လါယူၤလံ ၁၃ သီ, ၂၀၂၆ နံၣ်, ခ့ၣ်အဲးစံၣ်
ခ့ၣ်အဲၣ်ယူၣ် ချၢၣ်လွံၢ်ထူၣ်ကီၢ်ရ့ၣ်(သုးက့ ၃)တၢ်ပၢ မူကီၢ်ဆၣ်,လၢၢ်ဒိၣ်ကီၢ်ဆၣ် ဒီး ဆီထံးကီၢ်ဆၣ်ဟီၣ်ကဝီၤအပူၤ တနံၣ်အံၤ (၂၀၂၆)လါယနူၤအါရံၤတုၤလါယူၤလၢ(၆)လါအတီၢ်ပူၤ ခီဖျိသုးမီၤစိရိၤအကျိဖးဒိၣ်,ကဘီယူၤဒီးဒြိအဃိ ကမျၢၢ်သံဝဲ(၇၃)ဂၤ ဒီး ကၠိ, တၢ်ဆါဟံၣ်,တၢ်ဘူၣ်တၢ်ဘါဃုၥ်ဒီးဟံၣ်တၢ်သူၣ်ထီၣ်ဟးဂီၤဝဲ(၂၀၀)ဘျဲၣ်အဂ့ၢ်န့ၣ် သ့ၣ်ညါဘၣ်လၢကီၢ်ရ့ၣ်တၢ်မၤနီၣ်စရီပူၤ အသိး န့ၣ်လီၤ.
ဒ်ကီၢ်ရ့ၣ်တၢ်မၤနီၣ်စရီပူၤအိၣ်ဝဲအသိးန့ၣ် လၢတၢ်(၆)လါအတီၢ်ပူၤအံၤ ပယီၤသုးခးလီၤတပျုၥ်တပျီၥ်ကျိဖးဒိၣ်(၉၆)ဘျီ ခးလီၤဝဲ(၃၉၃)ဖျၢၣ်, ကဘီယူၤလဲၤခးလီၤတၢ်(၈၂)ဘျီ တ့ၢ်လီၤဝဲမ့ၣ်ပိၢ်အချံ(၂၀၂)ဖျၢၣ်, လဲၤခးလီၤတၢ်ဒီးဒြိ(၁၇၀)ဘျီ တ့ၢ်လီၤ ဝဲမ့ၣ်ပိၢ်အချံ(၃၄၂)ဖျၢၣ် ညါန့ၣ်လီၤ.
ခီဖျိလၢသုးမီၤစိရိၤအတၢ်ဟူးတၢ်ဂဲၤသ့ၣ်တဖၣ်အံၤအဃိ လီၢ်ကဝီၤကမျၢၢ်ပိၥ်မုၣ်သံဝဲ(၃၅)ဂၤ, ပိၥ်ခွါ(၃၈)ဂၤပၥ်ဖှိၣ်ခဲလၢၥ် အိၣ်ဝဲ (၇၃)ဂၤ တကးဒံးဘၣ်ကမျၢၢ်ဘၣ်ဒိဘၣ်ထံး(၁၁၆)ဂၤအကျါပၣ်ဃုၥ်ဝဲပိၥ်ခွါ(၇၅)ဂၤဒီး ပိၥ်မုၣ်(၄၀)ဂၤအဂ့ၢ်န့ၣ် လံၥ်တၢ်မၤနီၣ် စရီအပူၤ ပၥ်ဖျါဝဲန့ၣ်လီၤ.
မ့ဘၣ်က့ၤကွၢ်ကဒါလၢတၢ်သံစရီအပူၤန့ၣ် လါမးရှးတလါအတီၢ်ပူၤန့ၣ်ကမျၢၢ်သံဝဲ(၄၄)ဂၤအနီၣ်ဂံၢ်အါန့ၢ်ဒံးလါလၢအဂၤဒီး မ့မ့ၢ်လၢလါယနူၤအါရံၤန့ၣ်သံဝဲ(၁၄)ဂၤ,လါဖ့ၤဘြူၤအါရံၤ(၃)ဂၤ,လါအ့ဖြ့ၣ် ၆ ဂၤ, လါမ့ၤ(၅)ဂၤဒီး လါယူၤန့ၣ်သံဝဲ(၁)ဂၤ န့ၣ်လီၤ.
လၢန့ၣ်အမဲၥ်ညါလၢတၢ်(၆)လါအတီၢ်ပူၤအံၤစ့ၢ်ကီး ပယီၤသုးအံၤဖီၣ်ဝဲကမျၢၢ်ပိၥ်မုၣ်(၁၅၅)ဂၤ,ပိၥ်ခွါ(၁၉၉)ဂၤ ပၥ်ဖှိၣ်ခဲလၢၥ် (၃၅၄)ဂၤန့ၣ်လီၤ.
ဒ်န့ၣ်အသိးခီဖျိလၢသုးမီၤစိရိၤအတၢ်ဟူးတၢ်ဂဲၤအကလုၥ်ကလုၥ်အဃိ ကမျၢၢ်သံဘၣ်ဒိဘၣ်ထံးအမဲၥ်ညါ ဟံၣ်ဟးဂီၤဝဲ (၂၀၂)ဖျၢၣ် တကးဒံးဘၣ် ကၠိတၢ်သူၣ်ထီၣ်(၁၀)ဖျၢၣ်,သီခါဖၠၣ်(၉)ဖျၢၣ်ဒီးတၢ်ဆါဟံၣ်(၃)ဖျၢၣ် ပၥ်ဖှိၣ်ခဲလၢၥ်(၂၂၄)ဖျၢၣ်ဟးဂူၥ်ဟးဂီၤ အသိး ကျီၢ်,ပနၢ်,ထိး,ကသ့ၣ် သံဝဲ(၁၈)ဒုဒီး စဲးကၢး,သိလ့ၣ်,လ့ၣ်,စဲးကွးတၢ်,သိလ့ၣ်ဘဲးဖိဟးဂီၤဝဲ(၁၇)ခိၣ်အဂ့ၢ်န့ၣ် တၢ်မၤနီၣ်စရီအပူၤ ပၥ်ဖျါဃုၥ်ဝဲန့ၣ်လီၤ.