လါအီကူး ၂၈ သီ, ၂၀၂၆ နံၣ်, ခ့ၣ်အဲးစံၣ်
ခ့ၣ်အဲၣ်ယူၣ် ချၢၣ်လွံၢ်ထူၣ်ကီၢ်ရ့ၣ်(သုးက့ ၃)ဟီၣ်ကဝီၤအပူၤ ဒ်သိးတၢ်သူၣ်တၢ်ဖျးကဒိးန့ၢ်ဘၣ်ထံလၢလၢပှဲၤပှဲၤအဂီၢ် ဒီး ကမျၢၢ်ဖံး အီၣ် မၤအီၣ်ဆှၢထီၣ်ဆှၢလီၤတၢ်ကညီဝဲအဂီၢ် လၢနံၣ်တဝၥ်အတီၢ်ပူၤ ကီၢ်သူလ့ၤစံၥ်ပှဲၤသူၣ်ဖျးဝဲၤကျိၤတီရိၣ်မဲတ့ထီၣ်န့ၢ်ဝဲ ထံတမၢၣ်ဒီးထံဘီ,ကျဲသ့ၣ်တဖၣ်ဝံၤဝဲလံအဂ့ၢ်န့ၣ် ခ့ၣ်အဲၣ်ယူၣ် ထုးထီၣ်ပၥ်ဖျါဝဲဒၣ်န့ၣ်လီၤ.
လီၢ်ကဝီၤကမျၢၢ်တဖၣ်အါဒၣ်တက့ၢ်န့ၣ်လုၢ်အီၣ်အသးသမူလၢတၢ်မၤအီၣ်စံၥ်ဒီး တကးဒံးဘၣ်လၢကကူၣ်ကၤဖံးအီၣ်မၤအီၣ်,ဆှၢ ထီၣ်ဆှၢလီၤ,ဟးထီၣ်က့ၤလီၤကညီဝဲအဂီၢ်န့ၣ် ကီၢ်ရ့ၣ်စံၥ်ပှဲၤသူၣ်ဖျးဝဲၤကျိၤဒီးလီၢ်ကဝီၤကမျၢၢ်တဖၣ်ပၥ်ဖှိၣ်ထီၣ်သး စးထီၣ်ဟူးဂဲၤ တ့ထီၣ်ဝဲတၢ်သ့ၣ်တဖၣ်အံၤဖဲလါအ့ဖြ့ၣ်ဒီးဖဲအပူၤကွံၥ်လါမ့ၤအခါန့ၣ် တၢ်မၤဖျါထီၣ်ဝဲအမိၢ်လံၤမိၢ်ပှၢ်ဝံၤဝဲခဲလၢၥ်လံ အဂ့ၢ်န့ၣ် စံးဝဲ န့ၣ်လီၤ.
လၢတၢ်န့ၣ်အဃိ ဒ်သိးတၢ်သူၣ်တၢ်ဖျးကဒိးန့ၢ်ဘၣ်ထံလၢလၢပှဲၤပှဲၤဒီးစံၥ်လၢကမျၢၢ်မၤအီၣ်ဝဲတဖၣ်ကဂ့ၤထီၣ်အဂီၢ် လၢၢ်ဒိၣ်ကီၢ်ဆၣ်အပူၤ စံၥ်ပှဲၤသူၣ်ဖျးဝဲၤကျိၤခူၣ်န့ၢ်ဝဲထံဘီ(၃)ဘိဒီး တ့ထီၣ်န့ၢ်ဝဲထံတမၢၣ်(၂)ခါတကးဒံးဘၣ် လၢတၢ်သူၣ်တၢ်ဖျး အဂီၢ် ထံတမၢၣ်(၃)ခါလၢအိၣ်မူကီၢ်ဆၣ်ပူၤလၢအဟးဂီၤဝဲအံၤစ့ၢ်ကီး တၢ်က့ၤဘှီဂ့ၤထီၣ်က့ၤဝဲအဂ့ၢ်န့ၣ် လံၥ်တၢ်ပၥ်ဖျါအပူၤ ပၥ်ဖျါဝဲန့ၣ်လီၤ.
လၢန့ၣ်အမဲၥ်ညါ ဆီထံးကီၢ်ဆၣ်ဟီၣ်ကဝီၤအပူၤစ့ၢ်ကီး ဒ်သိးကမျၢၢ်တဖၣ်ကကူၣ်လဲၤမၤကၤ,ဖံးအီၣ်မၤအီၣ်,ဆှၢထီၣ် ဆှၢလီၤ တၢ်သူတၢ်သၣ်ဒီးဟးထီၣ်က့ၤလီၤဘၣ်ကညီဝဲအဂီၢ်န့ၣ် တၢ်တ့န့ၢ်ဝဲကျဲ(၁)ဘိစ့ၢ်ကီးအဂ့ၢ်န့ၣ် လံၥ်တၢ်ပၥ်ဖျါအပူၤ ပၥ်ဖျါဝဲန့ၣ်လီၤ.
လၢနံၣ်တဝၥ်အတီၢ်ပူၤ လီၢ်ကဝီၤကမျၢၢ်တၢ်လဲၤထီၣ်လဲၤထီအဂီၢ် တၢ်တ့ထီၣ်န့ၢ်ဝဲကျဲ,တၢ်သူၣ်ထီၣ်န့ၢ်ဝဲထံတမၢၣ်ဒီး ခူၣ်န့ၢ်ဝဲ ထံဘီ တဖၣ်အမဲၥ်ညါ လၢအတကပၤစ့ၢ်ကီးခီဖျိလၢပယီၤသုးအံၤသူဝဲကဘီယူၤ,ကျိဖးဒိၣ်,ဒြိပညိၣ်ဟးတ့ၢ်လီၤတၢ်ဆူကၠိတၢ်သူၣ်ထီၣ်အိၣ် တလီၢ်လီၢ်အဃိ လၢပှၤကၠိဖိဒီး ကၠိသရၣ်/မုၣ်သ့ၣ်တဖၣ်အဘံၣ်တၢ်ဘၢအဂီၢ် တၢ်ခူၣ်န့ၢ်ဃုၥ်ဝဲတၢ်အိၣ်တဒၢအလီၢ်တၢ်ပူၤတဖၣ် အဂ့ၢ်န့ၣ် သ့ၣ်ညါဘၣ်န့ၣ်လီၤ.
ဒ်န့ၣ်အသိးချၢၣ်လွံၢ်ထူၣ်ကီၢ်ရ့ၣ်အပူၤ တနံၣ်အံၤ(၂၀၂၆)လါယနူၤအါရံၤတုၤလါယူၤလၢ(၆)လါအတီၢ်ပူၤအံၤ ကီၢ်သူလ့ၤစံၥ်ပှဲၤသူၣ် ဖျးဝဲၤကျိၤတီခိၣ်ရိၣ်မဲပှၤဘၣ်မူဘၣ်ဒါ နုၥ်လီၤထိၣ်မၤနီၣ်မၤဃါဝဲ လီၢ်ကဝီၤကမျၢၢ်(၁၇၈၆)ဂၤ အစံၥ်,အကျီးဟီၣ်ခိၣ်(၁၁၃၆၉) အ့ကၢၣ် ဝံၤဝဲဂ့ၤဂ့ၤစ့ၢ်ကီးအဂ့ၢ်န့ၣ် ခ့ၣ်အဲၣ်ယူၣ် အလံၥ်တၢ်ပၥ်ဖျါပူၤအသိး သ့ၣ်ညါဘၣ်န့ၣ်လီၤ.