လါအီကူး ၁၅ သီ, ၂၀၂၅ နံၣ်, ခ့ၣ်အဲးစံၣ်
မဲၢ်လးဘၣ်ကီဘၣ်ခဲဒဲကဝီၤအပူၤ ဖဲတနံၤအံၤလါအီကူး ၁၅ သီ မုၢ်ထူၣ် ၁၁း၀၀ နၣ်ရံၣ်ဘျဲၣ်အဆၢကတီၢ်န့ၣ် လၢကဝီၤဒိၣ်(Zone-c)အပူၤ တၢ်ဖီၣ်န့ၢ်ကဒီးဝဲ(WY) ကသံၣ်မူၤဘှီးအဖျၢၣ်(၇၀၀)ဘျဲၣ်လၢ ကီၤလၤဟံၣ်တဖျၢၣ်ပူၤအဂ့ၢ်န့ၣ် သ့ၣ်ညါဘၣ်လၢ ဒဲကဝီၤပှၤဘၣ်မူ ဘၣ်ဒါအအိၣ်န့ၣ်လီၤ.
ကီၤလၤသူဒီဖိမိၢ်ခံဂၤလၢအိၣ်(C-5)ကဝီၤဒ့အပူၤအံၤ ခီဖျိတၢ်ဒိးန့ၢ်တၢ်ကစီၣ်လၢအစိၥ်ဆါကသံၣ်မူၤဘှီးအဖီခိၣ် ကၠီၣ်တဲၣ် အီဆီး, သုး,ပၢၤကီၢ်ဃုၥ်ဒီးဒဲကဝီၤဘံၣ်ဘၢပှၤဘၣ်မူဘၣ်ဒါတဖၣ် နုၥ်လီၤသမံသမိးဝဲဒီး ထံၣ်န့ၢ်ဝဲ(WY)ကသံၣ်မူၤဘှီး(၇၅၃)ဖျၢၣ် ဘၣ်ဟဲကဲထီၣ်ဒ်အံၤန့ၣ်လီၤ.
တၢ်နုၥ်လီၤသမံသမိးဖီၣ်ချုးန့ၢ်ကသံၣ်မူၤဘှီးအခါ အဖိခွါတအိၣ်,အိၣ်ထဲအမိ ရၤဟံမၤ(၅၀)နံၣ်အံၤအဃိ ဘၣ်တၢ်ဖီၣ်က့ၤကိးဝဲဒီး ဘၣ်ဆၣ်မ့မ့ၢ်အဖိခွါအံၤပူၤဖျဲးဝဲအဂ့ၢ်န့ၣ် ဒဲကဝီၤပှၤဘၣ်မူဘၣ်ဒါစံးဝဲန့ၣ်လီၤ.
ဘၣ်ဃးတၢ်ဂ့ၢ်အံၤ မဲၢ်လးဒဲကဝီၤခိၣ် စီၤဆါဒ့စံး ဝဲလၢ“ဟံၣ်နီၣ်ဂံၢ်န့ၣ်အိၣ်ခံဖျၢၣ်.အမိန့ၣ်ဟံၣ်နီၣ်ဂံၢ်တဖျၢၣ်,အဖိခွါန့ၣ်ဟံၣ်နီၣ်ဂံၢ် လီၤဆီတဖျၢၣ်.ဘၣ်ဆၣ်အဒီဖိမိၢ်ခံဂၤအံၤ အမၤသကိးဃုၥ်တၢ်လီၤ .ပှၤတဲအီၤလၢနဖိခွမ့ဟဲက့ၤဒိးဖီၣ်သးန့ၣ် ပှၤတဆှၢသုလၢ တၢ်ဖီခိၣ်ကၠီၣ်တဲၣ်ပှၤဘၣ်မူဘၣ်ဒါအအိၣ်ဘၣ်.အဖိခွါခီသ့ၣ်ညါလီၤသးလၢအတၢ်ကမၣ်အိၣ်ဘျီတဟဲက့ၤဘၣ်အဃိပှၤက့ၤကိးက့ၤအမိန့ၣ်လီၤ.မ့ဘၣ်ကွၢ်တၢ်တဘျီအံၤအဖျၢၣ်အါတစဲးအိၣ်လၢ(၇၅၃)ဖျၢၣ်ညါ” အဂ့ၢ်န့ၣ် စံးဝဲန့ၣ်လီၤ.
ဘၣ်ကီဘၣ်ခဲဒဲကဝီၤအကျါလီၤဆီဒၣ်တၢ်မဲၢ်လးဒဲကဝီၤအပူၤန့ၣ် တၢ်သူကသံၣ်မူၤဘှီး,တၢ်ဖီၣ်န့ၢ်ဝဲကသံၣ်မူၤဘှီးကဲထီၣ်အိၣ်ဝဲတ လီၢ်လီၢ်ဘၣ်ဆၣ် ကသံၣ်မူၤဘှီးသ့ၣ်တဖၣ်အံၤတၢ်ဟဲက့ၤစိၥ်အီၤလၢတၢ်လီၢ်ဖဲလဲၣ်န့ၣ် တၢ်တသ့ၣ်ညါဝဲလီၤတံၢ်လီၤဆဲးဘၣ် အဂ့ၢ်န့ၣ် ဒဲကဝီၤခိၣ် စီၤဆါဒ့ စံးအါထီၣ်ဝဲန့ၣ်လီၤ.
အဝဲစံးဝဲလၢ“ကသံၣ်ကသီတဖၣ်အံၤတၢ်ဟဲက့ၤစိၥ်အီၤဖဲလဲၣ်ဒုပတသ့ၣ်ညါလီၤတံၢ်ဘၣ်.ဘၣ်မနုၤလဲၣ်ပဒဲကဝီၤအံၤဘူးဒီးကျဲမုၢ်. တနွဲသၢဘျီန့ၣ်ပအိၣ်ဒီး(မနက်စျေး)ပှၤဆါတၢ်လၢဂီၤခီမီၤနီၤ.ပှၤဟဲပှ့ၤတၢ်ဆါတၢ်ပှၤအိၣ်အကလုၥ်ကလုၥ်န့ၣ်.အဃိပကသမံသမိးအီၤလၢလီၤတံၢ်လီၤဆဲးအဂီၢ်ပမၤတအိၣ်ထီၣ်စ့ၢ်ဘၣ်.ပမ့ၤဃံးဃံးန့ၣ်ပဘၣ်ယိၣ်ကကဲထီၣ်တၢ်ကီတၢ်ခဲလၢပဒဲကဝီၤဖိအဂီၢ်လၢတၢ်ဃုဖံးဃုမၤတၢ်ဟးထီၣ်ဟးလီၤမီၤနီၤ” အဂ့ၢ်န့ၣ် စံးဝဲန့ၣ်လီၤ.
တကးဒံးဘၣ်ဒဲကဝီၤအပူၤထဲဒၣ်တနံၣ်အံၤ (၂၀၂၅)လါယူၤလံ တုၤလၢတနံၤအံၤ လၢတလါဘျဲၣ်အတီၢ်ပူၤ တၢ်ဖီၣ်ချုးကသံၣ် မူၤဘှီးပၥ်ဖှိၣ်အိၣ်ဝဲ(၅)ဘျီလံဒီး တၢ်ဖီၣ်ချုးဝဲ တဘျီအံၤစ့ၢ်ကီး အနီၣ်ဂံၢ်အဖျၢၣ်အါကတၢၢ်လီၤအဂ့ၢ်န့ၣ် သ့ၣ်ညါဘၣ်လၢပှၤဘၣ်မူ ဘၣ်ဒါအအိၣ်န့ၣ်လီၤ.
ဒ်န့ၣ်အသိးအပူၤကွံၥ်ပှၤလၢအသူဒီးအစိၥ်ဆါကသံၣ်မူၤဘှီးတဖၣ်အါဒၣ်တက့ၢ်မ့မ့ၢ်ထဲပိၥ်ခွါဘၣ်ဆၣ်လီၢ်ခံအံၤ ပှၤမုၢ်ပှၢ်,ပိၥ်မုၣ်/ပိၥ်ခွါသူၣ်ဘီၣ်သးစၢ်တဖၣ်ပၣ်ဃုၥ်ပၣ်ဂီၢ်ဟဲအါထီၣ်လၢတၢ်ဆါတၢ်ပှ့ၤအပူၤအဂ့ၢ်န့ၣ် ဒဲကဝီၤ ပှၤဘၣ်မူဘၣ်ဒါစံးဝဲန့ၣ်လီၤ.
လၢန့ၣ်အမဲၥ်ညါခီဖျိတၢ်ဖီၣ်န့ၢ်ကသံၣ်မူၤဘှီးဟဲအါထီၣ်ဒ်အံၤအဃိ လၢတၢ်ပတုၥ်ကွံၥ်တၢ်ဆီၣ်ထွဲမၤစၢၤအမဲၥ်ညါန့ၣ် တၢ်ကီတၢ်ခဲအိၣ် ထီၣ်လၢတၢ်အိၣ်တၢ်ဆိးလီၢ်ကျဲသ့ဝဲဒီးဒ်န့ၣ်အသိးတၢ်ဘၣ်ယိၣ်စ့ၢ်ကီးဝဲလၢတၢ်ကမၤဃံးထီၣ်တၢ်ဟးထီၣ်က့ၤလီၤ လၢဒဲကဝီၤအပူၤအဂ့ၢ်န့ၣ် တၢ်ပဲၥ်ထံနီၤဖး စံးဝဲန့ၣ်လီၤ.