လါယူၤလံ ၆ သီ, ၂၀၂၆ နံၣ်, ခ့ၣ်အဲးစံၣ်
လၢခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ ဒူသထူၣ်ကီၢ်ရ့ၣ်(သုးက့ ၁) သထူၣ်ကီၢ်ဆၣ် ဒီၣ်ယၣ်ကရူၢ်အပူၤ ပယီၤသုးဟဲထီၣ် ကဒီးဝဲ အါအါဂီၢ်ဂီၢ်အဃိ တၢ်ဒုးကဲထီၣ်ဝဲဒီးဟီၣ်ကဝီၤကညီဒီကလုၥ်တၢ်ထူၣ်ဖျဲးသုးမုၢ်ဒိၣ်(KNLA)အဂ့ၢ်န့ၣ် သ့ၣ်ညါဘၣ်လၢ လီၢ်ကဝီၤ ပှၤဘၣ်မူဘၣ်ဒါအအိၣ်န့ၣ်လီၤ.
ဖဲမဟါလါယူၤလံ ၅ သီအနံၤန့ၣ် လၢဘံလ့ဝ့ၢ်အံၤတဆီပယီၤသုးဂံၢ်ဘါ(၁၀၀)ဘျဲၣ်ဟဲထီၣ်နုၥ်လီၤဝဲဒၣ်ဒီးသိလ့ၣ်လၢ ကၠဲးကၠံၢ်ခး သဝီဒီး ကၠဲးတူၢ်ကိသဝီတကပၤဒီး ဖဲန့ၣ်တၢ်ဒုးကဲဝဲဒိၣ်ဒိၣ်မုၢ်မုၢ်လၢပယီၤသုးဒီး(KNLA) သုးရ့ၣ်-၂ သုးဒ့-၂ အပှၤအဘၢၣ်စၢၤ န့ၣ်လီၤ.
လၢတၢ်ဒုးကဲထီၣ်ဘျီဝဲအံၤအပူၤခီဖျိပယီၤသုးတကပၤတၢ်ဘၣ်ဒိဘၣ်ထံးအါတူၢ်ဝဲတကဲလၢၤဘၣ်အဃိ ဘၣ်ဂုၤကဒါက့ၤလီၢ်ခံဒီး ဖဲန့ၣ်တၢ်ပၢၢ်ဆၢသုးကရူၢ် တကပၤမၤန့ၢ်ဝဲပယီၤသုးအသိလ့ၣ်(၃)ခိၣ်ဘၣ်ဟဲအိၣ်ထီၣ်ဝဲဒ်အံၤလီၤအဂ့ၢ်န့ၣ် သ့ၣ်ညါဘၣ်န့ၣ်လီၤ.
“ဖဲမဟါတနံၤန့ၣ်တၢ်ခးလိၥ်သးကဲထီၣ်ဒီတနံၤလီၤ. အဝဲသ့ၣ်ဟဲထီၣ်ဝဲဖဲကၠဲးကၠံၣ်ခးတၢ်ပၢၢ်ဆၢအတြၤဘျီဟဲထီၣ် ဆိမိၣ်ဝဲလၢပှၤ တအိၣ်နီတဂၤဘၣ်. ပှၤခးဖဲန့ၣ်ဘျီအကါန့ၣ်အိၣ်တ့ၢ်(၃)ခိၣ်. ကါအဝဲတခိၣ်န့ၣ်(အ့ၤကၠံၤ)တဲၢ်ဖး, အဝဲတခိၣ်န့ၣ် လီၤလၢတၢ်ကပၤ. ခဲအံၤဘၣ်ဃးတၢ်ဟးဂူၥ်ဟးဂီၤဒုမၤလီၤတံၢ်တန့ၢ်ဒံးဘၣ်.ဘၣ်မနုၤလဲၣ်ခဲအံၤပယီၤသုး အိၣ်ဒံးတဲဖဲ ကၠဲးကၠံၣ်ခး ဒီးကၠဲးတူၢ်ကိ သဝီ ဘၢၣ်စၢၤန့ၣ်အိၣ်,လၢကၠဲးတူၢ်ကိဃိၣ်နါက့န့ၣ်အိၣ်,မ့ဝံၤလၢခဲမီၣ်သဝီန့ၣ်စ့ၢ်ကီးပယီၤသုးဟဲထီၣ်အိၣ်ဒူၣ်ဒူၣ်လီၤ.” အဂ့ၢ်န့ၣ် စံးဘၣ်ခ့ၣ်အဲးစံၣ်-ကညီတၢ် ကစီၣ်ဖဲတဂီၤအံၤန့ၣ်လီၤ.
ကၠဲးကၠံၣ်ခးဒီးကၠဲးတူၢ်ကိသဝီလၢအိၣ်တခီတဝၢ်ဝၢ်ဒီးဘံလ့ဝ့ၢ် ဘုလိၥ်ကျိအံၤန့ၣ် သိလ့ၣ်လၢအိၣ်ဟဲက့ၤလိၤလၢမၠၣ်ဝတံၣ်ကီၢ်ဆၢ အံၤတဖၣ်ဘၣ် ကက့ၤလီၤဆူလၥ်ခီတကပၤအဂီၢ်ဘၣ်ဟဲက့ၤခီဖျိဝဲဟီၣ်ကဝီၤ(KNLA) သုးရ့ၣ်-၂ သုးဒ့-၂ အတြဲၤအံၤ အဂ့ၢ်န့ၣ် သ့ၣ်ညါဘၣ် န့ၣ်လီၤ.
ဒ်န့ၣ်အသိးလီၤဆီဒၣ်တၢ်သိလ့ၣ်လၢတၢ်ဟဲက့ၤလီၤစိၥ်ဝဲတဖၣ်အံၤတၢ်ခိတၢ်သွဲန့ၣ်တၢ်ပၢၢ်ဆၢကရူၢ်ကရၢဒိးန့ၢ်ဘၣ်ဝဲဘၣ်ဆၣ် ပယီၤသုးတကပၤဒိးန့ၢ်ဘၣ်ဝဲတအိၣ်ဘၣ်အဃိ လၢကဒိၣ်စိက့ၤဟီၣ်ကဝီၤအံၤအဂီၢ် ပယီၤသုးသူအဂံၢ်အဘါအါအါဂီၢ်ဂီၢ်ဘၣ်ဟဲထီၣ် ဝဲဒ်အံၤလီၤအဂ့ၢ်န့ၣ် လီၢ်ကဝီၤပှၤဘၣ်မူဘၣ်ဒါပဲၥ်ထံနီၤဖးစံးဝဲန့ၣ်လီၤ.
“အဝဲသ့ၣ်ဟဲထီၣ်အခိၣ်သ့ၣ်န့ၣ်လၢကအဲၣ်ဒိး ဒိၣ်စိဝဲဟီၣ်ကဝီၤဖဲအံၤလီၤ. လၢတၢ်ယီၤခါန့ၣ်အဝဲသ့ၣ်ဟဲထီၣ်တ့ၢ်ဝဲတဘျီလံ. တၢ်လီၢ်ဖဲအံၤန့ၣ်ကါလၢအိၣ်ဟဲက့ၤလီၤလၢယိၤကီၢ် ကီၢ်ဆၢတကပၤန့ၣ်ဟဲက့ၤဘၣ်ဖဲအံၤလီၤ. ခဲအံၤအဝဲသ့ၣ်ဟဲထီၣ်ကဒီး တၢ်ခးနးပၢၢ်အဝဲသ့ၣ်ပၢၢ်တုၤလၢအကါအိၣ်တ့ၢ်ဒုအကဘၣ်ဒိဆါ ဖးနးညါ”အဂ့ၢ်န့ၣ် (KNLA)သုးခိၣ်တဂၤ စံးစ့ၢ်ကီးဝဲန့ၣ်လီၤ.
ဒူသဝီ(၂)ဖျၢၣ်အံၤအပူၤကွံၥ်တနံၣ်အံၤ(၂၀၂၆)လါယနူၤအါရံၤ ၁၀ သီအခါစ့ၢ်ကီး ပယီၤသုးကျိၤနုၥ်လီၤဟူးဂဲၤတ့ၢ်ဒံးဝဲဒီး ဒ်န့ၣ် အသိးဖဲပယီၤသုးအံၤဖဲအဝဲသ့ၣ်နုၥ်လီၤအခါဟံန့ၢ်ကမျၢၢ်လၢအဃ့ၢ်ထီၣ်တဖၣ်အံၤအကျိၣ်အစ့,တၢ်ဖိတၢ်လံၤ တကးဒံးဘၣ် ခးသံကွံၥ်ဝဲကမျၢၢ်(၃)ဂၤလၢကဲထီၣ်ဒံးဝဲန့ၣ်လီၤ.
ဘၣ်ဆၣ်ဖဲတၢ်ဘျီန့ၣ်ပယီၤသုးအံၤဟဲထီၣ်ဟူးဂဲၤဝဲတၢ်ဆၢကတီၢ်န့ၢ်ဝဲထဲလၢ(၂)သီအတီၢ်ပူၤ ခီဖျိတၢ်ပၢၢ်ဆၢလဲၤခးအဝဲသ့ၣ်တူၢ်ဝဲ တကဲလၢၤဘၣ်အဃိ ဘၣ်ဂုၤကဒါလီၢ်ခံန့ၣ်လီၤ.
တကီၢ်ခါခဲအံၤခီဖျိပယီၤသုးဟဲထီၣ်တၢ်ဒုးက့ကဲထီၣ်ကဒါအဃိ ကၠဲးကၠံၢ်ခးသဝီ,ကၠဲးတူၢ်ကိသဝီဃုၥ်ဒီးဒူသဝီလၢအိၣ်ဖဲန့ၣ် လၢအပူၤကွံၥ်ဘၣ်ဃ့ၢ်ထီၣ်တ့ၢ်ဝဲအံၤတဖၣ် ခဲအံၤဘၣ်ဃ့ၢ်ထီၣ်ကဒီးဝဲအသီတဘျီအဂ့ၢ်န့ၣ် သ့ၣ်ညါဘၣ်လၢဂံၢ်ခီၣ်ထံးပှၤဟ့ၣ် တၢ်ကစီၣ်ဖိအအိၣ်န့ၣ် လီၤ.