ် (သုးက့ ၁) သုးက့ခိၣ် သုးခိၣ်ကျၢၢ်ဖိ စီၤစိမၠ့ၣ်ထွ့ စံး၀ဲန့ၣ်လီၤ.
အ၀ဲစံး၀ဲလၢ“ဖဲမနၤ အနၣ်ရံၣ်(၁၀)န့ၣ်ပယီၤသုးလၢမဲးပြ့ခံန့ၣ်ခးလီၤကျိဖးဒိၣ်လၢအံစူၣ်ခံသ၀ီပူၤ. ပှၤသ၀ီဖိဘၣ်ဒိတဂၤန့ၣ် ကျိဖးဒိၣ်အက့အခီဘၣ်တပျၥ်တစဲးဖိလီၤ.ဟံၣ်ဟးဂီၤ၀ဲဒၣ်(၆)ဖျၢၣ်”အဂ့ၢ်န့ၣ် စံးဘၣ်ခ့ၣ်အဲးစံၣ်-ကညီ တၢ်ကစီၣ်ဖဲတဂီၤ အံၤန့ၣ်လီၤ.
ဒ်န့ၣ်အသိးဖဲအပူၤကွံၥ်လါယနူၤအါရံၤ ၅ သီ ဟါခီ ၄ နၣ်ရံၣ်ဒီး ၅ နၣ်ရံၣ်အဆၢကတီၢ်န့ၣ်စ့ၢ်ကီး မဲးပြ့ခံပယီၤသုးတဒူၣ်ဃီ၀ဲအံၤ ခးလီၤ၀ဲကျိဖးဒိၣ်(၉)ဖျၢၣ် လီၤတဲၥ်ပိၢ်ဖးထီၣ်၀ဲလၢအံစူၢ်ခံသ၀ီပူၤအဃိ ဘၣ်သံ၀ဲဒၣ်ပှၤကမျၢၢ်ပနၢ်(၃)ဒု,ကျီၢ်(၁)ဒုဒီး မဲးတဲးလဲး(၂)ဒုကဲထီၣ်တ့ၢ်အသးဒံးအဂ့ၢ်န့ၣ် သ့ၣ်ညါဘၣ်လၢကီၢ်ရ့ၣ်တၢ်မၤနီၣ်စရီအပူၤန့ၣ်လီၤ.
မဲးပြ့ခံသုးကလၢၤအံၤစးထီၣ်ဖဲလါယနူၤအါရံၣ်ထီၣ် ၁ သီအနံၤန့ၣ် ဟီၣ်က၀ီၤကညီဒီကလုၥ်ဂၢၤသးကရၢ(KNDO) သုးရ့ၣ်(၂) သုးပၥ်ဖှိၣ် လဲၤခးစဲးပြဲး၀ဲဒီးတၢ်ဒုးစ့ၢ်ကီးကဲထီၣ်အဃိ ဖဲန့ၣ်ပယီၤသုးကဘီယူၤဟဲခးလီၤတၢ်အမဲၥ်ညါ ပယီၤသုးလၢအိၣ် သုးကလၢၤပူၤအံၤ စ့ၢ်ကီးခးလီၤကျိဖးဒိၣ်အဃိ ဒူသ၀ီတစှၤန့ၢ်(၅)ဖျၢၣ်လၢအိၣ်ဘူးဖဲန့ၣ်ကမျၢၢ်တဖၣ်ဃ့ၢ်ထီၣ်၀ဲဒၣ်တုၤလၢခဲအံၤ အဂ့ၢ်န့ၣ် သ့ၣ်ညါဘၣ်န့ၣ်လီၤ.
ဒ်ကီၢ်ရ့ၣ်ဒီးလီၢ်က၀ီၤပှၤဘၣ်မူဘၣ်ဒါစံး၀ဲအသိးန့ၣ် တကီၢ်ခါခဲအံၤပှၤကမျၢၢ်လၢအဃ့ၢ်ထီၣ်ခီဖျိဒုးယၤတၢ်သဘံၣ်သဘုၣ် အဃိအံၤတဖၣ် ဟးစံၣ်အိၣ်လၢပှၤဒူပှၤသ၀ီတၢ်ဆၢကတီၢ်ကအိၣ်၀ဲလၢတနွံဃၣ်ဃၣ်လံအဃိ ထံၣ်ဘၣ်၀ဲဒၣ်အီၣ်အီ, အိၣ်ဆိး လီၢ်ကျဲတၢ်ဂ့ၢ်ကီသ့ၣ်တဖၣ်ဒီးလိၣ်ဘၣ်၀ဲဒၣ်တၢ်ဆီၣ်ထွဲမၤစၢၤအဂ့ၢ်န့ၣ် ကီၢ်ရ့ၣ်ပှၤဘၣ်မူဘၣ်ဒါစံး၀ဲန့ၣ်လီၤ.
တကီၢ်ခါခဲအံၤလၢမဲးပြ့ခံပယီၤသုးကလၢၤအခိၣ်အဃၢၤန့ၣ် ဒုးယၤတၢ်ဖ့ၣ်စၢဆဲးကဲထီၣ်ဒံး၀ဲလၢခံခီခံကပၤအဘၢၣ်စၢၤ တကးဒံးဘၣ် တၢ်အိၣ်သးအံၤအိၣ်လၢကဆဲးဆူၣ်ထီၣ်၀ဲအဃိ ကမျၢၢ်လၢအိၣ်ဘူးဖဲန့ၣ်တဖၣ်တုၤလၢခဲအံၤဃ့ၢ်ထီၣ်ဒံး၀ဲအိၣ် တပယူၥ်ဃီအဂ့ၢ်န့ၣ် ကမျၢၢ်လၢအိၣ်ဘူးဖဲန့ၣ်တဖၣ်စံး၀ဲအသိးသ့ၣ်ညါဘၣ်န့ၣ်လီၤ.