လါမ့ၤ ၅ သီ, ၂၀၂၅ နံၣ်, ခ့ၣ်အဲစံၣ်
ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ ဒူသထူၣ်ကီၢ်ရ့ၣ်(သုးက့ ၁)သထူးကီၢ်ဆၣ်အပူၤ ဖဲလါမ့ၤထီၣ် ၃ သီအနံၤ မိကီတိၤလၢ အိၣ်၀့ၢ်တကူၣ်-မီၣ်လမၠဲၣ်ကျဲအံၤ တၢ်လဲၤမၤဟးဂီၤ၀ံၤပယီၤသုးခးလီၤကျိဖးဒိၣ်အမဲၥ်ညါကဘီယူၤလဲၤတ့ၢ်လီၤ၀ဲမ့ၣ်ပိၢ်ခဲလၢၥ် (၈)ဖျၢၣ် အဂ့ၢ်န့ၣ် သ့ၣ်ညါဘၣ်လၢလီၢ်က၀ီၤပှၤဘၣ်မူဘၣ်ဒါအအိၣ်န့ၣ်လီၤ.
မိကီတိၤအံၤခီဖျိမ့ၢ်တိၤတဘိလၢပယီၤသုးသူ၀ဲလၢဆှၢထီၣ်သုးဂံၢ်ဘါဒီးကျိချံပှၥ်သၣ်ဆူကီးတရံး-ကြုၢ်တုတကပၤ အဃိ ဖဲလါမ့ၤ ၃ သီ ၁၁း၁၅ မံးနံးအဆၢကတီၢ်န့ၣ် ဟီၣ်က၀ီၤတၢ်ပၢၢ်ဆၢသုးပၥ်ဖှိၣ်ကရူၢ်လဲၤမၤဟးဂီၤ၀ဲတိၤဒ်အံၤလီၤအဂ့ၢ်န့ၣ် လီၢ်က၀ီၤပှၤဘၣ်မူ ဘၣ်ဒါလၢတအဲၣ်ဒိးပၥ်ဖျါအမံၤတဂၤ စံး၀ဲန့ၣ်လီၤ.
အ၀ဲစံး၀ဲလၢ“နသ့ၣ်ညါတၢလီၤခဲအံၤလၢကီးတရံးတကပၤန့ၣ်တၢ်ဒုးဆူၣ်.တိၤ၀ဲအံၤပယီၤသုးသူ၀ဲလၢဆှၢထီၣ်အသုးဂံၢ်ဘါ,ကျိချံ ပှၥ်သၣ်ပျီပျီလီၤ.အဃိပလဲၤမၤဟးဂီၤပမၤတံၥ်တၥ်အ၀ဲသ့ၣ်မီၤနီၤ.”အဂ့ၢ်န့ၣ် စံးဘၣ်ခ့ၣ်အဲးစံၣ်-ကညီတၢ်ကစီၣ်န့ၣ်လီၤ.
တၢ်လဲၤမၤဟးဂီၤမိကီတိၤ၀ံၤဖဲမဟါမုၢ်ဆ့ၣ်ထီၣ်လါမ့ၤ ၄ သီ ၁း၁၀ မံးနံးအဆၢကတီၢ်န့ၣ် ပယီၤသုး(၃၁၀)အမျိၥ်သုး ခးလီၤ ကျိဖးဒိၣ် ၂ ဖျၢၣ်,ကဘီယူၤစ့ၢ်ကီးလဲၤတ့ၢ်လီၤ၀ဲမ့ၣ်ပိၢ် ၂ ဖျၢၣ် လီၤတဲၥ်ပိၢ်ဖးထီၣ်လၢစွ့ၣ်ယီၣ်ပၠးကရူၢ် မံၣ်ကၠီအဲၣ်သ၀ီဃၢၤ အဃိ သီခါဖၠၣ်တၢ်သူၣ်ထီၣ်,ရီဘၢၣ်ထူၣ်သ့ၣ်တဖၣ်ကၢ်လီၤ၀ဲဒၣ် သ့ၣ်ညါဘၣ်လၢလီၢ်က၀ီၤပှၤဘၣ်မူဘၣ်ဒါအအိၣ်န့ၣ်လီၤ.
ဘၣ်ဃးတၢ်ဂ့ၢ်အံၤလီၢ်က၀ီၤပှၤဘၣ်မူဘၣ်ဒါတဂၤစံး၀ဲလၢ“မဟါဖဲမုၢ်ဃ့ၢ်လီၤ ၁း၁၀ န့ၣ်ကဘီယူၤကွံၥ်လီၤမ့ၣ်ပိၢ်တဖျၢၣ်.၀ံၤဘျီ အမျိၥ်သုးခးလီၤကျိဖးဒိၣ်(၂)ဖျၢၣ်.တၢ်ခံဖျၢၣ်န့ၣ်အပိၢ်တဖျၢၣ်လီၤ.မ့၀ံၤကဘီယူၤဟဲက့ၤကဒီးကွံၥ်လီၤထးကဒီးတဖျၢၣ်.ခဲလၢၥ်န့ၣ် (၄)ဖျၢၣ်.လီၤတဲၥ်လၢသီခါဖၠၣ်ကရၢၢ်ပူၤန့ၣ်တဖျၢၣ်,လၢတၢ်မံၣ်ကၠီအဲၣ်သ၀ီဃၢၤတၢ်သွၣ်ခိၣ်န့ၣ်တဖျၢၣ်,လၢကစၢၢ်ခီၣ်ထံးန့ၣ်တဖျၢၣ်ဒီးအတပိၢ်ဘၣ်န့ၣ်တဖျၢၣ်လီၤ.တၢ်ဘၣ်ဒိဘၣ်ထံးခီဘၣ်၀ဲပှၤရီဘၢၣ်ကျီးဒီးသီခါဖၠၣ်အခိၣ်ဒုးမီၤနီၤ. ”အဂ့ၢ်န့ၣ် စံး၀ဲန့ၣ်လီၤ.
လၢန့ၣ်အမဲၥ်ညါပယီၤသုးခးလီၤကျိဖးဒိၣ်ကဲထီၣ်၀ံၤတနံၤဃီဖဲဟါခီ ၇း၄၅ မံးနံးအဆၢကတီၢ်န့ၣ်စ့ၢ်ကီး ပယီၤသုးခီၣ်ချ့သုးရ့ၣ် (ခမရ-၂၀၆) ခးလီၤကျိဖးဒိၣ် ၂ ဖျၢၣ်, (၄၀၂)အမျိၥ်သုးစ့ၢ်ကီးခးလီၤကျိဖးဒိၣ် ၂ ဖျၢၣ် လီၤတဲၥ်ပိၢ်ဖးထီၣ်၀ဲလၢကီးလၢၢ်ကရူၢ် ကျူမဲသ၀ီသ၀ီဃၢၤ အဂ့ၢ်န့ၣ် သ့ၣ်ညါဘၣ်န့ၣ်လီၤ.
မိကီတိၤအံၤအပူၤကွံၥ်(၂၀၂၄)နံၣ် လါဖ့ၤဘြူၤအါရံၤ ၂၈ သီ ဂီၤခီ ၁ နၣ်ရံၣ်ဃၣ်ဃၣ်အခါန့ၣ်စ့ၢ်ကီး ဘၣ်တၢ်လဲၤမၤဟးဂီၤ ကဲထီၣ်တ့ၢ်၀ဲဖဲန့ၣ်တဘျီဒီး တၢ်လဲၤမၤဟးဂီၤတိၤဘျီ၀ဲန့ၣ်အခါတိၤအံၤလီၤပှီၢ်ဟးဂီၤ၀ဲဒီတဘိန့ၣ်လီၤ.
တကီၢ်ခါခဲအံၤမိကီတိၤလၢတၢ်မၤဟးဂီၤအီၤဖဲလါမ့ၤ ၃ သီအနံၤအံၤ တၢ်တတ့မၤဂ့ၤထီၣ်အီၤဒံးဘၣ်မ့မ့ၢ်တခီသုးကီၣ်ကးအပှၤလဲၤ လူလီၤမၤပှဲၤထီၣ်၀ဲဒီးဟီၣ်ခိၣ်အိၣ်၀ဲအသိးဖဲမဟါအနံၤစ့ၢ်ကီးလၢတပျဲကျိတိၤဒီးကမၤစဲၣ်တိၤတကပၤန့ၣ် ပယီၤသုးမၤ အါထီၣ်အဂံၢ်ဘါအိၣ်၀ဲအဂ့ၢ်န့ၣ် လီၢ်က၀ီၤပှၤဘၣ်မူဘၣ်ဒါတဂၤဃီ၀ဲန့ၣ်စံးအါထီၣ်၀ဲန့ၣ်လီၤ.
(၂၀၂၁)သုးဟံန့ၢ်တၢ်စိတၢ်ကမီၤ၀ံၤလီၢ်ခံ ခီဖျိတၢ်ဒုးကဲထီၣ်ဟီၣ်က၀ီၤပူၤအဃိ သထူၣ်ကီၢ်ဆၣ်ပူၤ မိကီတိၤဃုၥ်ဒီးတပျဲကျိတိၤ, ကမၤစဲၣ်တိၤ,တီၤကလ့တိၤ,ဘိၤခါကွ့တိၤလၢသုးကီၣ်ကးသူ၀ဲလၢဒုးယၤတၢ်ဟူးတၢ်ဂဲၤအဂီၢ်အံၤ ဟီၣ်က၀ီၤတၢ်ပၢၢ်ဆၢသုးပၥ်ဖှိၣ် ကရူၢ်မၤဟးဂီၤကဲထီၣ်အိၣ်ဒီးတဘျီလၢ်လၢ်ဖဲတၢ်မၤဟးဂီၤတိၤ၀ံၤလီၢ်ခံပယီၤသုးတကပၤစ့ၢ်ကီးက့ၤခးလီၤကဒါကျိဖးဒိၣ်ဆူ လီၢ်က၀ီၤ ကမျၢၢ်အိၣ်ဆိးလီၢ်ကျဲအိၣ်၀ဲဒၣ်အဂ့ၢ်န့ၣ် သ့ၣ်ညါဘၣ်န့ၣ်လီၤ.