လါမ့ၤ ၂၉သီ,၂၀၂၅နံၣ်,ခ့ၣ်အဲးစံၣ်.
ကညီဒီကလုၥ်စၢဖှိၣ်ကရၢ,သုးက့(၆),ဒူပျၥ်ယၤကီၢ်ရ့ၣ်,ကီးတရံးကီၢ်ဆၣ် တီနီၢ်မုၢ်ထီၣ်ဟီၣ်ကဝီၤ ကီၢ်ကၠီၣ်တဲၣ်-ကီၢ်သူလ့ၤကီၢ်ဆၢ ကနဲလ့ပယီၤသုးကလၢၤန့ၣ် ကညီဒီကလုၥ်တၢ်ထူၣ်ဖျဲးသုးဒိၣ်ဒီးကညီဒီကလုၥ်ဂၢၤသးကရၢ သုးရ့ၣ်(၈)တီခိၣ်ရိၣ်မဲသုးပၥ်ဖှိၣ်တဖၣ်ထီၣ်မၤန့ၢ်ကွံၥ်ဝဲလံအဂ့ၢ် KNLA ပှၤဘၣ်မူဘၣ်ဒါပၥ်ဂၢၢ်ပၥ်ကျၢၤဝဲဒၣ်န့ၣ်လီၤ.
ကနဲလ့ပယီၤသုးကလၢၤဝဲန့ၣ်န့ၣ် ဘၣ်တၢ်စးထီၣ်ဒုးအီၤဖဲ လါမ့ၤ(၂၇)သီအနံၤဒီး ဖဲလါမ့ၤ(၂၈)သီအနံၤမုၢ်နၤခီ(၆)နၣ်ရံၣ်ဘျဲၣ်အဆၢကတီၢ်န့ၣ်တၢ်ထီၣ်မၤန့ၢ်ကွံၥ်အီၤအဂ့ၢ် ကညီဒီကလုၥ်တၢ်ထူၣ်ဖျဲးသုးမုၢ်ဒိၣ်(KNLA) သုးရ့ၣ်(၂၀၁)အသုးရ့ၣ်ခိၣ် သုးခိၣ်ဒိၣ်ဂီၢ်ဂ့ၢ်စီၤဘုဖီ စံးဘၣ်ဝဲ ခ့ၣ်အဲးစံၣ် ကညီတၢ်ကစီၣ်ဒ်အံၤန့ၣ်လီၤ.
အဝဲစံးဝဲဒၣ်လၢ“ကနဲလ့သုးကလၢၤန့ၣ်တၢ်ထီၣ်န့ၢ်လံ. န့ၢ် န့ၣ်ကဘၣ်ဖဲဟါလီၤခီ (၆)နၣ်ရံၣ်(၇)နၣ်ရံၣ်ဆၢကတီၢ်န့ၣ်လီၤ.ဃ့ၢ်ဖျိးတနီၤ.ဖီၣ်န့ၢ်တနီၤဒီးသံတနီၤန့ၣ်လီၤ.စရီပတီၢ်န့ၣ်တၢ်မၤလီၤတံၢ်အီၤအဖၢမုၢ်န့ၣ်လီၤ.အဝဲသ့ၣ်အိၣ်ဘူးဒီးယိၤကီၢ်ဆၢအဃိန့ၣ်ဃ့ၢ်နုၥ်ဆူယိၤကီၢ်ပူၤန့ၣ်လီၤ.ပဖီၣ်န့ၢ်,အသံဒီးအဃ့ၢ်ဖျိးန့ၣ် ပယီၤသုးခဲလၢၥ်ကအိၣ် (၆၅)ဂၤမ့တမ့ၢ်(၆၆)ဂၤဖဲန့ၣ်လီၤ.”အဂ့ၢ်စံးဝဲဒၣ်န့ၣ်လီၤ.
ကနဲလ့ပယီၤသုးကလၢၤဝဲအံၤန့ၣ် မ့ၢ်ဝဲဒၣ် ခီၣ်သုးရ့ၣ်(ခလရ-၃၂)ဒီးမျိၥ်သုးကရူၢ်အိၣ်ဆီလီၤသးအဂ့ၢ်ဒီးအခဲအံၤတၢ်ထီၣ်မၤန့ၢ်ကွံၥ်အီၤလံအဃိတယံၤလၢၤဘၣ်န့ၣ်ကနဲလ့လီၢ်ကဝီၤဖိသ့ၣ်တဖၣ်ဟဲက့ၤအိၣ်ကဒါလၢသဝီကသ့ဝဲဒၣ်အဂ့ၢ်သုးခိၣ်ဒိၣ်ဂီၢ်ဂ့ၢ်စီၤဘုဖီတဲအါထီၣ်ဝဲဒၣ်စ့ၢ်ကီးန့ၣ်လီၤ.
တကီၢ်ခါခဲအံၤန့ၣ် တီနီၢ်မုၢ်ထီၣ်ဟီၣ်ကဝီၤ ဖဲတလါအံၤအတီၢ်ပူၤ ပယီၤသုးကလၢၤဒ်အမ့ၢ် ဘျၢၣ်ဒိၣ်ဒီးကနဲလ့သုးကလၢၤသ့ၣ်တဖၣ်(KNLA,KNDO)သုးပၥ်ဖှိၣ်ထီၣ်မၤန့ၢ်ကွံၥ်ဝဲအသိး ပယီၤသုးကလၢၤဒ်အမ့ၢ် သ့ၣ်ဘီဘိ,ဝၣ်မံၤထၣ်,အူးကြ့ၢ်ထၣ်,ထိကၠိ,မီခံ,ဂီၤလ့ၤ,အူးကြ့ၢ်ခံ ပယီၤသုးကလၢၤသ့ၣ်တဖၣ်အိၣ်တ့ၢ်ဒ်ဝဲဒၣ်အဂ့ၢ်သ့ၣ်ညါဘၣ်စ့ၢ်ကီးန့ၣ်လီၤ.