တၢ်ခးသံ ဘံလ့ဝ့ၢ်သုးမီၤစိရိၤအကဝီၤဒ့သးပှၢ် အူဆါနဲၤ

လါစဲးပထ့ဘၢၣ် ၉ သီ, ၂၀၂၅ နံၣ်, ခ့ၣ်အဲးစံၣ်

အူဆါနဲၤ လၢအမ့ၢ်ဝဲဘံလ့ဝ့ၢ် (ဘိုးလကြီး)ကဝီၤဒ့သးပှၢ်အံၤ ခီဖျိမၤနၢၤအီၣ်ဃီၣ်ဝဲကမျၢၢ်တဖၣ်အိၣ်အဃိ ဖဲအပူၤကွံၥ်စှၤသီ အခါတၢ်လဲၤခးသံ ကွံၥ်အီၤလၢအံလူၢ်သဝီဃၢၤ (အထပ်သား)သ့ၣ်တၢ်မၤလီၢ်အဂ့ၢ်န့ၣ် သ့ၣ်ညါဘၣ်န့ၣ်လီၤ.

အူဆါနဲၤ အံၤ မ့ၢ်ဝဲဘံလ့ဝ့ၢ် ကဝီၤဒ့သးပှၢ်ဒီး (လူမှုကယ်ဆယ်ရေး)ကရၢခိၣ်အမဲၥ်ညါ လၢခ့ၣ်အဲၣ်ယူၣ် ကၠဲးထိၣ်ကီၢ်ဆၣ် အံလူၢ်သဝီ (ကံကောင်းခြင်းရတနာ) တၢ်မၤလီၢ်န့ၣ်မ့ၢ်စ့ၢ်ကီးဝဲသုးမီၤစိရိၤအသုးကသံၣ်သရၣ်တဂၤအဂ့ၢ်န့ၣ် လီၢ်ကဝီၤပှၤဘၣ်မူ ဘၣ်ဒါစံးဝဲန့ၣ်လီၤ.

လၢတၢ်န့ၣ်အဃိဖဲလါစဲးပထ့ဘၢၣ် ၆ သီ ဟါခီ ၉း၀၀ နၣ်ရံၣ်ဃၣ်ဃၣ်အဆၢကတီၢ်န့ၣ် ဖဲအအိၣ်လၢ(အထပ်သား)သ့ၣ်တၢ်မၤလီၢ် အံၤအဆၢ ကတီၢ် ဖီၣ်စုကဝဲၤကရူၢ်လဲၤဒီးခးသံကွံၥ်အီၤဘၣ်ဟဲကဲထီၣ်ဝဲဒ်အံၤလီၤအဂ့ၢ်န့ၣ် လီၢ်ကဝီၤကမျၢၢ်တဂၤ စံးဘၣ် ခ့ၣ်အဲးစံၣ်- ကညီတၢ်ကစီၣ်ဒ်အံၤန့ၣ်လီၤ.

“ပှၤလဲၤခးအီၤန့ၣ်ဖဲ ၆ သီ မုၢ်နၤခီ ၈း၄၀ မံးအခါန့ၣ်. ပှၤလဲၤခးအီၤဖဲအံလူၢ်ဖိ (အထပ်သား)သ့ၣ်ဘၣ်တၢ်မၤလီၢ်န့ၣ်. အဝဲန့ၣ်အကဲ ဝဲပယီၤသုးအကသံၣ်သရၣ်(ဆေးမှူး)တဂၤ. အဟဲဆဲးကသံၣ်ဖဲအံလူၢ်သဝီဃၢၤတၢ်မၤလီၢ်န့ၣ်. ပှဲၤလဲၤတကျိၥ်ပဲတြီဘျီ အက့ၤအသံကွၢ်ဝဲမတဂၤလဲၣ်,ပှၤက့ၤစံးဆၢအီၤလၢပှၤဆါဖိဝံၤ အဟဲထီၣ်ဘျီပှၤခးသံကွံၥ်အီၤဖဲန့ၣ်လီၤ. အဝဲန့ၣ်အအိၣ် ဖဲတၢ်မၤလီၢ်န့ၣ်လီၤ. အဝဲန့ၣ်အိၣ်ဒီးအကျိ,မၤတရီတပါပှၤပိၥ်မုၣ်,မၤနၢၤအီၣ်ပှၤမၤတၢ်ဖိဒီး ပှၤပိၥ်ခွါလၢအကွၢ်ဝဲ တမုၥ်ဘၣ်တဖၣ် န့ၣ်နီဟးထီၣ်ဝဲလၢတၢ်မၤလီၢ်.မ့ဘၣ်တဲအဝဲန့ၣ်အကဲဝဲသုးကီၣ်ကးအတၢ်မဲၥ်ချံ,ဟ့ၣ်ပယီၤသုးတၢ်ကစီၣ်မီၤနီၤ”အဂ့ၢ်န့ၣ် စံးဝဲန့ၣ် လီၤ.

လၢန့ၣ်အမဲၥ်ညါဖဲတၢ်လဲၤခးသံအီၤအခါန့ၣ် တၢ်မၤန့ၢ်ဃုၥ်အကျိ,သိလ့ၣ်တဖၣ်အဂ့ၢ် သ့ၣ်ညါဘၣ်လၢပှၤဘၣ်မူဘၣ်ဒါ အအိၣ်ဒီး ဒ်န့ၣ်အသိးအံလူၢ်သဝီလၢတၢ်ကဲထီၣ်သးခဲအံၤန့ၣ် ဟီၣ်ကဝီၤ(KNLA) သုးရ့ၣ်-၃ ဒီး (PDF)ဟူးဂဲၤဝဲအဂ့ၢ်န့ၣ် သ့ၣ်ညါ ဘၣ်န့ၣ် လီၤ.

ဘၣ်ဃးတၢ်ကဲထီၣ်သးဘျီဝဲအံၤန့ၣ် (သုးက့ ၁)သုးက့ခိၣ် သုးခိၣ်ကျၢၢ်ဖိ စီၤစိမၠ့ၣ်ထွ့ စံးဝဲလၢ “အဝဲန့ၣ်မၤနၢၤအီၣ်ဃီၣ် ပှၤကမျၢၢ်,ပှၤဘၣ်ပျံၤဘၣ်အီၤ.မ့ဝံၤ(အထပ်သား)တၢ်မၤလီၢ်တဖျၢၣ်န့ၣ်အဘၣ်ဟံမူဒါဖဲန့ၣ်. အဝဲန့ၣ်အီၣ်ကဘျံးအီၣ် ကဘျၣ် တၢ်လၢပှၤမၤတၢ်ဖိအဖီခိၣ် အိၣ်ဒီဒူၣ်.ပှၤန့ၣ်အမ့ဟးထီၣ်ဟးလီၤန့ၣ်အစိၥ်ဒီးကျိဖုၣ်ဖိတခိၣ်. ဖဲပှၤလဲၤခးအီၤအခါန့ၣ် ယနၢ်ဟူ လၢပှၤမၤန့ၢ်အကျိဒီးကါ.ပှၤလဲၤမၤတၢ်န့ၣ်ကမ့ၢ်ဝဲ(PDF)လီၤ.ပှၤကလဲၤမၤအီၤန့ၣ်ဖးယံၤလံတကဲထီၣ်နီတဘျီဘၣ်”အဂ့ၢ်န့ၣ် စံးဘၣ်ခ့ၣ်အဲးစံၣ်-ကညီတၢ်ကစီၣ် န့ၣ်လီၤ.

ဒ်န့ၣ်အသိးအူဆါနဲၤ သံဝံၤလီၢ်ခံဖဲမဟါလါစဲးပထ့ဘၢၣ် ၈ သီအနံၤန့ၣ် တၢ်လဲၤပၥ်လီၤက့ၤအစိၣ်လၢဘံလ့ဝ တၢ်သွၣ်ခိၣ်လီၢ် အဂ့ၢ်န့ၣ် သ့ၣ်ညါဘၣ်န့ၣ်လီၤ.

ဘံလ့ဝ့ၢ်ခိၣ်ဝ့ၢ်ဃၢၤ ဒူသဝီ,ကဝီၤဒ့တဖၣ်အပူၤ သုးဟံန့ၢ်တၢ်စိတၢ်ကမီၤဝံၤလီၢ်ခံ သုးမီၤစိရိၤအစုတီၤဖီလၥ် ဒူသဝီသးပှၢ်, ကဝီၤဒ့ သးပှၢ်ဃုၥ်ဒီး (ဗျူစောထီး)တဖၣ် ဖီၣ်စုကဝဲၤကရူၢ်ကရၢလၢအထီဒါသုးမီၤစိရိၤအံၤ မၤဆှဲလဲခးသံကွံၥ်ဝဲကဲထီၣ်တလီၢ်လီၢ်အသိး တကးဒံးဘၣ်အံလူၢ်သဝီအံၤခီဖျိအိၣ်ဝဲဒၣ် ဖဲဘံလ့-ကၠဲးထိၣ်ဝ့ၢ်ဘၢၣ်စၢၤအဃိ ညီနုၢ်ပယီၤသုးမ့ဟဲထီၣ်န့ၣ် တၢ်ခိး ခးအဝဲသ့ၣ်လၢ ကျဲတီၤလိၤကဲထီၣ်တလီၢ်လီၢ်န့ၣ်လီၤ.