လါအီကူး ၁၉သီ, ၂၀၂၆နံၣ်, ခ့ၣ်အဲးစံၣ်
ကီၢ်ကၠီၣ်တဲၣ် ဝ့ၢ်ဘီကီးအပူၤ (pink card) ခိၣ်ဂီၤလၢ ထံဂုၥ်ကီၢ်ဂၤဖိတဖၣ် ကဒိးန့ၢ်ဘၣ်ဝဲအဂီၢ်အံၤ ပှၤ (၇) ဂၤလၢရဲၣ်ကျဲၤမၤဝဲသ့ၣ်တဖၣ်အံၤ ခီဖျိလၢ ဟ့ၣ်လီၤဝဲဟံၣ်ဖိဃီဖိစရီတဖၣ်လၢ တမ့ၢ်တတီအဃိ ဖဲ လါအီကူၥ်, ၁၈သီအနံၤန့ၣ် ကၠီၣ်တဲၣ်ပှၤဘၣ်မူဘၣ်ဒါတဖၣ် ဖီၣ်န့ၢ်အီၤအဂ့ၢ်သ့ၣ်ညါဘၣ်န့ၣ်လီၤ.
ပှၤ(၇) လၢတၢ်ဖီၣ်န့ၢ်အီၤတဖၣ်မ့ၢ်ဝဲဒၣ် ပဒိၣ်ပှၤမၤတၢ်ဖိ(၃) , ပှၤမၤ(ပွဲစါ) (၃)ဂၤဃုၥ်ဒီး ပှၤလၢအုၣ်အသးတဂၤန့ၣ်လီၤ.
ဒ်တၢ်ဃုထံသမံသမိးအိၣ်ဝဲဒၣ်အသိးန့ၣ် ဟံၣ်လီၢ်ဒၢးလၢ ပှၤငါအိၣ်လၢအမ့ၢ် Din Daeng အံၤ ပှၤထံဂုၤကီၢ်ဂၤဖိသၣ်လၢ အိၣ်ဒီးလံၥ်အုၣ်ကီၤ သးနံၣ် ၅နံၣ်တုၤ ၁၅နံၣ်ခဲလၢၥ်အိၣ်ဝဲ ၁၃၆၆ဂၤန့ၣ်လီၤ.တၢ်ငါအိၣ်ဒၢးလီၢ် Din Naeng အံၤန့ၣ် အဒၢးအိၣ်ဝဲခဲလၢၥ် (၄၄)ဖျၢၣ်ဒီး ခီဖျိ ဖိသၣ်အနီၣ်ဂံၢ်နီၣ်ဒွးဒီး ဒၢးလၢပှၤငါအိၣ်အနီၣ်ဂံၢ်နီၣ်ဒွးတမ့ၢ်ဒ်ညီနုၢ်အသိးဘၣ်အဃိဘၣ်တၢ်လဲၤထံၣ်န့ၢ်အီၤန့ၣ်လီၤ.ဒီးဒၢး(၃)ဖျၢၣ်န့ၣ် မၤန့ၢ်ဝဲဒၣ်ဖိသၣ်လံၥ်အုၣ်ကီၤ အိၣ်ဝဲတုၤလၢ (၁၄၀)ဂၤအဂ့ၢ် သ့ၣ်ညါဘၣ်န့ၣ်လီၤ.
လၢအမဲၥ်ညါ ဘၣ်ဃးဒီးတၢ်မၤနီၣ်မၤဃါတဖၣ်, လံၥ်လဲၢ်အယီၤအဘျၣ်တဖၣ်, Mule Accounts တဖၣ်, အီၣ်လဲတၢ်လံၣ်တၣ်လီတၢ်ဖံးတၢ်မၤဃုၥ်ဒီး တၢ်ခီထံခီကီၢ်လၢအတဖိးသဲစးတဖၣ် ပှၤလၢအဂၤတဖၣ်တၢ်ပၣ်ဃုၥ်ပၣ်ဂီၢ်အိၣ်တအိၣ်န့ၣ် ကၠီၣ်တဲၣ်ပှၤဘၣ်မူဘၣ်ဒါတဖၣ်အိၣ်ဒီးတၢ်သမံသမိးဒံးအီၤအဖၢမုၥ်အဂ့ၢ်သ့ၣ်ညါဘၣ်န့ၣ်လီၤ.
ဒ်န့ၣ်အသိး ဖဲအပူၤကွံၥ် လါအီကူၥ်, ၄သီအနံၤစ့ၢ်ကီး ကီၢ်ကၠီၣ်တဲၣ် တး(ခ်)ကီၢ်ရ့ၣ် မဲၢ်ဆီးဝ့ၢ် ဟီၣ်ကဝီၤပူၤ ဘၣ်ဃးဒီး ပှၤလၢအထုးထီၣ်တ့န့ၢ်ဝဲ အနံၣ်(၁၀)ခိၣ်ဂီၤ (Zero Head Card)လၢအတဖိးဒီးသဲစးတၢ်ဘျၢ ဃုၥ်ဒီးပှၤလၢအဟးကူၣ်မၤကၤပှၤကညီတဖၣ်အံၤ တၢ်ဖီၣ်န့ၢ်ဝဲ ကၠီၣ်တဲၣ်ပဒိၣ်ပှၤမၤတၢ် (၃) ဂၤအကျါ (၂) ဂၤဒီး အမံၤလၢ (ခဲၣ်) တဂၤ ဃ့ၢ်ပူၤဖျဲးသးလၢ ကီၢ်ပယီၤကီၢ်ဆၢ BGF သ့ၣ်ညါဘၣ်န့ၣ်လီၤ.