လါအ့ဖြ့ၣ် ၂ သီ, ၂၀၂၅ နံၣ်, ခ့ၣ်အဲးစံၣ်
လါမးရှး ၂၈ သီအနံၤလၢဟီၣ်ခိၣ်ဟူးကဲထီၣ်ဒိၣ်ဒိၣ်မုၢ်မုၢ်အံၤအဃိ ကီၢ်ပယီၤပူၤကမျၢၢ်လၢတူၢ်ဘၣ်၀ဲဟီၣ်ခိၣ်ဟူးတၢ်ဘၣ်ဒိဘၣ်ထံး တၢ်ဟးဂူၥ်ဟးဂီၤတဖၣ်အဂီၢ် ကညီကီၢ်စဲၣ် သုးခိးကီၢ်ဆၢ(BGF)ဟ့ၣ်လီၤဆီၣ်ထွဲမၤစၢၤ၀ဲစ့အကလီၢ်(၃၅၀၀၀)ကၠးအဂ့ၢ်န့ၣ် ခိၣ်နၢ်ပှၤဘၣ်မူဘၣ်ဒါတဖၣ် စံး၀ဲန့ၣ်လီၤ.
လၢဟီၣ်ခိၣ်ဟူးကဲထီၣ်သတူၢ်ကလၥ်အံၤအဃိ ကမျၢၢ်ထံဖိကီၢ်ဖိသံဘၣ်ဒိဘၣ်ထံးအါအါဂီၢ်ဂီၢ်အမဲၥ်ညါ ဟံၣ်,ကီၤလၤတၢ်ဘါ တၢ်သူၣ်ထီၣ်, ခီခါဖၠၣ်,စံၣ်စိၤနုၥ်ဃိၣ်တဖၣ်,ကၠိတၢ်သူၣ်ထီၣ်, ကျဲ,တိၤသ့ၣ်တဖၣ်ဟးဂီၤ၀ဲဒၣ်အါမးအဖီခိၣ်အံၤ သုးခိးကီၢ်ဆၢ (BGF) ထုးထီၣ်ပၥ်ဖျါ၀ဲလံၥ်တၢ်သးအုးတဘ့ၣ်ဖဲမဟါလါအ့ဖြ့ၣ် ၁ သီအနံၤန့ၣ်လီၤ.
လၢတၢ်န့ၣ်အဃိ ကမျၢၢ်လၢတူၢ်ဘၣ်ဟီၣ်ခိၣ်ဟူးတၢ်ကီတၢ်ခဲအံၤတဖၣ်အဂီၢ် ကဟ့ၣ်လီၤမၤစၢၤ၀ဲတၢ်ဆီၣ်ထွဲမၤစၢၤတဖၣ် အိၣ်၀ဲအသိး လၢတၢ်ကက့ၤ သူၣ်ထီၣ်ဆီလီၤက့ၤသးအဂီၢ်စ့ၢ်ကီးကဟ့ၣ်လီၤ၀ဲတၢ်မၤစၢၤအံၤဆူကီၢ်ပဒိၣ်ဒီးကမျၢၢ်အအိၣ် လိၤလိၤ အိၣ်၀ဲအဂ့ၢ်န့ၣ် လံၥ်တၢ်ပၥ်ဖျါအပူၤစံး၀ဲန့ၣ်လီၤ.
ဘၣ်ဃးတၢ်ဟ့ၣ်လီၤဆီၣ်ထွဲမၤစၢၤစ့ဆူကမျၢၢ်လၢတူၢ်ဘၣ်တၢ်ကီတၢ်ခဲတဖၣ်အံၤအဂ့ၢ်န့ၣ် (BGF) နီၣ်ဂံၢ်(၂) သုးဟီၣ်က၀ီၤ အခိၣ် သုးခိၣ်ကျၢၢ်ဖိ စီၤတ့ၤ၀့ စံး၀ဲလၢ “ဘၣ်ဃးလၢပတၢ်ကရၢကရိအခၢၣ်စးန့ၣ်ပမၤစၢၤခဲလၢၥ်န့ၣ်အကလီၢ်(၃၅၀၀၀)ကၠးမီၤနီၤ. ပမၤစၢၤအခိၣ်သ့ၣ်န့ၣ်လၢဟီၣ်ခိၣ်ဟူးလီၤပှီၢ်ပှၤဘၣ်ကီဘၣ်ခဲအဂီၢ်.ဘၣ်ဃးဟီၣ်ခိၣ်ဟူးတခါအံၤတဘၣ်ဃးဒီးထံရူၢ်ကီၢ်သဲး,တၢ်ဒုးတၢ်ယၤဘၣ်.တၢ်တခါအံၤဘၣ်ဃးထံဖိကီၢ်ဖိကမျၢၢ်ခဲလၢၥ်လၢအဘၣ်တူၢ်တခါအံၤအဃိန့ၣ်ပထံၣ်လၢတၢ်တခါအံၤမူဒါအိၣ်လၢပှၤကိးဂၤဒဲးလီၤမီၤ.အဃိဒ်တၢ်သ့အိၣ်ဒီးပှၤအသိးကြၢးလၢပမၤစၢၤအီၤဒီးပမၤစၢၤအီၤလီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်- ကညီတၢ်ကစီၣ် ဖဲတနံၤအံၤန့ၣ်လီၤ.
လၢန့ၣ်အမဲၥ်ညါဒ်(BGF)လံၥ်တၢ်ပၥ်ဖျါပူၤပၥ်ဖျါ၀ဲအသိးန့ၣ် လၢတၢ်ပၥ်ဖျါထီၣ်၀ဲတၢ်သူၣ်အုးသးအုးအဖီခိၣ် ကမျၢၢ်ထံဖိကီၢ်ဖိလၢ တူၢ်ဘၣ်ဟီၣ်ခိၣ်ဟူးတၢ်ကီတၢ်ခဲသ့ၣ်တဖၣ်အံၤအဂီၢ်န့ၣ် ကမၤဘူၣ်မၤဘါ,ဃ့ဘါထုကဖၣ်တၢ်လၢအ၀ဲသ့ၣ်အဂီၢ်တၢ်ရဲၣ်တၢ်ကျဲၤ သ့ၣ်တဖၣ်ကမၤ၀ဲအဂ့ၢ်န့ၣ် စံး၀ဲန့ၣ်လီၤ.
ဟီၣ်ခိၣ်ဟူးကဲထီၣ်သးဖဲလါမးရှး ၂၈ သီအခါန့ၣ် ကီၢ်ပယီၤအမဲၥ်ညါကီၢ်ကၠီၣ်တဲၣ် ဘီကီး၀့ၢ်ပူၤ တၢးတၢ်သူၣ်ထီၣ်ဖးထီတဖၣ် စ့ၢ်ကီး လီၤပှီၢ်ဟးဂီၤ၀ဲအဃိ ပှၤသံဘၣ်ဒိဘၣ်ထံးတဖၣ်အကျါပၣ်ဃုၥ်စ့ၢ်ကီး၀ဲကီၢ်ပယီၤပှၤမၤတၢ်ဖိအိၣ်၀ဲအဂ့ၢ်န့ၣ် သ့ၣ်ညါဘၣ် န့ၣ်လီၤ.
ဘၣ်ဆၣ်မ့မ့ၢ်ကီၢ်ပယီၤပူၤန့ၣ် စးထီၣ်လၢတၢ်ကဲထီၣ်သးတုၤဖဲမဟါလါအ့ဖြ့ၣ် ၁ သီ ဂီၤခီန့ၣ် ခီဖျိဟီၣ်ခိၣ်ဟူးအံၤအဃိ ကမျၢၢ်ထံဖိ ကီၢ်ဖိသံ၀ဲ (၂၇၁၉)ဘျဲၣ်, ဘၣ်ဒိဘၣ်(၄၅၂၁)ဘျဲၣ်လံအဂ့ၢ် သုးကီၣ်ကးစံးလီၤ၀ဲဖဲမဟါအိၣ်ဒီး ဘၣ်ဆၣ်တၢ်ဆၢကတီၢ်န့ၢ်၀ဲဃုသီလံ ဘၣ်ဆၣ် ပှၤလၢအလီၤမၢ်သ့ၣ်တဖၣ်တၢ်လူၤဃုအီၤတထံၣ်၀ဲခဲလၢၥ်ဒံးဘၣ်အဃိ တၢ်သံတၢ်ဘၣ်ဒိဘၣ်ထံးအနီၣ်ဂံၢ်နီၣ်ဒွး ကဟဲအါထီၣ် အါန့ၢ် အ၀ဲအံၤသ့၀ဲန့ၣ်လီၤ.
ဒ်န့ၣ်အသိးတၢ်ဆၢကတီၢ်ဖဲကမျၢၢ်ထံဖိကီၢ်ဖိဘၣ်ကွၢ်ဆၢၣ်မဲၥ်၀ဲဟီၣ်ခိၣ်ဟူးတၢ်ကီတၢ်ခဲအံၤအကတီၢ် သုးကီၣ်ကးအံၤ သူ၀ဲကဘီယူၤ,ဒြိ,ပညိၣ် လဲၤခးလီၤ၀ဲကျိဖးဒိၣ်တဖၣ်ဆူ စကဲ, မါတလ့ကီၢ်ခီ,ကခၠ့ၣ်,ခၠီ,ယိၤဒိၣ်ကီၢ်စဲၣ်,တနီသရံၣ်, ကရ့ၣ်နံၣ်, ရခၢၣ်ကီၢ်စဲၣ်ဃုၥ်ဒီးကညီကီၢ်စဲၣ်တၢ်လီၢ်တဖၣ်အပူၤအဃိ ကမျၢၢ်သံဘၣ်ဒိဘၣ်ထံးအိၣ်၀ဲအဂ့ၢ်န့ၣ် သ့ၣ်ညါဘၣ်န့ၣ်လီၤ.