လါယူၤလံ ၁၀ သီ, ၂၀၂၅ နံၣ်, ခ့ၣ်အဲးစံၣ်
ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ ဒူသထူၣ်ကီၢ်ရ့ၣ်(သုးက့ ၁)ဘံလ့ကီၢ်ဆၣ် ဃီဖိပျဲၢ်ကရူၢ် ဃီဖိပျဲၢ်သ၀ီအပူၤ ဖဲတနံၤအံၤ လါယူၤလံ ၁၀ သီ ဂီၤခီ ၁၁း၀၀ နၣ်ရံၣ်အဆၢကတီၢ်န့ၣ် သုးမီၤအကဘီယူၤတဘ့ၣ်လဲၤတ့ၢ်လီၤ၀ဲမ့ၣ်ပိၢ်(၂)ဖျၢၣ်လီၤတဲၥ် ပိၢ်ဖးထီၣ်၀ဲလၢကၠိကရၢၢ်ပူၤတဖျၢၣ်ဒီးကၠိကရၢၢ်ဃၢၤတဖျၢၣ် အဂ့ၢ်န့ၣ် လီၢ်က၀ီၤပှၤဘၣ်မူဘၣ်ဒါစံး၀ဲန့ၣ်လီၤ.
သုးမီၤစိရိၤ(Jet Fighter)ကဘီယူၤဟဲခးလီၤမ့ၣ်ပိၢ်ဘျီ၀ဲအံၤခီဖျိပှၤဒိးန့ၢ်ဃၥ်တၢ်ကစီၣ်အိၣ်အဃိ သ၀ီဖိစံၣ်ပလဲၥ်ဆိသး ခဲလၢၥ်အဖီခိၣ်တၢ်သံတၢ်ဘၣ်ဒိဘၣ်ထံးတအိၣ်ဘၣ် အဂ့ၢ်န့ၣ် သ၀ီဖိတဂၤ စံး၀ဲဒ်အံၤန့ၣ်လီၤ.
“သုးက့ပှၤဘၣ်မူဘၣ်ဒါတဲဃၥ်ပှၤလၢမဟါလံတၢ်အိၣ်သးတဂ့ၤဘၣ်ကဘီယူၤကဟဲခးလီၤတၢ်အဃိပှၤဟးပလဲၥ်သးလၢမဟါန့ၣ်လံ.ကဘီယူၤန့ၣ်ဟဲခးလီၤတၢ်တဘ့ၣ်လီၤ.ခးလီၤ၀ဲတဘျီ၀ံၤဟးတရံးတၢ်၀ံၤဘျီဟဲက့ၤခးလီၤကဒီး၀ဲတဘျီခဲလၢၥ်(၂)ဘျီမီၤ. အခး လီၤတၢ်န့ၣ်ကဘၣ်မ့ၢ်(၅၀၀)ပီၣ်မ့ၣ်ပိၢ်လီၤ.ပကွၢ်စိန့ၣ်အပိၢ်ထီၣ်၀ံၤဘျီအခုၣ်ထီၣ်မီၤနီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်-ကညီတၢ် ကစီၣ် န့ၣ်လီၤ.
ကဘီယူၤဟဲခးလီၤတၢ်ဘျီ၀ဲအံၤခီဖျိလီၤတဲၥ်ပိၢ်ဖးထီၣ်၀ဲလၢကၠိကရၢၢ်ပူၤဒီးကၠိကရၢၢ်ချၢအဃိ ကၠိတၢ်သူၣ်ထီၣ် (၂)ဖျၢၣ်လၢတၢ်တ့ ထီၣ်၀ဲသီသီတၢ်တအိၣ်ဘၣ်ဒံးလၢအပူၤဘၣ်အံၤလီၤပှီၢ်ဟးဂီၤ၀ဲဒီး ကၠိမဲၥ်ညါကမျၢၢ်ကျးဆါတၢ်တဖျၢၣ်စ့ၢ်ကီး ဘၣ်ဒိဘၣ်ထံး,တၢ်ဖိတၢ်လံၤလၢအိၣ်ကျးပူၤတဖၣ်ဟးဂီၤ၀ဲခဲလၢၥ်ဃၣ်ဃၣ်အဂ့ၢ်န့ၣ် လီၢ်က၀ီၤပှၤဘၣ်မူဘၣ်ဒါစံး၀ဲန့ၣ်လီၤ.
ဃီဖိပျဲၢ်သ၀ီအံၤ ဖဲအပူၤကွံၥ်(၂၀၂၄)လါမးရှး ၂၃ သီအခါ ကဘီယူၤလဲၤတ့ၢ်လီၤမ့ၣ်ပိၢ်အဃိ ကၠိတၢးတၢ်သူၣ်ထီၣ်လီၤပှီၢ်ဟးဂီၤ၀ဲ(၃) ဖျၢၣ်အသိး တနံၣ်အံၤ(၂၀၂၅) လါအ့ဖြ့ၣ် ၁၉ သီ ကဘီယူၤလဲၤခးလီၤကဒီးတၢ်လၢသ၀ီပူၤသီခါဖၠၣ်အဃိ ကမျၢၢ်သံ(၃)ဂၤအကျါ ပၣ်ဃုၥ်၀ဲတပွဲဖိ(၁)ပါ အမဲၥ်ညါသ၀ီဖိဘၣ်ဒိဘၣ်ထံး၀ဲအါမးကဲထီၣ်ဒံး၀ဲန့ၣ်လီၤ.
ဘၣ်ဃးပယီၤသုးပညိၣ်လဲၤခးလီၤတၢ်လၢသ၀ီပူၤကဲထီၣ်တလီၢ်လီၢ်ဒ်အံၤအဖီခိၣ် သုးက့ခိၣ် သုးခိၣ်ကျၢၢ်ဖိ စီၤစိမၠ့ၣ်ထွ့ စံး၀ဲ လၢ“သုးကီၣ်ကးမၤတၢ်ဒ်အံၤဒ်သိးပှၤကၠိဖိဖိဒံဖိသၣ်တဖၣ်သုတမၤလိဘၣ်တၢ်တဂ့ၤအဂီၢ်လီၤ. ဃီဖိပျဲၢ်ကၠိအံၤ ကဘီယူၤ ဟဲခး လီၤတၢ်ဒီးခဲအံၤတဘျီန့ၣ်အိၣ်(၂)ဘျီလံ.ထံဆံၣ်ဘီကၠိနါက့ဒ်န့ၣ်လီၤဟဲခး၀ဲအိၣ်(၂)ဘျီစ့ၢ်လံ.ခဲအံၤကၠိန့ၣ်ပှၤသိၣ်လိတၢ်ဘူၣ်ဘၣ်.လၢညါန့ၣ်ပှၤသိၣ်လိတၢ်ဘူၣ်ဒံး,ခဲအံၤသ၀ီပူၤမ့ၢ်ဂ့ၤ,သ၀ီချၢမ့ၢ်ဂ့ၤပှၤသိၣ်လိတၢ်တဘူၣ်လၢၤဘၣ်.ခဲအံၤပှၤကၠိဖိတအိၣ်ဘၣ်ကၠိလၢၤဘၣ်အိၣ်ဒီဒူၣ်ညါ.မၤဒီး၀ဲဒ်အံၤပှၤပျံၤတၢ်ရးဒိၣ်ထီၣ်၀ဲန့ၣ်”အဂ့ၢ်န့ၣ် စံးဘၣ်ခ့ၣ်အဲးစံၣ်-ကညီတၢ်ကစီၣ် န့ၣ်လီၤ.
တကးဒံးဘၣ်အပူၤကွံၥ်(၂၀၂၄)တၢ်လဲၤတ့ၢ်လီၤမ့ၣ်ပိၢ်လၢဃီဖိပျဲၢ်ကၠိကဲထီၣ်၀ံၤ လါအ့ဖြ့ၣ် ၂၈ သီအခါန့ၣ်စ့ၢ်ကီး ထံဆံၣ်ဘီကၠိ လၢအိၣ်ဘူး၀ဲဒီးဃိဖိပျဲၢ်သ၀ီအံၤ ကဘီယူၤလဲၤတ့ၢ်လီၤမ့ၣ်ပိၢ်အဃိကၠိတၢ်သူၣ်ထီၣ်စ့ၢ်ကီးဟးဂီၤ၀ဲအသိး တနံၣ်အံၤ လါဖ့ၤဘြူၤ အါရံၤ ၉ သီအနံၤစ့ၢ်ကီးကဘီယူၤလဲၤခးလီၤကဒီးတၢ်လၢသီခါဖၠၣ်ကရူၢ်ပူၤအဃိ သီခါ,တပွဲတၢ်ဘၣ် ဒိ ဘၣ်ထံးတအိၣ်ဘၣ်ဘၣ် ဆၣ်သီခါဖၠၣ်တၢ်သူၣ်ထီၣ်ဟးဂီၤ၀ဲဒိၣ်ဒိၣ်မုၢ်မုၢ်(၂)ဖျၢၣ်အမဲၥ်ညါကမျၢၢ်ဟံၣ်ဃီဟးဂီၤကဲထီၣ်ဒံး၀ဲန့ၣ်လီၤ.
လၢန့ၣ်အမဲၥ်ညါတနံၤအံၤခီဖျိကဘီယူၤလဲၤခးလီၤတၢ်,တၢ်ဘၣ်ဒိဘၣ်ထံးအိၣ်ထီၣ်ကဒီးဒ်အံၤအဖီခိၣ် ဃီဖိပျဲၢ်သ၀ီဖိဃုၥ်ဒီး ဒူသ၀ီကမျၢၢ်လၢအိၣ်ဘူးဖဲန့ၣ်သ့တဖၣ် ပျံၤတၢ်ဖုးတၢ်,ဘၣ်အိၣ်က့ၤ၀ဲလၢတၢ်ဘၣ်ယိၣ်ဘၣ်ဘှီအပူၤအဂ့ၢ်န့ၣ် သ့ၣ်ညါဘၣ်န့ၣ်လီၤ.
ဃီဖိပျဲၢ်သ၀ီဒီးထံဆံၣ်ဘီသ၀ီ(၂)ဖျၢၣ်အံၤအိၣ်ဘူးလိၥ်၀ဲအသးဒီး သုးဟံန့ၢ်တၢ်စိတၢ်ကမီၤ၀ံၤစးထီၣ်ဖဲ(၂၀၂၄)တုၤ(၂၀၂၅) တနံၣ်ဘျဲၣ်အတီၢ်ပူၤအံၤ သုးမီၤစိရိၤအကဘီယူၤလဲၤတ့ၢ်လီၤ၀ဲမ့ၣ်ပိၢ်လၢကၠိဒီးသီခါဖၠၣ်တၢ်သူၣ်ထီၣ်အိၣ်၀ဲ(၅)ဘျီလံအဂ့ၢ်န့ၣ် သ့ၣ်ညါဘၣ်န့ၣ်လီၤ.