လါဖ့ၤဘြူၤအါရံၤ ၁၇ သီ, ၂၀၂၆ နံၣ်, ခ့ၣ်အဲးစံၣ်
ဖဲအပူၤကွံၥ်စှၤသီအခါ သုးမီၤစိရိၤအသုးဖိသီ(၉)ဂၤလၢဘၣ်တၢ်ထၢန့ၢ်ဆူၣ်လၢသုးကျါအံၤဟဲက့ၤဟ့ၣ်လီၤကဒီးသးဆူခ့ၣ်အဲၣ်ယူၣ် ချၢၣ်လွံၢ်ထူၣ်ကီၢ်ရ့ၣ်(သုးက့ ၃) လၢၢ်ဒိၣ်ကီၢ်ဆၣ် ကညီဒီကလုၥ်ဂၢၤသးကရၢ(KNDO)အအိၣ်အဂ့ၢ်န့ၣ် ကီၢ်ရ့ၣ်တၢ်ကစီၣ်ထုးထီၣ် ပၥ်ဖျါဝဲ ဖဲမဟါ အနံၤန့ၣ်လီၤ.
ဖဲလါဖ့ၤဘြူၤအါရံၤ ၁၂ သီအနံၤန့ၣ် ပယီၤသုးခီၣ်သုးရ့ၣ်(ခလရ-၄၃၉)အပှၤ ၅ ဂၤ, (ခလရ-၅၉၈)အပှၤ ၁ ဂၤ, (ခလရ-၆၀)အပှၤ ၁ ဂၤ, (ခလရ-၃၅၁)အပှၤ ၁ ဂၤ, ခီၣ်ချ့သုးရ့ၣ်(ခမရ-၅၃)အပှၤ ၁ ဂၤ ပၥ်ဖှိၣ်ခဲလၢၥ်(၉)ဂၤ ပှၤသ့ၣ်တဖၣ်အံၤ ဟဲက့ၤဟ့ၣ်လီၤ အသးဆူဟီၣ်ကဝီၤ(KNDO) သုးရ့ၣ်-၃ အအိၣ်န့ၣ်လီၤ.
သုးဖိသီလၢအဟဲက့ၤဟ့ၣ်လီၤသး(၉)ဂၤအံၤမ့ၢ်ဝဲ ကၠီၤစ့ၤယၣ်(၂၃)နံၣ်, သဲၤပဲၤစိ(၄၁)နံၣ်,စီၤကၤဘံၤ(၂၉)နံၣ်, မ့ထဲၣ်(၂၃)နံၣ်, အီၤစိဝ့(၃၅)နံၣ်,ကိၤမၠိ(၂၉)နံၣ်,ဝ့မၠးထူ(၃၀)နံၣ်, အၤကၤကၠီၤဝ့(၂၃)နံၣ်,အီၤမ့စိ(၄၀)နံၣ် သ့ၣ်တဖၣ်ဒီး ပှၤသ့ၣ်တဖၣ်အံၤဘၣ်တၢ် ဖီၣ်ဒုးကဲန့ၢ်ဆူၣ်ဝဲသုးအဂ့ၢ် န့ၣ် သ့ၣ်ညါဘၣ်န့ၣ်လီၤ.
ဒ်န့ၣ်အသိးချၢၣ်လွံၢ်ထူၣ်ကီၢ်ရ့ၣ် ထဲဒၣ်လၢၢ်ဒိၣ်ကီၢ်ဆၣ်တဘ့ၣ်အပူၤ(၂၀၂၅)လါယနူၤအါရံၤတုၤလါဒံၣ်စ့ဘၢၣ် လၢတနံၣ်အတီၢ် ပူၤန့ၣ် သုးမီၤစိရိၤအပှၤလၢပၣ်ဃုၥ်သုးဖိသီလၢတၢ်ထၢန့ၢ်ဆူၣ်သုးတဖၣ်ဟဲက့ၤဟ့ၣ်လီၤသးပၥ်လီၤစုကဝဲၤအိၣ်ဝဲအဂၤ (၃၀)ဘျဲၣ်လံ အဂ့ၢ်န့ၣ် ကီၢ်ဆၣ်ပှၤဘၣ်မူဘၣ်ဒါစံးဘၣ် ခ့ၣ်အဲးစံၣ်-ကညီတၢ်ကစီၣ်န့ၣ်လီၤ.
“၂၀၂၅ န့ၣ် မ့ဘၣ်ကွၢ်လၢပလၢၢ်ဒိၣ်ကီၢ်ဆၣ်ဟီၣ်ကဝီၤပူၤန့ၣ်ဒုၣ်ဒါအသုးလၢတၢ်ဖီၣ်ဆူၣ်အီၤဒီးဘၣ်ကဲဝဲဒၣ်ဒုၣ်ဒါအသုးသ့ၣ် တဖၣ်န့ၣ် ဟဲက့ၤစံၣ်ဖျိးလၢပဟီၣ်ကဝီၤပူၤန့ၣ်အိၣ်ဝဲအဂၤ(၃၀)ဘျဲၣ်လံမီၤ.ပှၤသ့ၣ်တဖၣ်အံၤသးတဆူၣ်လၢတၢ်ဖံးတၢ်မၤပူၤ ဟဲက့ၤစံၣ်အဃိ န့ၣ်ပဆဲးကျိးန့ၢ်ဒီးအဝဲသ့ၣ်အဘူးအတံၢ်ဝံၤပဃုကျဲပဆှၢက့ၤဆူအတၢ်လီၢ်တၢ်ကျဲလီၤ .အါဒၣ်တက့ၢ်အဝဲသ့ၣ် အဲၣ်ဒိးက့ၤလၢအကစၢ်တၢ်လီၢ်တၢ်ကျဲအဃိပရဲၣ်ကျဲၤဒ်အဝဲသ့ၣ်တၢ်ဘၣ်သးအသိးလီၤ”အဂ့ၢ်န့ၣ် စံးဝဲန့ၣ်လီၤ.
သုးမီၤစိရိၤအံၤစးထီၣ်လၢအဝဲသ့ၣ်ဘၣ်ဟ့ၣ်ဆှူကွံၥ်အသုးကလၢၤလၢကလုၥ်ဒူၣ်တၢ်ပၢၢ်ဆၢဟီၣ်ကဝီၤအိၣ်ထီၣ်အါဝံၤလီၢ်ခံန့ၣ် ထုးထီၣ်ဝဲတၢ်ကဘၣ်ကဲသုးတၢ်သိၣ်တၢ်သီတၢ်ဘျၢဝံၤဖီၣ်န့ၢ်ဆူၣ်ဝဲကမျၢၢ်ပိၥ်ခွါ သူၣ်ဘီၣ်သးစၢ်သ့ၣ်တဖၣ်လၢကျဲအကလုၥ် ကလုၥ်ဒီးမၢထီၣ်ဝဲဂံၢ်ခီၣ်ထံးသုးတၢ်သိၣ်လိဝံၤဆှၢထီၣ်ဝဲဆူတၢ်မဲၥ်ညါတၢ်ဒုးဆူၣ်အလီၢ်သ့ၣ်တဖၣ် န့ၣ်လီၤ.
ဒ်န့ၣ်အသိးပှၤလၢဘၣ်တၢ်ထၢန့ၢ်ဆူၣ်သုးသ့ၣ်တဖၣ်အံၤခီဖျိသးတအိၣ်လၢကမၤဝဲသုးမီၤစိရိၤတၢ်ဖံးတၢ်မၤအံၤဘၣ်အဃိ တနံၤဘၣ်တနံၤထံၣ်ဘၣ်လၢပှၤသ့ၣ်တဖၣ်အံၤဟဲက့ၤပၥ်လီၤစုကဝဲၤဟဲက့ၤပၥ်ဖှိၣ်မၤသကိးတၢ်ဒီးဖီၣ်စုကဝဲၤတၢ်ပၢၢ်ဆၢကရူၢ်ကရၢအါထီၣ်ဝဲ ကွ့ၢ်ကွ့ၢ်န့ၣ်လီၤ.
တကးဒံးဘၣ်ပှၤလၢအဟဲက့ၤပၥ်လီၤစုကဝဲၤသ့ၣ်တဖၣ်အံၤစ့ၢ်ကီး တၢ်တူၢ်လိၥ်ခီၣ်ဆၢအံးထွဲကွၢ်ထွဲအဝဲသ့ၣ်ဂ့ၤဂ့ၤဒ်တၢ်ဘျၢသဲးစး အိၣ်ဝဲအသိးအဃိ ပှၤလၢဘၣ်တၢ်မၢကဲန့ၢ်ဆူၣ်သုးလၢအအိၣ်တ့ၢ်ဒံးတဖၣ်ကဂုၥ်ကျဲးစၢးဆဲးကျိးဘၣ်ဒီးတၢ်ပၢၢ်ဆၢကရူၢ် ကရၢလၢ အိၣ်ဘူး အဝဲသ့ၣ်တဖၣ်အဂ့ၢ်န့ၣ် ခ့ၣ်အဲၣ်ယူၣ်/သုးက့ဘၣ်ထွဲတဖၣ် ဆီၣ်တခူထီၣ်ဝဲအိၣ်ထီဘိန့ၣ်လီၤ.