လါမ့ၤ ၂၄ သီ, ၂၀၂၆ နံၣ်, ခ့ၣ်အဲးစံၣ်
လၢခ့ၣ်အဲၣ်ယူၣ် ဒူပျၥ်ယၥ်ကီၢ်ရ့ၣ်(သုးက့ ၆)ကီးတရံးကီၢ်ဆၣ် ကၠဲးဒိဝ့ၢ်ပူၤ ဖဲတနံၤအံၤလါမ့ၤ ၂၄ သီ မုၢ်ထူၣ် အဆၢကတီၢ် ကဘီယူၤလဲၤတ့ၢ်လီၤမ့ၣ်ပိၢ်အဃိ ကမျၢၢ်ပိၥ်မုၣ်သံဝဲ(၃)ဂၤဒီး ဘၣ်ဒိဘၣ်ထံးဝဲ (၂)ဂၤအဂ့ၢ်န့ၣ် သ့ၣ်ညါဘၣ်လၢ လီၢ်ကဝီၤကမျၢၢ်အအိၣ်န့ၣ်လီၤ.
ဖဲတဂီၤအံၤမုၢ်ဘူးကထူၣ်ကဘၣ်ဖဲ ၁၂း၂၀ မံးနံးဃၣ်ဃၣ်အဆၢကတီၢ်န့ၣ် တၢ်ဒုးကဲထီၣ်တအိၣ်သုးမီၤစိရိၤကဘီယူၤတ ဘ့ၣ် ဟဲတ့ၢ်လီၤဝဲမ့ၣ်ပိၢ်လၢကၠဲးဒိဝ့ၢ်နုၥ်လီၤတိၤခိၣ်ထိး လီၤတ့ၢ်ပိၢ်ဖးထီၣ်ဝဲလၢ(ခ့ၣ်အဲၣ်ယူၣ်)တၢ်အိၣ်ခိးတြဲၤလီၢ်ကပၤ (ဆာကူရာ) တၢ်အီၣ်ကျးလီၢ်အဂ့ၢ်န့ၣ် လီၢ်ကဝီၤပှၤဘၣ်မူဘၣ်ဒါ စံးဝဲန့ၣ်လီၤ.
“အဟဲတ့ၢ်လီၤဝဲန့ၣ်ကဘၣ်ဖဲ ၁၂း၀၀ နၣ်ရံၣ်န့ၣ်လီၤ. လီၤတဲၥ်ဝဲဖဲ(ဆာကူရာ)တၢ်အီၣ်ကျးကပၤန့ၣ် .ပှၤသံန့ၣ် (၃)ဂၤအပိၥ်မုၣ် ခဲလၢၥ်လီၤ, တဂၤန့ၣ်ကဲထီၣ်ကျးကစၢ်,လၢအဝဲတဂၤန့ၣ်ကျးကစၢ်အပျဲၢ်မုၣ်အမိ, မ့မ့ၢ်လၢအဂၤတဂၤန့ၣ်ပှၤလၢအဟဲပှ့ၤအီၣ် တၢ်လၢကျးပူၤလီၤ. တကးဒံးဘၣ်ကျးကစၢ်အဝၤဒီးအပျဲၢ်မုၣ်န့ၣ် ဘၣ်ဒိ .”အဂ့ၢ်န့ၣ် စံးဘၣ် ခ့ၣ်အဲးစံၣ်-ကညီတၢ်ကစီၣ် န့ၣ်လီၤ.
ကၠဲးဒိဝ့ၢ်နုၥ်လီၤတိၤခိၣ်ထိးလၢကဘီယူၤလဲၤတ့ၢ်လီၤမ့ၣ်ပိၢ်အံၤန့ၣ် အိၣ်ဘူးဝဲဒၣ်ဒီးခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ တၢ်အိၣ်ခိးတြဲၤလီၢ်အဃိ ကမျၢၢ်အကျးတၢ်သူၣ်ထီၣ်,ဟံၣ်တၢ်သူၣ်ထီၣ်တစှန့ၢ်(၄)ဖျၢၣ် ဃုၥ်ဒီးသိလ့ၣ်ဟးဂူၥ်ဟးဂီၤဝဲ အဂ့ၢ်န့ၣ် လီၢ်ကဝီၤပှၤဘၣ်မူဘၣ်ဒါစံးဝဲန့ၣ်လီၤ.
ဘၣ်ဃးတၢ်ဂ့ၢ်လၢကဘီယူၤဟဲခးလီၤတၢ်အံၤဒ်သိးကသ့ၣ်ညါအါထီၣ်ဘၣ်တၢ်ဂ့ၢ်တၢ်ကျိၤအဂီၢ် ပခ့ၣ်အဲးစံၣ်-ကညီတၢ်ကစီၣ် ဆဲးကျိးဒီးဟီၣ်ကဝီၤပှၤဘၣ်မူဘၣ်ဒါဘၣ်ထွဲတဖၣ်ဘၣ်ဆၣ် ဆဲးကျိးတန့ၢ်ဝဲဘၣ်န့ၣ်လီၤ.
ဟီၣ်ကဝီၤဝဲန့ၣ်စးထီၣ်ဖဲအပူၤကွံၥ်(၂၀၂၄)အခါန့ၣ် သုးကလၢၤလၢအိၣ်ဆီလီၤသးဖဲန့ၣ်တဖၣ် ဘၣ်တၢ်ထီၣ်န့ၢ်အီၤ လၢ ဟီၣ်ကဝီၤ(KNLA)သုးပၥ်ဖှိၣ်အံၤအဃိ ဟီၣ်ကဝီၤဖဲန့ၣ်တုၤဃီလၢကီၢ်ဆၢ ပၢချၢသဝီန့ၣ် သုးမီၤစိရိၤတၢ်ပၢ တၢ်ြပး တအိၣ်လၢၤဘၣ်တုၤလၢခဲအံၤန့ၣ်လီၤ.
စးထီၣ်ဖဲသုးခိၣ်ယဲဝ့အူထီၣ်ကဒါက့ၤမ့အီၤလဲၤအလီၢ်ဝံၤလီၢ်ခံတဘျီဃီန့ၣ် ခ့ၣ်အဲၣ်ယူၣ်ဟီၣ်ကဝီၤဃုၥ်ဒီးကလုၥ်ဒူၣ်ဖီၣ်စုကဝဲၤ တၢ်ပၢၢ်ဆၢဟီၣ်ကဝီၤအပူၤ တၢ်ဒုးကဲထီၣ်အိၣ်ဂ့ၤတအိၣ်ဂ့ၤ သူဝဲဒၣ်ကဘီယူၤ,ဒြိ,ပၤရၤမီၤတၤလ့ၤထံကဘီယူၤဟးခးလီၤဝဲ တၢ်အိၣ်ဝဲကိးမုၢ်နံၤဒဲးဃၣ်ဃၣ်အဃိ ကမျၢၢ်သံဘၣ်ဒိဘၣ်ထံး,တၢ်သူၣ်ထီၣ်တဖၣ်ဟးဂီၤအနီၣ်ဂံၢ်နီၣ်ဒွးဟဲအါထီၣ်ဝဲဒၣ်ကွ့ၢ်ကွ့ၢ် အဂ့ၢ်န့ၣ် ကရူၢ်ကရၢခိၣ်နၢ်ဘၣ်ထွဲတဖၣ်စံးဝဲန့ၣ်လီၤ.