လါယူၤလံ ၁၄ သီ, ၂၀၂၆ နံၣ်, ခ့ၣ်အဲးစံၣ်
ခ့ၣ်အဲၣ်ယူၣ် မုၢ်တြီၢ်ကီၢ်ရ့ၣ်(သုးက့ ၅)ဟီၣ်ကဝီၤပူၤ သုးမီၤစိရိၤကဘီယူၤလဲၤခးလီၤတၢ်တပယူၥ်ဃီအဃိ ကမျၢၢ်ဘၣ်ဒိ ကဒီးဝဲ(၄)ဂၤဒီး ဟံၣ်တၢ်သူၣ်ထီၣ်ဟးဂီၤဘၣ်ဒိဘၣ်ထံးဝဲ(၁၆)ဖျၢၣ်အဂ့ၢ်န့ၣ် သ့ၣ်ညါဘၣ်လၢလီၢ်ကဝီၤပှၤဘၣ်မူ ဘၣ်ဒါအအိၣ် န့ၣ်လီၤ.
လၢလူၤသီကီၢ်ဆၣ် ကလီၥ်ထၣ်ကရူၢ် ကၢၢ်ဂီၤကၠိသဝီအပူၤ ဖဲလါယူၤလံ ၁၂ သီ ဟါခီ ၇း၅၇ မံးနံးတုၤဃီၤဝဲလၢ ၈း၀၉ မံးနံးန့ၣ် ကဘီယူၤလဲၤတ့ၢ်လီၤဝဲပီၣ်(၅၀၀)မ့ၣ်ပိၢ် ၄ ဖျၢၣ်ဒီး တကတီၢ်ဃီစးထီၣ်ကဒီးဖဲ ၈း၃၁ မံးနံးတုၤဃီၤလၢ ၈း၃၉ မံးနံးတစုန့ၣ် (Y-12) ကဘီယူၤလဲၤတ့ၢ်လီၤကဒီးဝဲမ့ၣ်ပိၢ်(၃၈)ဖျၢၣ်ညါန့ၣ်လီၤ.
လၢတၢ်န့ၣ်အဃိ သဝီဖိဟံၣ်ဟးဂီၤဝဲ(၁၆)ဖျၢၣ်အသိး ကမျၢၢ်လၢအမ့ၢ် စီၤသူမှဲ(၄၁)နံၣ်, နီၢ်လွဲစ့(၃၅)နံၣ်, စီၤမူဂ့ၤ(၁၉)နံၣ်ဒီး ဖိသၣ် စီၤယွၤဘျုးမူ(၈)နံၣ်သ့ၣ်တဖၣ်အံၤဘၣ်ဒိဘၣ်ထံးဝဲဒၣ်အစု,အခီၣ်,အခိၣ်,အချၢဃံအမိၢ်ပှၢ်သ့ၣ်တဖၣ်စုၥ်စုၥ်အဂ့ၢ်န့ၣ် လီၢ်ကဝီၤ ပှၤဘၣ်မူဘၣ်ဒါစံးဝဲန့ၣ်လီၤ.
တကးဒံးဘၣ်ဖဲတနံၤအံၤလါယူၤလံ ၁၄ သီ ဂီၤခီအဆၢကတီၢ်အံၤစ့ၢ်ကီး သုးမီၤစိရိၤကဘီယူၤဟဲတ့ၢ်လီၤကဒီးဝဲမ့ၣ်ပိၢ်လၢ နိၣ်ဖီထံသဝီ ဒီး မဲၥ်ခူၣ်ခံသဝီသ့ၣ်တဖၣ်အံၤအပူၤအဂ့ၢ်န့ၣ် သ့ၣ်ညါဘၣ်လၢဂံၢ်ခီၣ်ထံးပှၤဟ့ၣ်တၢ်ကစီၣ်ဖိအအိၣ်န့ၣ်လီၤ.
(သုးက့ ၅)ဟီၣ်ကဝီၤအပူၤ အဘူးကတၢၢ်ဖဲအပူၤကွံၥ်လါယူၤလံ ၉ သီဒီး ၁၀ သီအနံၤန့ၣ်စ့ၢ်ကီး လၢဒွဲၣ်လိကီၢ်ဆၣ် ကတၢတံၥ်ကရူၢ် ဒီး ဘုသိၣ်ကီၢ်ဆၣ် ဒ့ဝါကရူၢ်အပူၤ ကဘီယူၤလဲၤခးလီၤတၢ်အဃိ ကမျၢၢ်ဘၣ်ဒိဝဲ(၁)ဂၤဒီး ကျီၢ်,ထိးတစှၤန့ၢ် (၁၁)ဒုသံဝဲအသိး ဟံၣ်ဟးဂီၤစ့ၢ်ကီးဝဲ ဟံၣ်တၢ်သူၣ်ထီၣ်ဟးဂီၤကဲထီၣ်ဒံးဝဲန့ၣ်လီၤ.
ပယီၤသုးအံၤလၢကဆဲးလဲၤထီၣ်ဆူဖၣ်ပူၣ်အံၤအဂီၢ်ဟဲထီၣ်ဟူးဂဲၤဝဲဒၣ်ဖဲကတၢတံၥ်ဟီၣ်ကဝီၤပူၤဖဲန့ၣ်တၢ်ဆၢကတီၢ် ထီၣ်ဘး ဝဲလၢအသီ(၂၀)ဃၣ်ဃၣ်လံဘၣ်ဆၣ်ထီၣ်ဆူညါတန့ၢ်ဒီး တုၤလၢခဲအံၤဟီၣ်ကဝီၤလၢအဝဲသ့ၣ်ဟဲတုၤအိၣ်အလီၢ်န့ၣ် ဒုးယၤ တၢ်ဖ့ၣ်စၢဆဲးကဲထီၣ်ဒံးဝဲလၢ ဟီၣ်ကဝီၤကညီဒီ ကလုၥ်တၢ်ထူၣ်ဖျဲး သုးမုၢ်ဒိၣ်(KNLA)သုးပၥ်ဖှိၣ်ဒီးပယီၤသုးအဘၢၣ်စၢၤ အဖၢမုၢ်န့ၣ်လီၤ.