လါအ့ဖြ့ၣ် ၁၀ သီ, ၂၀၂၆ နံၣ်, ခ့ၣ်အဲးစံၣ်
ခ့ၣ်အဲၣ်ယူၣ် ဒူပျၥ်ယၥ်ကီၢ်ရ့ၣ်(သုးက့ ၆)ကြုၢ်တုကီၢ်ဆၣ် လၢကီးတရံးကလံၤစိးတကပၤန့ၣ် စးထီၣ်လၢလါမးရှး ၂၀ သီ တုၤလါအ့ဖြ့ၣ် ၂ သီ ခီဖျိလၢသုးမီၤစိရိၤကဘီယူၤလဲၤတ့ၢ်လီၤမ့ၣ်ပိၢ်အံၤအဃိ နီၤကဲ(နောင်ကိုင်း),မံၣ်ဖးလဲၢ်သဝီပူၤဟံၣ်,ကၠိ,သီခါဖၠၣ်တၢ်သူၣ်ထီၣ်တဖၣ် ဟးဂီၤဝဲခဲလၢၥ်ဃၣ်ဃၣ်အဂ့ၢ်န့ၣ် လီၢ်ကဝီၤပှၤဘၣ်မူဘၣ်ဒါစံးဝဲအသိးသ့ၣ်ညါဘၣ်န့ၣ်လီၤ.
ပယီၤသုးလၢအိၣ်ကီးတရံး,ကြုၢ်တုတဖၣ်အံၤ လၢကဟဲထီၣ်ဝဲဆူထံဖိစီ,ယီၢ်ကိၥ်,ကၠီၤစှၤကိကျဲဒီးတီနီၢ်ကစၢၢ် အီၣ်ဘိၤတဲကျဲအံၤအဂီၢ် ကျိဖးဒိၣ်အမဲၥ်ညါဒီးလၢကဘီယူၤအံၤတဆီဟဲခးလီၤဝဲတၢ်တလီၢ်လီၢ်အဃိ နီၤကဲ,မံၣ်ဖးလဲၢ်သဝီခဲလၢၥ်ဃၣ် ဃၣ်ဟးဂူၥ်ဟးဂီၤဘၣ် ဟဲကဲထီၣ်ဝဲဒ်အံၤလီၤအဂ့ၢ်န့ၣ် (KNLA)အပှၤတဂၤစံးဝဲန့ၣ်လီၤ.
“ကဘီယူၤဟဲခးလီၤတၢ်အိၣ်ကိးမုၢ်နံၤဒဲးလီၤ.ကဘီယူၤစ့ၢ်ကီးဟဲခး,လၢဒြိစ့ၢ်ကီးဟဲလီၤ.မ့မ့ၢ်လၢမံၣ်ဖးလဲၢ်သဝီဒုပှၤဟံၣ်ပှၤဃီဟးဂီၤ လၢၤလံ.ဖဲလါမးရှးကဘီယူၤလဲၤခးလီၤတၢ်အခါန့ၣ်မံၣ်ဖးလဲၢ်သီခါဖၠၣ်လီၤပှီၢ်ဟးဂီၤခဲလၢၥ်လီၤ.ထံဖိစီသဝီပူၤသီခါဖၠၣ်နါက့ဒ်န့ၣ်လီၤ” အဂ့ၢ်န့ၣ် စံးဘၣ်ခ့ၣ်အဲးစံၣ်-ကညီတၢ်ကစီၣ်န့ၣ်လီၤ.
လၢန့ၣ်အမဲၥ်ညါတကီၢ်ခါခဲအံၤလၢကြုၢ်တုအံၤတဆီပယီၤသုးဂုၥ်ကျဲးစၢးဟဲထီၣ်ဝဲဆူကီးတရံးကလံၤထံးတကပၤဒီး လၢတၢ်န့ၣ်အဃိ စးထီၣ်ဖဲမဟါလါအ့ဖြ့ၣ် ၉ သီ ဂီၤခီ ၁၁ နၣ်ရံၣ်ဃၣ်ဃၣ်အဆၢကတီၢ်န့ၣ် လၢကဘီယူၤအံၤတဆီဟဲဆှၣ်ဝဲတၢ်အိၣ်အသိး ခီၣ်ချ့သုးရ့ၣ်(ခမရ-၅၄၆) တကပၤစ့ၢ်ကီး ခးလီၤဝဲ(ဟီၤဝ့ၤစၤ)ကျိဖးဒိၣ်အိၣ်ဝဲအဂ့ၢ်န့ၣ် တၢ်ပၢၢ်ဆၢသုးကရူၢ်တကပၤစံးဝဲန့ၣ်လီၤ.
ဒူပျၥ်ယၥ်ကီၢ်ရ့ၣ် ကီးတရံးကီၢ်ဆၣ်အပူၤ ဖဲဒုးယၤတၢ်သဘံၣ်သဘုၣ်ကဲထီၣ်အကတီၢ်ဖဲအပူၤကွံၥ်လါအ့ဖြ့ၣ် ၂ သီအနံၤန့ၣ် သုးမီၤစိရိၤ အိးထီၣ်ဝဲကီးတရံး-မၠၣ်ဝတံၣ်အ့ရှါကျဲလံန့ၣ်လီၤ.ဖဲန့ၣ်ဝံၤလီၢ်ခံစှၤသီအတီၢ်ပူၤအံၤ လၢကြုၢ်တုအံၤတဆီပယီၤသုးခီၣ်သုးရ့ၣ်(ခလရ-၉၇) ဟဲထီၣ်ဝဲလၢကီးတရံးတကပၤအိၣ်ထီၣ်ဝဲအဂ့ၢ်န့ၣ် တၢ်ပၢၢ်ဆၢသုးကရူၢ်တကပၤစံးဝဲအသိး သ့ၣ်ညါဘၣ်န့ၣ်လီၤ.
ဒ်န့ၣ်အသိး လၢတၢ်ဒုးတၢ်ယၤအပူၤပယီၤသုးလၢအဘၣ်ဒိဘၣ်ထံးတဖၣ်တၢ်ဆှၢထီၣ်ဆှၢလီၤဝဲလၢကီးတရံး-မၠၣ်ဝတံၣ်-ဖၣ်အၣ်ကျဲမုၢ် အံၤ အိၣ်ဝဲတပယူၥ်ဃီအမဲၥ်ညါသုးမီၤစိရိၤအံၤလၢတၢ်ဆီတလဲသုးအဂီၢ်စ့ၢ်ကီး သူဝဲဒၣ်ကျဲအံၤဟဲအိၣ်ထီၣ်ဝဲအဂ့ၢ်န့ၣ် တၢ်ပၢၢ်ဆၢသုးကရူၢ်ပှၤဘၣ်မူ ဘၣ်ဒါစံးဝဲအိၣ်န့ၣ်လီၤ.