လါစဲးပထ့ဘၢၣ် ၄ သီ, ၂၀၂၅ နံၣ်, ခ့ၣ်အဲးစံၣ်
ကရ့ၣ်နံၣ်ကီၢ်စဲၣ်ဒီးကယါဟီၣ်ကဝီၤအပူၤ ခီဖျိလၢသုးမီၤစိရိၤအကဘီယူၤဒီးကျိဖးဒိၣ်အံၤအဃိ တနံၣ်အံၤလါယူနူၤအါရံၤတုၤလါအီကူး လၢ(၈)လါ အတီၢ်ပူၤ ကမျၢၢ်သံပၥ်ဖှိၣ်အိၣ်ဝဲ(၁၀၆)ဂၤအဂ့ၢ်န့ၣ် Progressive Karenni People Force-PKPF ထုးထီၣ်ပၥ်ဖျါဝဲ အသိး သ့ၣ်ညါဘၣ်န့ၣ်လီၤ.
လံၥ်(PKPF)လံၥ်တၢ်ပၥ်ဖျါပူၤပၥ်ဖျါဝဲအသိးန့ၣ် လၢတၢ်(၈)လါအတီၢ်ပူၤအံၤ ပယီၤသုးမီၤစိရိၤကဘီယူၤလဲၤတ့ၢ်လီၤဝဲမ့ၣ်ပိၢ်အိၣ်ဝဲ (၃၂၀)ဘျီဒီး လၢကရ့ၣ်နံၣ် ဖါဆီ,ဒံၤမီၣ်စိၤ,ဖရူၤစိၤဟီၣ်ကဝီၤတဖၣ်အပူၤန့ၣ် တၢ်ဒုးကဲထီၣ်ဝဲ(၁၃၄)ဘျီအဂ့ၢ်န့ၣ် စံးဝဲန့ၣ်လီၤ.
တကးဒံးဘၣ်ဖဲတလါအံၤထီၣ်လါစဲးပထ့ဘၢၣ် ၁ သီအနံၤန့ၣ်စ့ၢ်ကီး သုးမီၤစိရိၤအကဘီယူၤလဲၤတ့ၢ်လီၤကဒီးဝဲမ့ၣ်ပိၢ်အဂ့ၢ်န့ၣ် ပှၤလၢအမၤစၢၤ ပှၤဃ့ၢ်မှံဟးဖျိးတဂၤ စံးဝဲန့ၣ်လီၤ.
အဝဲစံးဝဲလၢ“ဖဲလါထီၣ် ၁ သီ ဂီၤခီ ၈ နၣ်ရံၣ်ဘျဲၣ်အခါန့ၣ် သုးမိၤစိရိၤ(Jet Fighter)ကဘီယူၤလဲၤတ့ၢ်လီၤမ့ၣ်ပိၢ်လၢဒံၤမီၣ်စိၤ တကပၤန့ၣ်. ကသ့ၣ်ညါဘၣ်လၢကမျၢၢ်ပှၤလီၢ်အိၣ်ကဒုဖိပိၥ်မုၣ်ဘၣ်ဒိတဂၤ”အဂ့ၢ်န့ၣ် စံးဘၣ်ခ့ၣ်အဲးစံၣ်-ကညီတၢ်ကစီၣ်န့ၣ်လီၤ.
လၢန့ၣ်အမဲၥ်ညါဖဲအပူၤကွံၥ်လါအီကူးအတီၢ်ပူၤန့ၣ်စ့ၢ်ကီး လၢမီၤခၠံ(မော်ချီး)ဟီၣ်ကဝီၤအပူၤ ခီဖျိပယီၤသုးကဘီယူၤ လဲၤတ့ၢ်လီၤ မ့ၣ်ပိၢ်အဃိ လီၢ်ကဝီမကမျၢၢ်သံတစှၤန့ၢ်အဂၤ(၃၀)ကဲထီၣ်ဒံးဝဲဒီး ဒ်န့ၣ်အသိးတၢ်ဆါဟံၣ်ဃုၥ်ဒီးဟံၣ်တၢ်သူၣ်ထီၣ်တဖၣ် ဟးဂီၤလီၤပှီၢ် ဝဲအါမးဒံးန့ၣ်လီၤ.
ဒ်န့ၣ်အသိးလၢ(၈)လါအတီၢ်ပူၤအံၤ ခီဖျိလၢကဘီယူၤ,ပယီၤသုးခးလီၤကျိဖးဒိၣ်,သူဝဲဒြိအံၤအဃိ လီၢ်ကဝီၤကမျၢၢ်အဟံၣ်(၃၂၄)ဖျၢၣ်, တၢ်ဆါဟံၣ်(၃)ဖျၢၣ်,ကၠိ(၄)ဖျၢၣ်,တၢ်ဘူၣ်တၢ်ဘါတၢ်သူၣ်ထီၣ်(၄)ဖျၢၣ်ဟးဂီၤဝဲအဂ့ၢ်န့ၣ် Progressive Karenni People Force-PKPF လံၥ်တၢ်ပၥ်ဖျါအပူၤ ပၥ်ဖျါဝဲန့ၣ်လီၤ.
တကီၢ်ခါခဲအံၤလၢကရ့ၣ်နံၣ်ကီၢ်စဲၣ် ဒံၤမီၣ်စိၤ(ဒီးမော့ဆို)ဒီးဖရူၤစိၤ(ဖရူဆို)ကီၢ်ဆၣ်သ့ၣ်တဖၣ်အပူၤန့ၣ် ပယီၤသုးကျိၤဟဲထီၣ်ဝဲ အါအါ ဂီၢ်ဂီၢ်ဒီး ကျိဖးဒိၣ်အမဲၥ်ညါလၢကဘီယူၤအံၤတဆီခးလီၤဝဲကျိဖးဒိၣ်သ့ၣ်တဖၣ်လၢဟီၣ်ကဝီၤပူၤတပယူၥ်ဃီအဂ့ၢ်န့ၣ် ပှၤမၤစၢၤပှၤဃ့ၢ်မှံ ဟးဖျိးဒီးတၢ်ပၢၢ်ဆၢကရူၢ်ကရၢတဖၣ် စံးဝဲန့ၣ်လီၤ.