လါယူၤလံ ၃ သီ, ၂၀၂၆ နံၣ်, ခ့ၣ်အဲးစံၣ်
ခ့ၣ်အဲၣ်ယူၣ် ဒူသထူၣ်ကီၢ်ရ့ၣ်(သုးက့ ၁)ကၠဲးထိၣ်ကိၢ်ဆၣ် တကွံပူၤကရူၢ်အပူၤ တနံၤအံၤလါယူၤ ၃ သီ မုၢ်ထူၣ်အဆၢကတီၢ်န့ၣ် သုးမီၤစိရိၤကဘီယူၤလဲၤတ့ၢ်လီၤကဒီးဝဲမ့ၣ်ပိၢ်အဃိ ကမျၢၢ်ပိၥ်ခွါဘၣ်ဒိ(၁)ဂၤဒီး ဟံၣ်ဃုၥ်ဒီးသိလ့ၣ် ဟးဂီၤဘၣ်ဒိဘၣ်ထံးဝဲ အဂ့ၢ်န့ၣ် သ့ၣ်ညါဘၣ်လီၢ်ကဝီၤပှၤဘၣ်မူဘၣ်ဒါအအိၣ်န့ၣ်လီၤ.
စံကိ(ဇီးကုန်း)သဝီလၢအိၣ်ကျဲမုၢ်ကပၤအံၤ ဖဲတနံၤအံၤကဘၣ်ဖဲမုၢ်ထူၣ် ၁၂း၃၀ မံးနံးဃၣ်ဃၣ်အဆၢကတီၢ်န့ၣ် တၢ်ဒုးကဲထီၣ် တအိၣ်(jet fighter)ကဘီယူၤလဲၤတ့ၢ်လီၤဝဲပီၣ်မ့ၣ်ပိၢ်(၁)ဖျၢၣ် လီၤတဲၥ်ပိၢ်ဖးထီၣ်ဝဲလၢသဝီပူၤ ဟံၣ်တဖျၢၣ်ကရၢၢ်ပူၤအဃိ ဖဲန့ၣ်အူဖိမီၤလၢအသးနံၣ်အိၣ်ဝဲအနံၣ်(၈၀)အံၤအဟံၣ်လီၤပှီၢ် ဟးဂီၤကွံၥ်ဝဲန့ၣ်လီၤ.
တကးဒံးဘၣ်ဟံၣ်ဟးဂီၤအမဲၥ်ညါ ပီၣ်မ့ၣ်ပိၢ်အက့အခီအံၤအဃိ ဟံၣ်ကစၢ်ဖုသးပှၢ်အူဖိမီၤအံၤ ဘၣ်ဒိဘၣ်ထံးဝဲအသိး သိလ့ၣ်စ့ၢ်ကီးဟးဂူၥ်ဟးဂီၤ,တၢ်ထူၣ်တၢ်ဘိလၢအိၣ်ဟံၣ်ခိၣ်ဟံၣ်ဃၢၤတဖၣ်ကၢ်တူၥ်ဘၣ်ဒိဘၣ်ထံးဝဲ အဂ့ၢ်န့ၣ် သ့ၣ်ညါဘၣ် ဖန့ၣ်လီၤ.
ဘၣ်ဃးတၢ်ဂ့ၢ်ကဲထီၣ်သးဘျီဝဲအံၤ ကမျၢၢ်လၢအိၣ်ဘူးဖဲန့ၣ်တဂၤစံးဝဲလၢ“အဟဲခးလီၤဝဲဒီးကဘီယူၤ.အူဖိမီၤဘၣ်ဒိ မ့ဝံၤအဟံၣ်လီၤပှီၢ်. အဝဲနါက့အစုအခီၣ်ဘၣ်ဒိၣ်ဘၣ်ထံး. ခဲအံၤပှၤလဲၤဆှၢအီၤလၢတၢ်ဟံၣ်လံ”အဂ့ၢ်န့ၣ် စံးဘၣ်ခ့ၣ်အဲးစံၣ်-ကညီတၢ်ကစီၣ်န့ၣ်လီၤ.
တကးဒံးဘၣ်ကဘီယူၤဟဲခးလီၤတၢ်ဝံၤလီၢ်ခံ ပယီၤသုးကလၢၤလၢအိၣ်ဘူးဖဲန့ၣ်တဖၣ်စ့ၢ်ကီးခးထွဲဝဲကျိဖးဒိၣ် လီၤတဲၥ် ပိၢ်ဖးထီၣ်ဝဲလၢ ပှၢ်ပူၤတၢ်ဖံးအီၣ်မၤအီၣ်လီၢ်ကျီးပူၤအဂ့ၢ်န့ၣ် ကမျၢၢ်တဖၣ်စံးဝဲအသိး သ့ၣ်ညါဘၣ်န့ၣ်လီၤ.
တကွံပူၤကရူၢ်လၢကဘီယူၤလဲၤခးလီၤတၢ်အံၤ အပူၤကွံၥ်လၢညါတၢ်ဒုးကဲထီၣ်တအိၣ်ကဘီယူၤလဲၤခးလီၤတၢ်အဘျီတဖၣ်အဘျီ ကဲထီၣ်ဒံးဝဲန့ၣ်လီၤ. အဘူးကတၢၢ်ဖဲအပူၤကွံၥ်လါယူၤ ၅ သီအခါစ့ၢ်ကီး ပယီၤသုးတြိၤ(၄၄)အခီၣ်ချ့သုးဝဲၤလီၢ်ခိၣ်သ့ၣ် အံၤ ခးလီၤဝဲကျိဖးဒိၣ်(၄)ဖျၢၣ်လီၤတဲၥ်ပိၢ်ဖးထီၣ်ဝဲလၢကရူၢ်အံၤ တကွံပူၤသဝီဃၢၤအဃိ ကမျၢၢ်ပိၥ်ခွါသံဒံးဝဲ(၁)ဂၤကဲထီၣ်ဒံးဝဲ န့ၣ်လီၤ.
တကးဒံးဘၣ်ဖဲအပူၤကွံၥ်လါယူၤ ၁၈ သီဒီး ၁၉ သီအနံၤစ့ၢ်ကီး ကဘီယူၤလဲၤတ့ၢ်လီၤဝဲပီၣ်(၅၀၀) မ့ၣ်ပိၢ်လၢဆီသုးခံကရူၢ် ဒီး ဖွ့ဖူကၢ်ကရူၢ် ဒူသဝီပူၤအဃိ ကမျၢၢ်ဃုၥ်ဒီး(PDF)တၢ်ပၢၢ်ဆၢသုးကရူၢ်အပှၤသံဘၣ်ဒိ ဘၣ်ထံးတစှၤန့ၢ်(၈)ဂၤ ကဲထီၣ်စ့ၢ်ကီး ဒံးန့ၣ်လီၤ.
တကီၢ်ခါခဲအံၤဟီၣ်ကဝီၤဖဲန့ၣ်အပူၤကဘီယူၤအမဲၥ်ညါပယီၤသုးခးလီၤတပျုၥ်တပျီၥ်ကျိဖးဒိၣ်လၢကမျၢၢ်အိၣ်ဆိးလီၢ်ကဲထီၣ် တလီၢ်လီၢ်အဃိ ကမျၢၢ်တဖၣ်ပျံၤတၢ်ဖုးတၢ်အိၣ်ဒီးတၢ်ဘၣ်ယိၣ်ဘၣ်ဘှီတုၤလၢခဲအံၤအဂ့ၢ်န့ၣ် သ့ၣ်ညါဘၣ်န့ၣ်လီၤ.