လါယူၤလံ ၁၃သီ, ၂၀၂၆နံၣ်, ခ့ၣ်အဲးစံၣ်.
ကီၢ်ကၠီၣ်တဲၣ် ဘီကီးဝ့ၢ် (လးဖရါဝ်) မုၢ်နၤခီတၢ်မုၥ်လၤသးဖှံအလီၢ်(သံးကျး), မဟါလါယူၤလံ (၁၂) သီ မုၢ်နၤခီ(၁၂)နၣ်ရံၣ်အဆၢကတီၢ် မ့ၣ်အူအီၣ်ထီၣ်တၢ်ကဲထီၣ်ဝဲအသးအဃိ,ပှၤသံဝဲတစှၤန့ၢ်(၂၇)ဂၤ ဒီး ဘၣ်ဒိဘၣ်ထံးဝဲ (၆၃)ဂၤအဂ့ၢ်, ကၠီၣ်တဲၣ်တၢ်ကစီၣ်သန့တဖၣ် ပၥ်ဖျါထီၣ်ဝဲဒၣ်န့ၣ်လီၤ.
ဒ်ကၠီၣ်တဲၣ်တၢ်ကစီၣ်သန့တဖၣ်ပၥ်ဖျါထီၣ်ဝဲအသိးန့ၣ် ပှၤ(၂၇)ဂၤလၢအသံဖဲမ့ၣ်အူအီၣ်တၢ်ကဲထီၣ်သးအပူၤတဖၣ်အံၤ တၢ်သမံသမိးပၥ်ဂၢၢ်ပၥ်ကျၢၤအမံၤအသၣ်န့ၢ်ဒံးဒၣ်ထဲအဂၤ(၁၀)ဒီး မ့မ့ၢ် ပှၤဘၣ်ဒိဘၣ် ထံး(၆၃)ဂၤတဖၣ်တခီ အိၣ်ဝဲလၢသးသမူတၢ်လီၤဘၣ်ယိၣ်ပတီၢ်(၂၂)ဂၤ အဂ့ၢ် ပၥ်ဖျါဝဲဒၣ်န့ၣ်လီၤ.
(လးဖရါဝ်)သံးကျးပူၤ မ့ၣ်အူအီၣ်တၢ်အံၤ ကဲထီၣ်သး ယံၥ်ဝဲအမံးနံး(၃၀)ဃၣ်ဃၣ်အလီၢ်ခံ ပှၤမၤသံမ့ၣ်အူဖိတဖၣ်ဖီၣ်ဂၢၢ် က့ၤဝဲ တၢ်အိၣ်သး အဂ့ၢ် ကၠီၣ်တဲၣ်တၢ်ကစီၣ်သန့တဖၣ်ပၥ်ဖျါဝဲန့ၣ်လီၤ.
လၢန့ၣ်အမဲၥ်ညါ တၢ်ကဲထီၣ်သးဝံၤလီၢ်အခံ, လၢတၢ်ကဃုထံၣ်သ့ၣ်ညါဘၣ်ဝဲ မ့ၣ်အူအီၣ်တၢ် ကဲထီၣ်သးအခီၣ်ထံးခီၣ်ဘိအဂီၢ် တနံၤအံၤလါယူၤလံ (၁၃)သီဂီၤခီအနံၤန့ၣ် ကၠီၣ်တဲၣ်ပၢၤကီၢ် ပှၤဘၣ်မူ ဘၣ်ဒါတဖၣ် နုၥ်လီၤမၤဝဲတၢ်သမံသမိးလၢကျးအံၤအပူၤအဂ့ၢ် သ့ၣ်ညါဘၣ်န့ၣ်လီၤ.
မ့ၣ်အူအီၣ်တၢ်ဒီး တၢ်သံတၢ်ပှၢ်တၢ်ဘၣ်ဒိဘၣ်ထံးကဲထီၣ်သးဒိၣ်ဒိၣ်မုၢ်မုၢ် အဖီခိၣ်,ကီၢ်ကၠီၣ်တဲၣ် လီသဟီၣ်ဂံၢ်ဘါကိတိၥ်ဝဲၤကျိၤ ( Ministry of Energy) အပှၤကတိၤတၢ်ပၢ (Phongphon Yodmuangcharoen) ပၥ်ဖျါထီၣ်ဝဲအတၢ်သူၣ်အုးသးအုး လၢစိၤရှၢၣ်မံးဒံးယၢၣ်အပူၤ ဃုၥ်ဒီး ပှၤလၢအတူၢ်ဘၣ်တၢ် ဟံၣ်ဖိဃီဖိတဖၣ် အဂ့ၢ် ကၠီၣ်တဲၣ်တၢ်ကစီၣ်သန့တနီၤပၥ်ဖျါဝဲ န့ၣ်လီၤ.
ဒ်လီသဟီၣ်ဂံၢ်ဘါကိတိၥ်ဝဲၤကျိၤ(Ministry of Energy) တၢ်ဘျၢသဲစး တၢ်ထိၣ်တၢ်ဒွးကွၢ် ဒီး (Technical)ကူၣ်သ့အတၢ်သ့တၢ်ဘၣ် တၢ်ကဲထီၣ်သး အကျိၤအကျဲအိၣ်ဝဲသ့အသိးန့ၣ်, ကျးပူၤမ့ၣ်အူအီၣ်ထီၣ် တၢ်အံၤ ကဲထီၣ်ဝဲအသး ခီဖျိလၢ ဂံၢ်ခီၣ်ထံးတၢ်သူဝဲလီမ့ၣ်အူအဂံၢ်အါတလၢအဃိအဂ့ၢ် ပၥ်ဖျါထီၣ်ဝဲ အတၢ်ပဲၥ်ထံနီဖး စ့ၢ်ကီး န့ၣ်လီၤ.
ဒ်န့ၣ်အသိး, လၢတၢ်ကမၤလီၤတံၢ်က့ၤဝဲတၢ်ကဲထီၣ်သးအံၤအဂီၢ် ပၢၤကီၢ်ပှၤဘၣ်မူဘၣ်ဒါတဖၣ်စ့ၢ်ကီး တကီၢ်ခါခဲအံၤ သမံသမိးဝဲ ကျးအတၢ်သူၣ်ထီၣ်ဆီလီၤသးက့ၢ်ဂီၤ ဖိးသဲစးလံၥ်လဲၢ်, ဂ့ၢ်ဂီၢ်အူတၢ်ဃ့ၢ်ထီၣ်ကျဲ,တၢ်သူလီမ့ၣ်အူဂံၢ်ဘါ, ဃုၥ်ဒီး (CCTV)ခဲမရၢ် အတၢ်မၤနီၣ်မၤဃါတဖၣ်လံဒီးမၤဝဲတၢ်မၤနီၣ်မၤဃါလံ အဂ့ၢ်, သ့ၣ်ညါဘၣ်န့ၣ်လီၤ.