လါယနူၤအါရံၤ ၂၈ သီ, ၂၀၂၆ နံၣ်, ခ့ၣ်အဲးစံၣ်
ခ့ၣ်အဲၣ်ယူၣ် ချၢၣ်လွံၢ်ထူၣ်ကီၢ်ရ့ၣ်(သုးက့ ၃)လၢၢ်ဒိၣ်ကီၢ်ဆၣ်အပူၤ ခီဖျိလၢသုးမီၤစိရိၤကဘီယူၤလဲၤတ့ၢ်လီၤမ့ၣ်ပိၢ်အဃိ ဖိသၣ်ပိၥ်ခွါလၢအသးနံၣ်အိၣ်ဝဲ(၁၃)နံၣ်ဖီလၥ်အံၤသံဘၣ်ဒိဘၣ်ထံးဝဲ(၄)ဂၤအဂ့ၢ်န့ၣ် ကီၢ်ရ့ၣ်တၢ်ကစီၣ်ထုးထီၣ်ပၥ်ဖျါဝဲန့ၣ်လီၤ.
ဖဲလါယနူၤအါရံၤ ၂၅ သီဟါခီအဆၢကတီၢ် သုးမီၤစိရိၤ(Jet Fighter)ကဘီယူၤတဘ့ၣ်လဲၤတ့ၢ်လီၤဝဲမ့ၣ်ပိၢ်(၆)ဖျၢၣ်လၢ ကွံလါသဝီပူၤဒီး ဖဲန့ၣ် ဖိသၣ်(၁၃)နံၣ်ဖီလၥ်အံၤ သံဝဲ(၁)ဂၤဒီး ဘၣ်ဒိဝဲ(၃)ဂၤန့ၣ်လီၤ.
ဒ်ကီၢ်ရ့ၣ်တၢ်ကစီၣ်ပၥ်ဖျါထီၣ်ဃၥ်ဝဲအသိးန့ၣ် ပှၤဖိသၣ်လၢအသံတဂၤန့ၣ်မ့ၢ်ဝဲ စီၤအဲၣ်လီၤလးမူ(၇)နံၣ်ဒီး ဖိသၣ်လၢအဘၣ်ဒိ ဘၣ်ထံးတဖၣ်န့ၣ်မ့ၢ်ဝဲ စီၤအဲၣ်နၤဒိၣ်မူ(၉)နံၣ်, စီၤအဲၣ်လၢပှဲၤမူ(၁၁)နံၣ်, စီၤအဲၣ်မူခရံၥ်သီ(၁၃)နံၣ် အဂ့ၢ်န့ၣ် သ့ၣ်ညါဘၣ်န့ၣ်လီၤ.
တကးဒံးဘၣ်ကဘီယူၤလဲၤတ့ၢ်လီၤမ့ၣ်ပိၢ်ဘျီဝဲအံၤ သဝီဖိအဟံၣ်စ့ၢ်ကီးဟးဂီၤဝဲ(၅)ဖျၢၣ်ဒီး တကီၢ်ခါခဲအံၤခီဖျိလၢ သုးမီၤစိရိၤ တၢ်ဟူးတၢ်ဂဲၤအံၤအဃိ ဒူသဝီကမျၢၢ်လၢအိၣ်ဘူးဖဲတၢ်ကဲထီၣ်သးအခိၣ်အဃၢၤန့ၣ်တဖၣ်ဘၣ်အိၣ်လၢတၢ်ပျံၤ တၢ်ဖုး တၢ်ဘၣ် ယိၣ်ဘၣ်ဘှီအပူၤအဂ့ၢ်န့ၣ် ခ့ၣ်အဲၣ်ယူၣ် စံးဝဲန့ၣ်လီၤ.
ဒ်န့ၣ်အသိးတချုးတၢ်ကဲထီၣ်သးအံၤဒံးဘၣ်ဖဲလါယနူၤအါရံၤ ၂၃ သီ ဒီး ၂၄ သီအနံၤန့ၣ်စ့ၢ်ကီး လၢမူကီၢ်ဆၣ်အပူၤ ခီဖျိလၢ ကဘီယူၤဒီးကျိဖးဒိၣ်အံၤအဃိ ကမျၢၢ်ဘၣ်ဒိၣ်ဘၣ်ထံးဝဲ(၄)ဂၤကဲထီၣ်ဒံးဝဲဒၣ်န့ၣ်လီၤ.
ချၢၣ်လွံၢ်ထူၣ်ကီၢ်ရ့ၣ် လီၤဆီဒၣ်တၢ်မူကီၢ်ဆၣ်ဒီးလၢၢ်ဒိၣ်ကီၢ်ဆၣ်ခံဘ့ၣ်အံၤအပူၤန့ၣ် သုးမီၤစိရိၤအံၤပညိၣ်ဝဲကမျၢၢ်ဒီး သူဝဲကဘီယူၤ,ဒြိ,ကျိဖးဒိၣ်ခးလီၤတၢ်လၢဒူသဝီကမျၢၢ်အိၣ်ဆိးအလီၢ်,တၢ်ဖံးအီၣ်မၤအီၣ်လီၢ်ဟဲအါထီၣ်ဝဲတပယူၥ်ဃီအဃိ တၢ်သံတၢ်ဘၣ်ဒိဘၣ်ထံးတၢ်ဟးဂူၥ်ဟးဂီၤကဲထီၣ်ဝဲခဲအံၤခဲအံၤအဂ့ၢ်န့ၣ် သ့ၣ်ညါဘၣ်န့ၣ်လီၤ.