လါအ့ဖြ့ၣ် ၁၅ သီ, ၂၀၂၆ နံၣ်, ခ့ၣ်အဲးစံၣ်
လါအ့ဖြ့ၣ် ၁၂ သီ လ့က့ၣ်ပယီၤသုးကလၢၤလီၤဝံၤတကတီၢ်ဃီတၢ်ဆဲးထီၣ်ဝဲတးပီသုးကလၢၤဒီး တၢ်ဒုးအပူၤခီဖျိကဘီယူၤ ဟဲခးလီၤတၢ်အဃိ ဖၣ်အၣ်ကီၢ်ဆၣ်ပူၤ သဝီ(၁၀)ဖျၢၣ် လီၢ်ကဝီၤကမျၢၢ်(၆၀၀၀)ဘျဲၣ်ဘၣ်ဃ့ၢ်ထီၣ်ဝဲအဂ့ၢ်န့ၣ် ကီၢ်ရ့ၣ်ပှၤဘၣ်မူ ဘၣ်ဒါစံးဝဲန့ၣ်လီၤ.
လ့က့ၣ်ဒီးတးပီသုးကလၢၤ(၂)ဖျၢၣ်လၢဟီၣ်ကဝီၤကညီဒီကလုၥ်တၢ်ထူၣ်ဖျဲးသုးမုၢ်ဒိၣ်(KNLA)သုးပၥ်ဖှိၣ်လဲၤခးဝဲဖဲလါအ့ဖြ့ၣ်ထီၣ် အခါအံၤန့ၣ် အပူၤကွံၥ်စှၤသီအခါလ့က့ၣ်သုးကလၢၤအံၤဘၣ်တၢ်ထီၣ်န့ၢ်ကွံၥ်အီၤလံန့ၣ်လီၤ.ဘၣ်ဆၣ်တးပီသုးကလၢၤလၢ အအိၣ်တ့ၢ်ဝဲအံၤလၢကထီၣ်မၤန့ၢ်ဝဲအဂီၢ် တၢ်ဆဲးထီၣ်ဝဲသုးကလၢၤအဃိတၢ်ဒုးကဲထီၣ်ဝဲလၢခံခီခံကပၤအဘၢၣ်စၢၤန့ၣ်လီၤ.
တကတီၢ်ဃီလၢတးပီသုးကလၢၤတၢ်ဒုးအံၤအပူၤစ့ၢ်ကီး ခီဖျိသုးမီၤစိရိၤကဘီယူၤ ဟဲခးလီၤတၢ်လၢသုးကလၢၤအခိၣ် အဃၢၤဒူသဝီ ပူၤကိးမုၢ်နံၤဒဲးဃၣ်ဃၣ်အဃိ ဘီနီၤကျိဝၢ်ခီ ဖၣ်အၣ်ကီၢ်ဆၣ် ဟးတရဲးကရူၢ်ပူၤ ဟးတရဲး, ကြူစံ,ဖှၣ်ဂီၤ, နိၣ်အီလၢ်, နိၣ်ခၣ်ဒ့ၣ်, နိၣ်လီၤပျီ,ထံဖးဒိၣ်ခံ,ပှိၢ်,မဲၢ်သဲ,မဲၢ်သံခံသဝီ ကမျၢၢ်ပှၤနီၣ်ဂံၢ်(၆၂၈၆)ဂၤဘၣ်ဃ့ၢ် ထီၣ်ဝဲန့ၣ်လီၤ.
ဒ်န့ၣ်အသိးကမျၢၢ်အဂၤ(၆၀၀၀)ဘျဲၣ်လၢအဃ့ၢ်ထီၣ်တဖၣ်အံၤဘၣ်ဟးအိၣ်လၢထံကျိထံကွၥ်,သ့ၣ်ခီၣ်ထံးဝၣ်ခီၣ်ထံးအဃိ လၢအဝဲသ့ၣ်အဂီၢ် လိၣ်ဘၣ်ဝဲဂ့ၢ်ဂီၢ်အူအိၣ်ဆိးလီၢ်ကျဲ,တၢ်အီၣ်တၢ်အီဒီးကသံၣ်ကသီတၢ်ဆီၣ်ထွဲမၤစၢၤအဂ့ၢ်န့ၣ် ကီၢ်ရ့ၣ်ပှၤဘၣ်မူ ဘၣ်ဒါစံးဝဲန့ၣ်လီၤ.
တကးဒံးဘၣ်လၢကဘီယူၤအံၤအဃိဖဲအပူၤကွံၥ်လါအ့ဖြ့ၣ် ၁၃ သီ ၄း၀၀ နၣ်ရံၣ်ဘျဲၣ်အဆၢကတီၢ် လၢတးပီသဝီ ဘီနီၤကျိဝၢ်ခီ ဟးတရဲးကရူၢ်အပူၤ သုးမီၤစိရိၤ(Y-12)ကဘီယူၤဟဲတ့ၢ်လီၤဝဲ(၁၂၂ မမ) ၄ ဖျၢၣ်လီၤတဲၥ်ပိၢ်ဖးထီၣ်ဝဲလၢ ပှိၢ်သဝီပူၤ(၂)ဖျၢၣ်ဒီး လၢပှိၢ်-ကွ့လ့သဝီဘၢၣ်စၢၤကျီးပူၤ(၂)ဖျၢၣ်အဂ့ၢ်န့ၣ် သ့ၣ်ညါဘၣ်န့ၣ်လီၤ.
ကဘီယူၤလဲၤတ့ၢ်လီၤကျိဒိၣ်ဘျီဝဲအံၤ ပှိၢ်သဝီဖိ စီၤမၤခၠူၤ(၄၈)နံၣ်အံၤသံဝဲဒီးစီၤတံတံၤ(၆၀)နံၣ်အံၤဘၣ်ဒိဘၣ်ထံး တကးဒံးဘၣ် ဟံၣ်တၢ်သူၣ်ထီၣ်ဟးဂီၤဝဲ(၂)ဖျၢၣ်ဒီးကျီၢ်စ့ၢ်ကီးသံဝဲ(၁)ဒုအဂ့ၢ်န့ၣ် သ့ၣ်ညါဘၣ်လၢကီၢ်ရ့ၣ်တၢ်မၤနီၣ်စရီအပူၤန့ၣ်လီၤ.
ဒ်န့ၣ်အသိးတချုးတၢ်ကဲထီၣ်သးအံၤဒံးဘၣ်ဖဲလါအ့ဖြ့ၣ် ၁၂ သီ ဟါခီ ၇း၃၀ ဃၣ်ဃၣ်အဆၢကတီၢ် ပယၢ်ရီသဝီ အပူၤ သုးမီၤစိရိၤ(jet fighter)ကဘီယူၤ လဲၤတ့ၢ်လီၤဒံးဝဲပီၣ်(၅၀၀)မ့ၣ်ပိၢ်တဖျၢၣ်အဃိ ဟံၣ်ဟးဂီၤဝဲ(၂)ဖျၢၣ် ဒီးထိးသံစ့ၢ်ကီးဝဲ တဒုအဂ့ၢ်န့ၣ် လီၢ်ကဝီၤပှၤဘၣ်မူဘၣ်ဒါစံးဝဲန့ၣ်လီၤ.
တးပီကရူၢ်ဒီးဟးတရဲးကရူၢ်အံၤအဘၢၣ်စၢၤအိၣ်ဝဲဒၣ်ထဲဘီနီၤထံကျိတဘိလီၤဘၣ်ဆၣ် တးပီသဝီပူၤသုးကလၢၤလၢ တၢ်ထီၣ်ဝဲ အဖၢမုၢ်ခဲအံၤန့ၣ် အိၣ်ဝဲဒၣ်လၢဘံလ့ၣ်ကီၢ်ဆၣ်ပူၤဒီး မ့မ့ၢ်ပှိၢ်သဝီလၢကဘီယူၤဟဲခးလီၤတၢ်ကမျၢၢ်သံဘၣ်ဒိဘၣ်ထံးအံၤ ခီန့ၣ်အိၣ်ဝဲဒၣ်လၢဖၣ်အၣ်ကီၢ်ဆၣ်အပူၤန့ၣ်လီၤ.
ဟးတရဲးကရူၢ်အမဲၥ်ညါ အပူၤကွံၥ်လ့က့ၣ်သုးကလၢၤတၢ်ဒုးပူၤအခါန့ၣ်စ့ၢ်ကီး ခီဖျိလၢကဘီယူၤအံၤအဃိ တးပီကရူၢ်,ပယၢ်ရီကရူၢ် ဒီး ဃီဖိပျဲၢ်ကရူၢ်ပူၤ ဒူသဝီ(၁၃)ဖျၢၣ် ကမျၢၢ်ပှၤနီၣ်ဂံၢ်(၁၃,၀၀၀)ဘျဲၣ်ဘၣ်ဃ့ၢ်ထီၣ်ဒံးဝဲအသိး လီၢ်ကဝီၤကမျၢၢ်ဘၣ်ဒိဘၣ်ထံး တကးဒံးဘၣ်ဟံၣ်,သီခါဖၠၣ်,သိကျးတၢ်သူၣ်ထီၣ်တဖၣ်မ့ၣ်အူအီၣ်ဟးဂီၤဝဲဒၣ်အါအါဂီၢ်ဂီၢ် န့ၣ်လီၤ.
တကီၢ်ခါခဲအံၤလ့က့ၣ်သုးကလၢၤလီၤလံဘၣ်ဆၣ် ခီဖျိတၢ်ဆဲးထီၣ်ဝဲတးပီသုးကလၢၤအံၤအဃိ ကမျၢၢ်လၢအဃ့ၢ်ထီၣ်တဖၣ် တုၤလၢခဲအံၤဘၣ်ဃ့ၢ်အိၣ်ဒံးဝဲလၢတၢ်ဘံၣ်တၢ်ဘၢလီၢ်အဖၢမုၢ်အဂ့ၢ်န့ၣ် သ့ၣ်ညါဘၣ်န့ၣ်လီၤ.
လၢတၢ်န့ၣ်အဃိဟီၣ်ကဝီၤပူၤဖဲန့ၣ်လ့က့ၣ်သုးကလၢၤဒီးတးပီသုးကလၢၤတၢ်ဒုးအပူၤ ခီဖျိလၢတၢ်ဒုးတၢ်ယၤ ကဲထီၣ်,ကဘီယူၤ ဟဲခးလီၤတၢ်အဃိ ဘံလ့ကီၢ်ဆၣ်ပူၤ ကရူၢ်(၃)ဘ့ၣ် သဝီ(၁၃)ဖျၢၣ် ပှၤနီၣ်ဂံၢ်(၁၃၀၀၀)ဘျဲၣ်ဒီး ဖၣ်အၣ်ကီၢ်ဆၣ် ဟးတရဲးကရူၢ်ပူၤ သဝီ(၉)ဖျၢၣ် ပှၤနီၣ်ဂံၢ်(၆၂၀၀)ဘျဲၣ် ပၥ်ဖှိၣ်ခဲလၢၥ်ပှၤအဂၤ(၂၀,၀၀၀)ဃၣ်ဃၣ်ဘၣ်ဃ့ၢ်ထီၣ်ဝဲဒၣ်န့ၣ်လီၤ.