ပယီၤသုးကျိၤနုၥ်လီၤခးလီၤလၢသထူၣ်ကီၢ်ဆၣ် ကၠဲးတူၢ်ကိသဝီပူၤ တၢ်ဒုးကဲထီၣ်ဒီးခးသံကမျၢၢ် ၃ ဂၤ

လါယနူၤအါရံၤ ၁၁ သီ, ၂၀၂၆ နံၣ်, ခ့ၣ်အဲးစံၣ်

ဖဲမဟါလါယနူၤအါရံၤ ၁၀ သီအနံၤ ပယီၤသုးကျိၤနုၥ်လီၤဝဲလၢခ့ၣ်အဲၣ်ယူၣ် ဒူသထူၣ် ကီၢ်ရ့ၣ်(သုးက့ ၁)သထူၣ်ကီၢ်ဆၣ် ဒီးယၣ်(ဒေါက်ရပ်)ကရူၢ်ပူၤဝံၤ တၢ်ဒုးကဲထီၣ်ဒီး ခးသံဝဲကမျၢၢ်ပှၤနီသိလ့ၣ်ဖိ ၃ ဂၤအဂ့ၢ်န့ၣ် ကမျၢၢ်လၢအိၣ်ဘူးဖဲန့ၣ်တဂၤ စံးဘၣ်ခ့ၣ်အဲးစံၣ်-ကညီတၢ်ကစီၣ်န့ၣ်လီၤ.

ဖဲမဟါဂီၤခီ ၈း၀၀ နၣ်ရံၣ်ဃၣ်ဃၣ်အဆၢကတီၢ် ပယီၤသုးကျိၤလၢအနီၣ်ဂံၢ်ကအိၣ်အဂၤ(၁၀၀)ဃၣ်ဃၣ်အံၤအိၣ်ဟဲဝဲ လၢ စွ့ၣ်ယီၣ်ပၠးကရူၢ် ကၠးတရီသဝီတကပၤဒီး နုၥ်လီၤဝဲလၢကၠဲးတူၢ်ကိ(တက်တူကုန်း)သဝီပူၤဝံၤ တၢ်ဘၣ်သဂၢၢ်ခးလိၥ်သးကဲထီၣ်ဝဲ ဒီးဟီၣ်ကဝီၤ(KNLA) သုးရ့ၣ်-၂ သုးပၥ်ဖှိၣ် အဘၢၣ်စၢၤန့ၣ်လီၤ.

ဒ်န့ၣ်အသိးတုၤလၢတဂီၤအံၤတၢ်ဒုးကဲထီၣ်ဒံးဝဲလၢခံခီခံကပၤအဘၢၣ်စၢၤအဃိ ပယီၤသုးတကပၤသံဝဲ(၃)ဂၤအသိး (KNLA) သုးရ့ၣ်-၂ သုးပၥ်ဖှိၣ်တကပၤစ့ၢ်ကီး သံဘၣ်ဒိဘၣ်ထံးအိၣ်ဘၣ်ဆၣ်မၤလီၤတံၢ်တန့ၢ်ဒံးဘၣ်အဂ့ၢ်န့ၣ် လီၢ်ကဝီၤကမျၢၢ်ပိၥ်မုၣ်လၢ အိၣ်ဖဲန့ၣ်တဂၤစံးဝဲန့ၣ်လီၤ.

လၢန့ၣ်အမဲၥ်ညါတဂီၤအံၤဖဲတၢ်ဒုးကဲထီၣ်အခါန့ၣ်ပယီၤသုးတဖၣ်အံၤ ခးသံဝဲကမျၢၢ်ပှၤနီသိလ့ၣ်ဖိပိၥ်ခွါ ၃ ဂၤ လၢအလ့ၢ် ထီၣ်လ့ၢ်လိၤဖဲန့ၣ်ဝံၤကွံၥ်လီၤဝဲအစိၣ်ဖဲကၠဲးတူၢ်ကိသီခါဖၠၣ်ကွၢ်လီၤ ကျဲကပၤသရိၥ်ပူၤအဂ့ၢ်န့ၣ် သဝီဖိစံးဝဲအသိး သ့ၣ်ညါဘၣ် န့ၣ်လီၤ.

ဘၣ်ဃးပယီၤသုးကျိၤနုၥ်လီၤတၢ်ဒုးကဲထီၣ်တၢ်ဂ့ၢ်အံၤ ဒီးယၣ်သဝီဖိပိၥ်ခွါလၢအသးနံၣ်ကအိၣ် (၅၀)ဘျဲၣ်တဂၤ စံးဝဲလၢ “ဖဲမဟါကၢၤန့ၣ်အဝဲသ့ၣ်အိၣ်ဟဲလီၤလၢအမျိၥ်သုးတကပၤဒီးဟဲထီၣ်ဝဲဖဲကၠးကရီသဝီဝံၤနုၥ်လီၤဝဲလၢ ကၠဲးတူၣ်ကိသဝီပူၤ. အဟဲနုၥ်လီၤဘျီခးသံပှၤနီကါဖိ(၃)ဂၤ. မ့ဝံၤတၢ်ဒုးစ့ၢ်ကီးကဲထီၣ်ဒီးပှၤကညီသုး.တုၤလၢမုၢ်ထူၣ်ခဲအံၤခးလိၥ်သးဘၣ်ဖၢဒံး လီၤ” အဂ့ၢ်န့ၣ် စံးဘၣ်ခ့ၣ်အဲးစံၣ်-ကညီတၢ်ကစီၣ်န့ၣ်လီၤ.

စးထီၣ်ဖဲမဟါပယီၤသုးကျိၤနုၥ်လီၤဒီးတုၤလၢတနံၤအံၤမုၢ်ထူၣ်န့ၣ် တၢ်ဒုးကဲထီၣ်အမဲၥ်ညါ ပယီၤသုးခးလီၤကျိဖးဒိၣ်ကအိၣ်လၢ အဖျၢၣ်(၇၀)ဃၣ်ဃၣ်လံအဃိ ကၠဲးတူၣ်ကိသဝီဃုၥ်ဒီးခဲမီၣ်(ခဲမောက်)သဝီ,ဒီးယၣ်(ဒေါက်ရပ်)ဃုၥ်ဒီးဒူသဝီကမျၢၢ် လၢအိၣ် တၢ်ဘူးဖဲန့ၣ်တဖၣ် ဃ့ၢ်ထီၣ် ဟးအိၣ်ဝဲလၢတၢ်ဘံၣ်တၢ်ဘၢလီၢ် အဂ့ၢ်န့ၣ် သဝီဖိတဂၤဃီဝဲန့ၣ် စံးအါထီၣ်ဝဲန့ၣ်လီၤ.

ဒူသဝီတၢ်လီၢ်လၢပယီၤသုးနုၥ်လီၤဟူးဂဲၤခဲအံၤန့ၣ်အိၣ်ဝဲတခီတဝၢ်ဝၢ်ဒီးဘံလ့ထံကျိဝၢ်ခီဘံလ့ဝ့ၢ် လၢသုးမီၤစိရိၤမၤဝဲတၢ်ဃုထၢ အကူၥ်-၂ ဖဲတနံၤအံၤအဂ့ၢ်န့ၣ် သ့ၣ်ညါဘၣ်န့ၣ်လီၤ.